Read Chang Naga KAOBAK 7 Bible Online

KAOBAK 7 - Chang Naga bible

KAOBAK 7

¹Kheijinei BUNYUBOUei Noa to laukei, “No hoba kaibü chemdang pendou longchem to atashi; aieilausi ho metena no saopobü dogo chühena.

²Nyi saopobü meisiau weko ka pi si paang tang nyetbang hoba asaopobü meisiau weko ka pi si paang tang nyibang;

³mühkabü aushuong kaakei pi si paang tang nyetbang kaodak pendoua lilabü lang kitila shanga ka yoto leibashi.

⁴Aieilausi tat ka jaüan chalou nyet phaia ngei kaodak to lang chalou saonyi hoba langyang saonyi loutilabü; hoba ngei kümbü langkei kibü pendou ngei kaonyudak ka mautilabü.”

⁵Hobaje Noaei BUNYUBOUei hao la sakkubü pendou kümbei.

⁶Kaodak to yungsen loujinei Noa po 600 jailean kikei.

⁷Yungsen ka satenla Noa longchem to atkei, hoba hao yoa haoeibü shousi shuong, hao yak hoba hao shousi shuongeibü yaksi shuong dogo atkei.

⁸Saopobü meisiau yo ka hoba asaopobü meisiau yo ka hoba au shuong yo ka hoba kaoa shanbü pendou ka,

⁹penyibang, pi si paang Mühghaüei Noa la sakkubü tegü longchem to atkei.

¹⁰Hobaje nyetbounyet kaodak to deinyu yungsen loukei.

¹¹Noa langkei salang saongao lakboubü, litnyu nyetboubü chalou anthük nyetbouatham yungnyu yaangbü deikük pendou paknyinkei hoba müh koukhün ipbei.

¹²Hobaje lang kho kaodaka chalou saonyi hoba langyang saonyi kikei.

¹³Hobaje khünyettham Noa hoba hao shousi shuong, Shem, Ham, Jafet hoba Noa yak hoba haoen yoa shousieibü yaksi sem kho longchem to atkei.

¹⁴Haoen hoba yamkabü meisiau pendou phang weko, hoba samkeisamuk pendou phang weko hoba kaoa shanbü pendou phang weko hoba au pendou phang weko, kaakyembü pendou phang weko,

¹⁵hoba langkei hakhinbü phe pendou ka haoen penyibang Noa yoa longchem to atkei.

¹⁶Hobaje Mühghaüei sakkubü tegü meisiau yangsikok pendou ka pi si paang Noa yoa atkei hoba BUNYUBOUei longchem kho khinkei.

¹⁷Hobaje yungsen kho kaodaka chalou saonyinyet kikei; hoba dei kho aei aei yeisije longchem kho phongjung angkei, hoba kao ka tonenkei.

¹⁸Hobaje kaodaka yungsen kho aei haukiko yeisije longchem kho deitaka phongkei.

¹⁹Dei kho hau kiko yeisije müh phanga shongh suokbü pendou nyembei.

²⁰Dei kho iknop anthükngao sühko angsije shongh shuong danglepbei.

²¹Kaonyudaka lang kibü pendou, topeibü yangsikok, meisiau, müt khunakshousi phang pendou shembei.

²²Kao ulangbüa ai ong hakhinbü soushou langkei kikeije khübü pendou haikei.

²³BUNYUBOUei kaonyua kibü lang kibü pendou - müt, meisiau, ausiyuk pendou mautikei, lausikei Noa hoba hao yoa longchem to atbü dan ong joukei.

²⁴Dei kho kaodaka chalou saongao to anjinsem sühko dangyoan khüpbei.