Read Chang Naga 2 SAMUEL 13 Bible Online

2 SAMUEL 13 - Chang Naga bible

2 SAMUEL 13

¹Tou Dawideibü shou Absalomeibü na saomaibü yaksa che Tamar nyenan kikei, hoba Dawideibü shou Amnonei sao sanoukei.

²Hobaje na Tamar shanga Amnon aeibou maangdühko khei hao shatkei, aieilausi sao saosüngbü medei che kikei, hoba sao shanga denche ongkei kümla Amnon shanga seka dogo chühenkei.

³Lausikei Amnoneibü thangbou che kikei, aoeibü nyen Jonadab, Dawideibü na Shemeaeibü shou kikei, hoba Jonadab aeibou maanglimaangsang müt che kikei.

⁴Hobaje haoei hao to laukei, “O Choba shou, no aila hai chalou angboua shena lengan ong kida? Nyi alenlep lo?” Hobaje Amnonei hao to laukei, “Ngei küjai Absalomeibü na, Tamar sanouda.”

⁵Hobaje Jonadabei hao to laukei, “No shena lengan kiteishi, no lolo shatbü neinoushi, hoba ladang kabou no chühla loulaje, hao to lenshi, ‘Sanoudambo küna Tamar loutishi, hoba kü junga shausiyung lamletishi, khünei ngei kho haplabü hoba saoeibü ik ka ngei kho shaula thüklabü.’ ”

⁶Kho tegü Amnon lengan kikei, hoba hao lolo shatbü neinoukei; hoba ladang Choba kho hao to chühla loukei, Amnonei Choba to laukei, “Sanoudambo küna Tamar loutishi, hoba saoeibü ik ka ngei shaulabü lele kü junga wentek penyi kümtishi.”

⁷Hibü Dawidei ngüh hautiko Tamar to hai lentikei, “Kajai Amnon jungto tou hauashi, hoba hao la shausiyung lamlekushi.”

⁸Hobaje Tamar haojai Amnon chem to haukei, hoba hao shena lengan kikei. Hobaje saoei wen sungan kho nyatnyinkei, hoba hao thedanga wentek kümbei, hoba wentek kho ngoukei.

⁹Hobaje saoei wentek ngoubü chak kho sungbakei hoba hao junga kho sungatkei, lausikei haoei teshauko dogo laukei. Hobaje Amnonei laukei, “Müt pendou kü jungka lintiashi,” hoba haoen pendou hao jungka satkei.

¹⁰Hobaje Amnonei Tamar to laukei, “Shausiyung kho pobchem to shemjang to sungbakushi, ngei kaibü ik ka shaulabü.” Hobaje Tamarei saoei kümbü wentek kho sungan jai Amnoneibü popchem to khübü kho jungan atkei.

¹¹Hobaje ladang saoei khübü kho hao la shaula nyangko sungbakei haoei sao hatlepbei hoba sao to laukei, “Küna, kaiya hoba kü yoa yepashi.”

¹²Hobaje saoei hao to jong- aikei, “Ü, ajai, ngo khontesakti; aieilausi Israela ho tegübü aikei akümjan; ho hatlamoklabü kümsilei, nyi ngoubüloubü kümsilei ho hai akümjan.

¹³Hobaje kü shangakei, ngeibü himou ngei lato künlangla? Hobaje ka shangakei Israela ngoubü yoa che yeilabü. Tou khoei ngei ka to sudajada, Choba to joyoashi, aishanga haoei ka ka asenetlabü.”

¹⁴Lausikei haoei saoeibü ngüha ale, lausi sao toje hau kibou yingsije haoei sao shanglepbei hoba sao to yepbei.

¹⁵Kho phaiaje Amnonei sao yongko mangsenkei; aieilausi mangsenbü kho aeiche, khei haoei sao sanouko kibü toje aei yaangbouei mangsenkei. Hobaje Amnonei laukei, “Meimeian satashi!”

¹⁶Hobaje saoei hao to laukei, “Ü, aieilausi ngo sattilabü shedbü yaangbou kho nyi kü to kümbü ho to amaibou ki.” Lausikei haoei sao to ngüha ale.

