Read Chang Naga KAOBAK 6 Bible Online

KAOBAK 6 - Chang Naga bible

KAOBAK 6

¹Ladang kaonyudaka müt bukko haako haula khangkei, yaksa shousi bukkukei.

²Khuthükbü shousi shuongei mütshuongeibü nouyangshousi hesisao maian hapbei; hoba haoenei pienbü pendou haoeneibü yakla lekei.

³Hobaje BUNYUBOUei laukei, “Kü soushouei müt to ponpen aoyolabü, aieilausi hao phe ong; hao po saongao to saoche ong kilabü.”

⁴Khübü chaloua Süngbülopbü shuong kiteikei, hoba kho phaiakei, khuthükbü shousi shuong mütshuongeibü nouyang shousi shuong to jambo haoenei haoeneibü shousi shuong bukkukei; haoen kho shangieda thama hau kibü nyenshen mütshuong kikei.

⁵Hobaje kaodaka khunakshousi shedbü shabü yaang dogo, hoba haoeneibü maangpona dambü ponpen amai dogo BUNYUBOUei hapbei.

⁶Hobaje khunakshousi aila kaodaka kümbei dogo BUNYUBOU maangpon sepeikei, hoba haoeibü maangpona maang ngangkei.

⁷Hobaje BUNYUBOUei laukei, “Khunakshousi ao ngei yaükei, müt, meisiau, topeibü yangsikok hoba mühkabü au, dogo ngei kaodak ka mautilabü; aieilausi haoen kümbü ka kü maangpon leiluda.”

⁸Lausikei Noa BUNYUBOU thedanga maangshikbü hapbei.

⁹Ho Noa meten ngühli; Noa saopobü müt kikei, haoeibü meten shedbü akibü Noa Mühghaü yoa paikei.

¹⁰Hobaje Noaei shousi sem kikei - Shem, Ham hoba Jafet.

¹¹Hobaje Mühghaü thedanga kaodak asaopoko kikei, hoba ik shatyobüei shenan kikei.

¹²Hobaje Mühghaüei kaodak to chühsi, kho asaopoko kikei; aieilausi mütshuong haangei amaiko kibüei amaiko yeikei.

¹³Mühghaüei Noa to laukei, “Ngei khunakshousi pendou shemtilabü, aieilausi haoen ik shatyobüei kaodak shena. Ngei haoen kaonyu yoa mautilabü.

¹⁴Nyi ka shanga kofer buei longchem che dangashi hoba kho maanga shemjang shuong kümashi hoba tangae maangae ham bunaiei naanglepshi.

¹⁵Hobaje nyi hai kümashi, longchem kho tousüng phakphei 133, khaang phakphei 22 hoba suokbü phakphei 13.

¹⁶Nyi longchema koulom che jinashi, hoba kho thükaenei iknop che; hoba kho longchem koukhün khoeibü napheinei jinshi; kho nyi phangaenei shemjang nyiboubü hoba semboubü jinan kümshi.

¹⁷Hobaje chühashi, ngei lang kibü pendou mühnyu phangka mautila kaodak to yungsen sungbada; hoba kaodaka kibü pendou hailabü.

¹⁸Lausikei ngei ka yoa thebülanbü pholabü; hoba no, kaibü shousi shuong, kaibü yak hoba kaibü shousi shuongeibü yaksi shuong longchem to atlabü.

¹⁹Hobaje lang kibü meisiau yangsikok pendou ka pi si paang nyibang haoen ka yoa lang kitilabü lele;

²⁰au shuong phang weko ka, hoba samkeisamuk phang weko ka hoba kaodaka shanbü yangsikok phang weko ka nyibang kayoa longchem to leian atashi;

²¹ka shanga hoba haoen pendou shanga shausiyung phang penko lamlean phoashi.

²²Noaei Múhghaüei sakkubü pendou kümbei.”