Read Chang Naga 2 SAMUEL 10 Bible Online

2 SAMUEL 10 - Chang Naga bible

2 SAMUEL 10

¹Kho phaia Ammonbü Choba haikei hoba haoeibü shou Hanunei hao jeila songdakkei.

²Kheijinei Dawidei laukei, “Na- hasheibü shou Hanun to haobouei kü to sanoubü ngei ngei sanou lenlabü.” Hibü Dawidei haobou shanga hao hakso haptibü haoeibü sambü shuong ik to kuan hautikei. Hobaje Dawideibü sambü shuong Ammonbü shousi shuong kaodak to loukei.

³Lausikei Ammonbü shousi leiyeibü shuongei haoeneibü bunyu Hanun to laukei, “Dawidei kabou to souhat lenda dogo nyi damda, ka jungto haksotibü shuong hautikei dogo damda si? Dawidei haoeibü sambü shuong ka jungto sangnyu lamla hoba kho chühletla hoba kho tuongtila ohauti lo?”

⁴Hibü Hanunei Dawideibü sambü shuong lapbei hoba haoeneibü kaoshang wi jamde kütan apbukei, hoba haoeneibü neisimei youshi ka lipan apbukei, hoba haoen ngaitikei.

⁵Ladang haoenei kho Dawid la lenkei, haoei haoen shuokla hautikei, aishanga mütshuong aeibou himouko kikei. Hobaje Chobaei laukei, “Kaneibü kaoshang wi aching shongko Jerikhoa kishi, hoba kho phaia kangai.”

⁶Hobaje ladang Ammonbü shousi shuongei Dawid thedanga haoen mangsenan apa dogo chühenkei Ammonbü shousi shuongei hautikei hoba Beth Rehob si Zobaa kibü Siriabü youeibü sepai hajar saoche hoba müt hajar che yoa Maakabü Choba si Tob mütshuong hajar anthüknyi haukei.

⁷Hobaje ladang Dawidei kho ditkei, haoei Joab hautikei, hoba lakjaibü tan pendou hau kibü mütshuong hautikei.

⁸Hobaje Ammonbü shousi shuong longkei hoba bakhün to atshang aenei lason tan penyi lokei, hoba Zobaa kibü hoba Rehoba kibü Siriabü hoba Tob si Maakabü mütshuong khongthua haoen ong kikei.

⁹Tou ladang Joabei la kho hao dantheko thedanga hoba phainei kibü hapbei, haoei Israel mütli pendou ka pienkei, hoba Siriabü khulimbo lason lin küman yangan phokei.

¹⁰Joubü mütshuong kho haoei haoeibü na Abishaieibü ika lepde kuan apbei, hoba haoei Ammon shousi shuong khulimbo haoen lin küman phokei.

¹¹Hobaje haoei, laukei, “Siriabü kho kü shanga hau yongko yaangbü yingalonga, kheijinei nyi ngo thuilabü, lausi tokei Ammonbü shousi shuong ka shanga hau yongko yaangan kialonga kheijinei ngo louan thuilabü.

¹²Maangkaangashi, hoba sen mütli shanga hoba seneibü Mühghaüeibü sangnyu shanga sen bousu lakba la yeikho; hoba BUNYUBOUei hao thedanga maiakei dogo laubü kümshima!”

¹³Hibü Joab hoba hao yoa kibü mütshuong Siriabü khulimbo labou nyangko loukei, hoba haoen hao thedang ka satkei.

¹⁴Hobaje ladang Siriabüei hatla satda dogo Ammonbüei ditkei, kho tegü haoenkei Abishai thedang ka hatla satkei, hoba sangnyu to atkei. Kheijinei Ammonbü shousi shuong ka Joab sepeinyu longeikei, hoba Jerusalem to loukei.

¹⁵Hobaje ladang Siriabü Israelbüei thüka dogo chühenkei, haoen lolo chela onshaikei.

¹⁶Hobaje Hadadezer hautikei hoba shumang danan kibü Siriabü leibakei, hoba haoen Helam to Hadadezer lakjaibü tan lajamleibou Shobak haoen thedanga leibou küman loukei.

¹⁷Hobaje kho Dawid to lenkei, hoba haoei Israelbü pendou liko yoshaitikei, hoba Jordan danan Helam to loukei. Hobaje Siriabüei Dawid danthetko lashuok lokei, hoba hao to wapyokei.

¹⁸Hobaje Siriabü Israelbü thedang ka hatla satkei; hoba Siriabü kailong saongao nyet hoba koli sepai hajar saonyi haitikei hoba haoeneibü lakjaibü tan lajamleibou Shobak leilukei, hoba hao khünei haikei.

¹⁹Hobaje ladang Hadadezer khangenbü shuong Choba pendouei Israelbü thüka haoen nemtia dogo ditkei, haoenei Israel to sangmai kümbei hoba haoen khangenkei. Hibü Siriabüei touje Ammonbü shousi shuong to thuila hatkei.