Read Chang Naga KAOBAK 9 Bible Online

KAOBAK 9 - Chang Naga bible

KAOBAK 9

¹Hobaje Mühghaüei Noa hoba haoeibü shousi shuong haükuko laukei, “Lang hekko haashi hoba kaonyu shentiashi.

²Hobaje kaodak meisiau pendou hoba mühkabü au shuong pendou hoba kaoa paibü yangsikok pendou hoba yungnyua kibü ngau pendouei ka to hattilabü; khübü pendou ka ik to jinkuda.

³Ngei kan la pikshik shaula kubü tegü lang kibü topeibü meisiau shuong pendou shaula shanga kuda.

⁴Lausikei kanei kho yoa langkei thonbü sii ashaujan.

⁵Hobaje maimaitham kaneibü sii, kho kaneibü langkei sii, ngei hilabü; meisiau pendou ik ka hilabü; hoba jaisina ik ka ngei müteibü langkei hilabü.

⁶Aoyouei ong müteibü sii angtilaje mütei haoeibü sii angtilabü; aieilausi Mühghaü phatbüa müt kümbei.

⁷“Hobaje kan lang hekko juong haashi; kaonyudaka bukko juongko khonei juongnyu haashi.”

⁸Kheijinei Mühghaüei Noa hoba haoeibü shousi shuong yoa hao to joyoko laukei,

⁹“Chühashi, ngei tou kan yoa hoba kan phainei kaneibü thensilen to ngeibü thebülanbü kaangkhühtham khangdayaüda,

¹⁰hoba kan yoa kibü langkeibü meisiau pendou yoa, au si samkeisamuk yoa hoba kaodak yangsikok pendou yoa longchem ka longbü meisiau pendou yoa ngei ho khanglabü.

¹¹Hobaje ngei kan yoa ngeibü thebülanbü kaangkhühtham khangko, khei lang kibü pendou ladangkei yungsenei ashemtilabü; hoba kaodak maulabü lele ladangkei yungsen aikei akilabü.”

¹²Hobaje Mühghaüei laukei, “Ngo hoba kan yoa langkei kümbü pendou kanglanga loulabü meten sühko ngei thebülanbü tetsida ho kümda.

¹³Ngei sangmeia yepukshangjep phokuda, hoba ho ngo hoba kaodakbü kanglanga thebülanbü tetsida kilabü.

¹⁴Hobaje hai longlabü, ladang ngei kaonyu thüka sangmei nyengan yepukshangjep kho sangmeia haplaje,

¹⁵ngeibü theyolanyobü ngüh, laobou ngo hoba kan hoba phe thonan lang kibü meisiau pendou ham kanglanga kia, kho ngei damenlabü hoba deiei phe pendou mautilabü lele touje yungsen ladangkei aloulabü.

¹⁶Hobaje yepukshangjep kho sangmeia kilabü, hoba Mühghaü si kaodaka kibü phe yoka langkei kibü meisiau pendou ham kanglanga kibü thon akibü thesilan damenla shanga ngei hato chühlabü.”

¹⁷Hobaje Mühghaüei Noa to laukei, “Ho thebülanbü tetsida, laobou ngo hoba kaodaka kibü langkei pendou kanglanga ngei kaangkhühtham khangayaüa.”

¹⁸Noaeibü shousi shuong aoyou longchem ka longkei khübü kho Shem, Ham, Jafet kikei; hoba Ham Kananeibü bou kikei.

¹⁹Haoen sem kho Noaeibü shousi kikei, hoba haoen ka kaonyu pendou shenko haakei.

²⁰Hobaje Noa sekmoubü la yeian semlühlaak lekei.

²¹Hobaje haoei ih yungan jaketkei hoba hao mütkong neichema kiteikei.

²²Hobaje Kananeibü bou Hamei bou mütkong hapan haoeibü jaisina müt nyi to tangto angan lenkei.

²³Hobaje Shem si Jafetei nei che sungan kho haosieibü phaka peian phaito hauan haoeneibü bou mütkong kibü küplepbukei hoba haosieibü thenyek phaiae sepeian haubü ka haosiei haoeneibü bou mütkong kibü kho ühüp.

²⁴Hobaje Noa hao ihei jakbü ka pienan hao shou napeibouei ai kümbei kho ngean apbei

²⁵Hobaje haoei laukei, “Kanan shedsikhau yingshi! Hao haoeibü jaisinasi shuongeibü phangkabü aaola lelabü.

²⁶Tokei haoei laukei, Shemeibü Mühghaü BUNYUBOU haübou yingshi; hoba Kanan Shemeibü aao yingshi.

²⁷Mühghaüei Jafet yaangentishi, hoba hao Shemeibü neichema kitishi; hoba Kanan haoeibü aaola yingtishi.”

²⁸Yungsen louan phaia Noa po 350 kikei.

²⁹Hobaje Noa salangbü po 950 kikei, hoba hao haikei.