Read Chang Naga 2 SAMUEL 1 Bible Online

2 SAMUEL 1 - Chang Naga bible

2 SAMUEL 1

¹Saul haian phaia, Dawid Amalekbü haitibü ka sepeinyu longeian Ziklaga Dawid chalou nyinyet kikei,

²Hobaje sembounyet, chühashi, müt che haoeibü neisimei jitnyinan hoba haoeibü khua tham kakan Saul kishang ka loukei. Hobaje hao Dawid jungto loujinei, hao kaoa khüpetkei hoba souhat lenkei,

³Dawidei hao to laukei, “No laka loukei?” Hobaje haoei laukei, “Ngo Israelbü sepai yoka satenkei.”

⁴Hobaje Dawidei hao to laukei, “Ailai ong hauda? Lenshima!” Hobaje haoei jongaikei, “Lason kho lusakan mütshuong lina, hoba müt juong haia; hoba Saul si haoshou Jonathan haia.”

⁵Kheijinei hao to lenbü heshoubou to Dawidei laukei, “Saul si hao shou Jonathan haia dogo nyi lai ngekei?”

⁶Hobaje hao to lenbou heshoubou khoei laukei, “Thu maiko ngo Gilboa shongha kito haükei, hoba khünei Saul hao jembü aubua nongan kikei, hoba chühashi, kailong shuong hoba kolia setbü shuong hao thüka nyangko kikei.

⁷Hobaje haoei hao phaito sepeian chühsi haoei ngo hapbei hoba ngo ngakei. Hobaje ngei jongaikei, ‘Ngo hanei kia.’

⁸Hobaje haoei kü to laukei, ‘No ao?’ Ngei hao to jongaikei, ‘Ngo Amalekbü.’

⁹Hobaje haoei kü to laukei, ‘Nyangko louan ngo haitiashi, ngo touje hailabü lele ong kia!’

¹⁰Hibü ngo hao junga loan hao haitikei, aieilausi hao tuongan phaiaje hao lang akienlabü dogo ngei ngekei, hoba haoeibü khua kibü Choba khun hoba haoeibü phema kibü khüngkap ngei sungkei hoba khübü kho hanei ngeibü bunyubou jungto sungbuakei.”

¹¹Kheijinei Dawidei haoeibü jembü neisimeia hatkei hoba khübü kho jitnyinkei, hoba kho tegü hao yoa kibü pendouei kümbei,

¹²hoba haoenei mang haapbei hoba Saul si hao shou Jonathan hoba BUNYUBOUeibü mütli shuong shanga hoba Israel chung shanga nangnakko nyengkei, aieilausi haoen inei haikei.

¹³Hobaje hao to lenbü heshoubou khüto Dawidei laukei, “No laka loukei?” Hobaje haoei jongaikei, “Ngo yenbou cheeibü shou Amalekbü ki.”

¹⁴Hobaje Dawidei hao to laukei, “BUNYUBOUei pienbü mautila kaibü ik atla ailai no ühütko kikei?”

¹⁵Hobaje Dawidei heshou shuong yoka che ngaan laukei, “Hauashi, hoba hao tuongtiashi.” Hobaje haoei hao ngüman koutikei hoba hao haikei.

¹⁶Hobaje Dawidei hao to laukei, “Kaibü sii kaibü khua ong künshi; aishanga kaibü sembungei kakhu limbo laukei, ‘Ngei BUNYUBOUei pienbü haitia.’ ”

¹⁷Hobaje Saul si hao shou Jonathan shanga ho ügütü chia Dawidei manghaap chia laukei.

¹⁸Ho Jihudabü la lenjan dogo haoei laukei. (Chühashi, ho Jasher lea doakei.)

¹⁹“O Israel, kaibü soneikangbü, kaibü thükkabou setshanga haitiakei! Hau yaangbou lai tuongan ki!

²⁰Filistiabü yaksa shuong lai olinko ki. Kipan üpbü yaksa shuongei phangan jinkuda Gata kho tengeti, Ashkelon khongnyua tengek.

²¹“Kan Gilboa shongh shuong, thüka nindei ayingsi lang ayingsi lemshang khongthu tekitima! Aishanga khünei lakbühongbü shuongeibü aih totnyinlabü. Sauleibü aih onangei anaangkubü che tegütham.

²²Haitibü sii ka, hau yaangboueibü haabü ka, Jonathaneibü laujin sepeinyu alongai; hoba Sauleibü inlou kong sepeinyu alongai.

²³“Saul si Jonathan haosieibü langkeia sanoulabü hoba maanga mailabü kikei. Hobaje haibüakei haosi abang. Aulu tokei haosi sisikbou kikei, molosaonyu tokei haosi hau kibou kikei.

²⁴“Kan Israelbü yaksa shuong Saul shanga haapashi; aoei kan soumo kakko nakthüngan sakbü nei neitikei; aoei kaneibü neiameia hon shanjinkukei.

²⁵“Lason jenyua laakbü hongbü shuong tuongan ki! Jonathan no thükkabou setshanga haitiakei.

²⁶“Ngo ka shanga sangküngkuda, ngeibü jaisina Jonathan, kü thedanga no maanga mailabü kikei. Kü to kaibü sanou maangpanglabü che kikei; yaksaeibü sanou tokei khaibou.

²⁷“Hau yaangbü shuong lai tuongkei, Wapyobü insiaubu mauakei!”