Read Chang Naga KAOBAK 8 Bible Online

KAOBAK 8 - Chang Naga bible

KAOBAK 8

¹Mühghaüei Noa hoba hao yoa longchema kibü lang kibü meisiau pendou hoba samkeisamuk pendou damenkei; hoba Mühghaüei kaodaka yei che dantikei hoba dei kho hapjung ngaikei.

²Yungnyu deikük hoba mühkou khinkei hoba müh ka lang loubü thakan apbei.

³Hobaje kho kaodak ka athakko hapjung ngaikei, hoba chalou saongao to anjinsem penan phaia dei kho shijung ngaikei.

⁴Hobaje lit nyetboubü, hoba chalou anthüknyetboubüa longchem kho Ararat shongha otkei.

⁵Hobaje lit anboubü sühko dei kho athakko hapjung ngaikei; lit anboubü chalou shaangbounyet shonghkhu shuong hapbei.

⁶Hobaje chalou saonyi kian, Noaei haoei dangbü longchem kou ipbei,

⁷hoba haoei aukhomakmak che hautikei; hoba kaodak ka dei kho aushongko hau longei dogo seengeikei.

⁸Kheijinei kaodaka dei hapbeilaoje dogo ngela haoei hao jungka dukutuk che hautikei;

⁹lausikei dukutuk khoei pakshang ühüpsije hao jungto longchem to nyibou sepeijung longeikei; aieilausi kaodak pendoua dei kikei. Hobaje haoei jembü ik shingan leian sungan hao jungto longchemmaang to leiyetkei.

¹⁰Haoei tokei chalou nyet haiyeikei hoba nyibou haoei dukutuk kho longchem ka litikei;

¹¹hoba dukutuk kho hao jungto chasem longeikei, hoba chühsi haoeibü sembunga oliv buyik sangtüngbü anan kikei; hibü Noaei kaodaka dei hapa dogo ngekei.

¹²Hobaje toukei haoei chalou nyetnyet haiteian dukutuk kho hautikei; lausikei kho hao jungto sepeijung aloungai.

¹³Noa po 601 shaangbou lit khangnyet dei kho kaodaka ulangtham apbei. Kheijinei Noaei longchemdak yukbü kho sungan apan chühsi kaodak ulangtham kiteikei.

¹⁴Nyiboubü lit chalou saoto nyetboua kaodak kho lepde ulangtham apbei.

¹⁵Kheijinei Mühghaüei Noa to laukei,

¹⁶“No hoba kayak, ka shousi shuong hoba haoeneibü yaksi shuong yoan longchem ka longashi.

¹⁷Phea nyenbü meisiau, ausiyuk, kaoa shanbü yangsikok pendou longchem ka sungenashi, khoei ong haoen bukko shatko sitko juong haakoyaangko haulabü.”

¹⁸Hibü Noa, hao shousi shuong, hao yak, hoba shousieibü yaksi shuong longchem ka longkei.

¹⁹Meisiau, ausiyuk, shanbü yangsikok phang penko longchemmaang ka longkei.

²⁰Kho jiha Noaei BUNYUBOU shanga laangshongei lemshon che yaükei; hoba saopobü meisiau hoba au weko ka sungenan haoei laangshongei yaübü lemshona khümbo juokbü lembü kukei.

²¹Hobaje BUNYUBOUei ponlem maibü jemoukei; hoba BUNYUBOUei jembü maangpona laukei, “Ngei müt laüa kaonyudak la nyibou shedsikhau akulabü, aieilausi müteibü maangpona nashoudangka thama dambü amaibü ki. Khei yingsikei ngei lang kibü pendou nyibouje ashiakoelabü.

²²‘Kaonyu ki shongko Langjinbü jih si youlatbü jih Khamsilüh jih si sanglem jih Sulang si poang Chalou si nangnak ladangkei ananglabü.’ ”