Read Chang Naga 2 SAMUEL 11 Bible Online

2 SAMUEL 11 - Chang Naga bible

2 SAMUEL 11

¹Tou kelit onglit jih sühjinei Choba shuong wapyola haubü jihaphaia Dawidei Joab hoba hao yoa haoeibü khangenbü shuong hoba Israelbü hautikei, hoba haoenei Ammonbü shousi shuong mautikei, hoba Rabba komlepbei. Lausikei Dawid je Jerusalema kikei.

²Kheijinei nyetche chanyu neplamto Dawid hao haoeibü yepshang ka meimeikei, hoba Chobaeibü chemdaka paikei, hoba chemdak ka yaksa che mangyuko hapbei, hoba yaksa kho aeibou hesisao maian kikei.

³Hobaje Dawidei müt hautian yaksanyu kho shanga pheyokei. Hobaje müt cheei laukei, “Ho Eliameibü shou Bathsheba, Hitbü Uriaeibü yak aying si?”

⁴Hobaje Dawidei ngühlang kümbü shuong hautikei hoba sao leian loukei hoba sao hao jungto lotkei, hoba haoei sao to asangalanbü kümbei; aieilausi sao asaopobü ka hinseian kikei, hoba sao jembü chem to ngaikei.

⁵Hobaje yaksanyu kho mang akongko apbei; hoba saoei ngühlang hautiko Dawid la ngetiko laukei, “Ngo mangakongko apa.”

⁶Hobaje Dawidei Joab jungto ngühlang hautiko laukei, “Hitbü Uria kü jungto hautiashi.” Hobaje Joabei Uria Dawid jungto hautikei.

⁷Hobaje ladang Uria hao jungto loukei, Dawidei hao ka Joabei lai kümbei hoba mütshuongei lai kümbei hoba wapyo lai hauda dogo phekei.

⁸Hobaje Dawidei Uria to laukei, “Kaibü chem to yanashi hoba kaibü you makashi.” Hobaje Uria Chobaeibü chem ka bangkei hoba Choba ka hao phaito jongsak semtikei.

⁹Lausikei Uria je haoeibü bunyubou khangenbü pendou yoa Chobaeibü kouyema yepbei hoba haoeibü chem to ayan.

¹⁰Hobaje ladang haoenei Dawid to Uria haoeibü chem to ayan dogo lenkei, Dawidei Uria to laukei, “No yena lounyu kian longeikei aying lo? Khülonga kaibü chem to ayandasi?”

¹¹Hobaje Uriaei Dawid to laukei, “Saopobü Busen hoba Israel si Jihuda dipa kia, hoba ngeibü bunyu Joab, hoba ngeibü khangenbü shuong khongthua shaiakei; khülonga ngo kü chem to shaula yungla hoba kü yak yoa yepan kila yanlep lo? No kishongko hoba kaibü soushou lang kishongkoje ngei kho tegü akümlabü.”

¹²Hobaje Dawidei Uria to laukei, “Tatkei hanei kiteishi, hoba ngietje ngei no hautilabü.” Hibü Uriaei khünyet kho hoba nyibounyet Jerusalema kikei.

¹³Hobaje ladang Dawidei hao ngakei haoei hao junga shaukei yungkei hoba haoei hao ihei jaaktikei, hoba nangnakje hao jembü shena haoeibü bunyubou khangenbü shuong yoa yepla haukei, lausikei haoen chem toje ayan.

¹⁴Kho phaia ngeyang Dawidei Joab jungto le che dokei, hoba kho Uriaeibü ika kuan hautikei.

¹⁵Hobaje haoei lea ho tegü dokei. Lason sekbou thedanga kanei Uria apyoshi hoba kan hao jungka kukshi, khünei hao to meioulabü, hoba hailabü.

¹⁶Khei yingsije Joabei sangnyu shijinei lanei kaangbü sekbü mütshuong ki, khünei haoei Uria apyokei.

¹⁷Hobaje sangnyua kibü mütshuong longkei, hoba Joab to wapyokei, hoba khünei Dawid khangenbü shuongkei yoan tuongkei, hoba tokei Hitbü Uria kei haikei.

¹⁸Kheijinei Joabei ngühlang künbü hautikei hoba wapyobü shanga haüthükbü pendou Dawid la lenkei.

¹⁹Hobaje haoei ngühlang künbou la sakkuko lenkei, ladang nyi Choba la wapyo shanga pendou lenkhümlaje,

²⁰kheijinei Choba khau angtialonga, hoba haoei ka to ho hai laualonga, “Aila kan wapyola sangnyu nyangko haukei? Haoenei kümthang ka kan thüklep dogo angelo?

²¹Jerubbesheteibü shou Abimelek aoei haitikei? Yaksa cheei kümthang ka nitbü laang thükkabou thükto attian hao Thebeza ühai lo? Kan aila kümthang nyangko haukei?” Kheijinei nyi laulabü, “No khangenbou Hitbü Uria kei haiakei.”

²²Hibü ngühlang künbou kho haukei, hoba louan Dawid la Joabei hao ai shanga hautikei pendou lenkei.

²³Hobaje ngüh lang künbouei Dawid to laukei, “Mütshuongei kün thüka younak maibü hapan kün khongthua wapyola longkei, lausikei bakhün sühko künei sepeian wapyojung haukei.

²⁴Kheijinei no khangenbü shuong to kipbü shuongei kümthang ka kipbei, hoba Choba, kaibü khangenbou Hitbü Uria kei haia.”

²⁵Kheijinei Dawidei ngühlang kümbou to laukei, “Nyi Joab to hai lenshi, ‘Hoei no aolinko tekiti, aieilausi inei che yingsikei che yingsikei suian apda; kaibü lason sangnyu limbo aei aei hau kibou yeitishi, hoba kho tuongtishi.’ Hobaje nyi hao thungeijangeishi.”

²⁶Hobaje ladang Uriaeibü yakei lao haibü ditkei, saoei lao shanga mang haapbei.

²⁷Hobaje ladang manghaapbü thonkei, Dawidei sao haoeibü yakla lekei, hoba hao la bousu shou che bukkukei, lausikei Dawidei kümbü kümeileiei BUNYUBOU aolinti.