Read Chang Naga 2 SAMUEL 12 Bible Online

2 SAMUEL 12 - Chang Naga bible

2 SAMUEL 12

¹Hobaje BUNYUBOUei Nathan thuseibou Dawid jungto hautikei. Hobaje Dawid jungto hao loukei, hoba hao to laukei, “Sangnyu chenei müt nyi kikei; che keibü hoba che kho shalebü.

²Keibou khoei sanlon si masu shuong shuonga juong kikei;

³lausikei shalebouei sanlon saoen che, laobou haoei jekkei hoba samenkei, kho to liman ai akitei; kho hao to liko hoba haoeibü shousi shuong yoa chingenkei; khoei haoei jembü shausiyung ka shautikei hoba haoeibü thung ka inkei, hoba haoeibü phakshoka tonkei hoba haoeibü nouyangshou che tegü kikei.

⁴Hobaje keibou jungto yenbou che loukei hoba haoei haoeibü sanlon shuong ka hoba haoeibü masu shuong ka hao jungto loubü yenbou shanga ale, lausikei shaleboueibü kho lekei, hoba hao jungto loubü müt kho shanga lamlekei.”

⁵Kheijinei Dawidei müt kho to aeibou maangpokkei, hoba haoei Nathan to laukei, “Khei kümbü müt kho haila muakei,

⁶hoba haoei sanlon shoushou kho penlei phoban kungaijan, aieilausi haoei ho kümbei hoba onou alen.”

⁷Hobaje Nathanei Dawid to laukei, “Kho müt kho no! Kho tegü BUNYUBOU Israel Mühghaüei lauda, ‘Ngei no Israel thüka Choba lela naangenko pienkei, hoba ngei no Sauleibü ik ka khümenkei,

⁸hoba ngei ka la kaibü bunyuboueibü chem kukei, hoba ngei kaibü khukua kaibü bunyuboueibü yaksi shuong kukei hoba ka la Israel si Jihuda chem kukei. Khübü kho thüng aying tegüje, ngei ka la aeilakei kuyoan kikhoulabü.

⁹Aila nyi BUNYUBOU thedanga laobou amai, kho kümla haoeibü ngüh aweasüng? Nyi Hitbü Uria inei haitia, hoba haoyak kaibü yak la lekei. Hobaje hao Ammonbü shousi shuong yoa haitikei.

¹⁰Tou khei yingbüei kaibü chem ka in ladangkei abanglabü; aieilausi nyi ngo awealau, hoba Hitbü Uriaeibü yak kaibü yak la lekei!’

¹¹BUNYUBOUei ho tegü lauda: ‘Chühashi, ngei no kaibü chem ka kakhu limbo amaibü longtilabü, hoba ka the ka ngei kaibü yaksi shuong sunglabü, hoba haoen kaibü chempen shuong la kulabü, hoba haoei kaibü yaksi shuong to ho chanyu thedanga yeplabü.

¹²Aishanga nyi kho huphangshoua kümbei, lausikei ngei ho Israelbü pendou thea hoba chanyu thedanga kümlabü.’”

¹³Hobaje Dawidei Nathan to laukei, “Ngei BUNYUBOU khulimbo shabü shona.” Hobaje Nathanei Dawid to laukei, “BUNYUBOUeikei kaibü shabü apbua, no ühailabü.

¹⁴Kheiyingsi dogokei kho kümsilei haangjung nyi dangbou shuong la BUNYUBOU nyikula jih yaangbü kua, ka la bukkubü nashou kho maimai hailabü.”

¹⁵Hobaje Nathan hao chem to ngaikei. Hobaje BUNYUBOUei Uriaeibü yakei Dawid la bukkubü to ngümbei, hoba hao aeibou shatkei.

¹⁶Hobaje nashou kho shanga Dawidei Mühghaü to aeibou sukeijakei. Hobaje Dawid mühei nyengkei hoba atan nangnak langyang pendou kaoa leketnyu yepbei.

¹⁷Hobaje haoeibü chem to jaishou shuong haukei, hoba hao nyangko hauan hao kao ka phonla haujembei, lausikei hao apien, ayingsi haoen yoa ashau- ayung.

¹⁸Tou chalou nyetbounyet nashou kho haikei. Hobaje Da- wideibü sambü shuongei nashou kho haia dogo lenla hatkei. Aishanga haoenei laukei, “Chüh- ashi, nashou kho lang kijinei künei hao to joyokei; hoba haoei küneibü ngüha ale, khülonga künei nashou kho haia dogo lenalonga hao lai khauangla?”

¹⁹Lausikei ladang Dawidei haoeibü sambü shuong liko hangsho joyobü hapbei Dawidei nashou kho haia dogo lenenkei, hoba Dawidei jembü sambü shuong to laukei, “Nashou kho haia sai?” Hobaje haoenei laukei, “Haü, hao haia.”

²⁰Kheijinei Dawid kao ka meimeikei, hoba sakkeisambei, hoba hao lolo onang naangkei, hoba haoeibü neisimei jeikei, hoba BUNYUBOUeibü chem to haukei, hoba lembei. Hobaje kho phaia hao jembü chem to loukei, hoba haoei shausiyung hikei hoba heoenei kho hao junga phokukei hoba haoei shaukeiyungkei.

²¹Kheijinei haoeibü sambü shuongei hao to laukei, “Nyi kümbü tetlabü kho ai? Nashou kho lang kijinei nyi hao shanga nyengkei hoba haapbei, lausikei nashou kho haisije no pian shaudayungda.”

²²Hobaje haoei laukei, “Ladang nashou kho lang kikei, ngei nyengkei hoba haapbei, aieilausi BUNYUBOUei kü to sanouko nashou kho ühaitilep dogo dambei.

²³Lausikei touje hao haia ngo aila haapla? Ngei hao nyibou sungngaienlep lo? Ngo hao jungto haulabü, lausikei haoje kü jungto sepeinyu alongeilabü.”

²⁴Hobaje Dawidei hao yak Bathsheba maangsukei, hoba sao jungto atkei, hoba sao to yepbei, hoba saoei bousu shou che bukkei, hoba haoei haoeibü nyen Solomon nyenkei, hoba BUNYUBOUei hao to sanoukei.

²⁵Hobaje thuseibou Nathan la ngüh kukei, hoba haoei hao nyen Jedidia nyenkei, aieilausi BUNYUBOUei hao to sanoukei.

²⁶Tou Joabei Ammonbü shousi Rabba khulimbo wapyokei hoba Chobaeibü sangnyu kho lekei.

²⁷Hobaje Joabei ngühlang künbü shuong Dawid jungto hautiko laukei, “Ngei Rabba khulimbo wapyoa, hoba ngei deikük sangnyu kei lea.

²⁸Hibü tou joubü shuong liko takshattiashi, hoba sangnyu khulimbo la thoashi, hoba kho leashi; khei aying longa ngei sangnyu kho lean ngeibü nyen nyenan aplabü.”

²⁹Hobaje Dawidei müt pendou takshattikei hoba Rabba to haukei, hoba kho khulimbo wapyokei, hoba kho lekei.

³⁰Hobaje haoei haoeneibü Chobaeibü khun kho haoeibü khu ka sungkei, hoba takanchühbü kho hon seret khujin kikei, hoba khünei sonlailaibü laang shuong kikei, hoba kho Dawideibü khua hankukei. Hobaje haoei sangnyu ka sungbü peisilei juongnyu sungbakei.

³¹Hobaje khüto atan kibü müt shuong haoei leian longkei hoba haoen bulatbü, sonnam lipnyinbü, hoba namjakbü kümbüa tukosekko kümtileitila, hoba jih jiha juoklaang kümshanga kümla phokukei. Kho tegü haoei Ammonbü sangnyu pendou la kümtikei, kheijinei Dawid si haoeibü mütshuong pendou Jerusalem to longeikei.