¹⁷Kheijinei hao khangenbü sambü shuong haoei hao jungto ngakei hoba laukei, “Ho yaksa kü jungka leian satashi, sao phaito kou khinngaiashi.”

¹⁸Saoeibü neisimei son phang phang kakbü kikei, aieilausi kheibü kho Chobaeibü saosüng medei shuongeibü hele kikei. Kheijinei haoeibü sambüei sao leian longkei, hoba sao phaito kou khinkei.

¹⁹Hobaje Tamarei saoeibü khua tap naangkei, son phang phanga kibü saoeibü neisimei jitnyinkei hoba saoeibü ik saoeibü khua shenan sao haujinei ngüh yaangei haapbo jembü lam to ngaikei.

²⁰Hobaje jai Absalomei sao to laukei, “Kajai Amnon ka jungto loukei sai? Lausikei tou, küna, küpjembo kishi, hao kajai, hao khulimbo ka maangpona shatko tedam.” Hibü jai Absalomeibü chema phopan kikei.

²¹Ladang Dawid Chobaei habü pendou ditkei, hao aeibou khauangkei.

²²Absalomei maibükei amaibükei ajoyo; aieilausi Absalomei Amnon to mangsenkei, aishanga haona Tamar to ik shatkei.

²³Po nyi kian phaia Efraim nyangko kibü Baal Hazora Absalomeibü sanlon wi kipbü shuong kikei, hoba Absalomei Chobaeibü shousi shuong pendou ngakei.

²⁴Hobaje Absalom Choba jungto loukei, hoba laukei, “Tou chühashi, kaibü sambü san wi kipbü to sanoudambo Choba hoba haoeibü sambü shuong kaibü sambü yoa haula sakkubüma?”

²⁵Hobaje Chobaei Absalom to laukei, “Aying kü shou ka shanga onat yeibüla sen pendouje tohaukho.” Hobaje haoei hao to aeibou sukeijakei, lausikei hao ohau, kheiyingsikei hao haükukei.

²⁶Kheijinei Absalomei laukei, “Khei ayinglonga ngei ka to sudajada, küna Amnon kü yoa hautishi.” Hobaje Chobaei hao to laukei, “Aila hao kayoa haula?”

²⁷Lausikei Absalomei aeibou susijasije haoei Ammon hoba Chobaeibü shou pendou yoan hautikei.

²⁸Hobaje Absalomei haoeibü sambü shuong la sakkuko laukei, “Amnoneibü maangpon ihei olinbü chühenshi, hoba ladang ngei kan to Amnon haitiashi, dogo lenlaje, kheijinei hao haitiashi.”

²⁹Hobaje Absalomeibü sambü shuongei Amnon to Absalomei sakkubü tegü kümbei. Kheijinei Chobaeibü shousi shuong pendou meimeikei, hoba mütpem weko lulueibü gadua setan satkei.

³⁰Hobaje haoen lama kijinei Dawid jungto ngühlang louan laukei, “Absalomei Chobaeibü shousi pendou haitia hoba haoen che ongkei ajoukei!”

³¹Kheijinei Choba loenkei, hoba haoeibü nei jitnyinkei, hoba kaoa leketkei, hoba sambü shuong pendou neisimei jitnyinko hao nyangko lokei.

³²Lausikei Dawideibü na Shemeaeibü shou Jonadabei jong- aiko laukei, “Ngeibü bunyubouei Chobaeibü shou heshou pendou haitikei dogo tedam; aieilausi Amnon ong haia; aishanga haoei na Tamar shatibü chalou ka ho Absalom sembungei maang angenan kümbü ki.

³³Hibü ngeibü bunyu Chobaei jembü maangpon to atan Chobaeibü shousi pendou haikei dogo tedam; aieilausi Amnon ong haikei.”

³⁴Kheijineitham Absalom hatla satkei, hoba thoan chühko kibü heshoubou khoei haoeibü nyeklang khapetnyu tangko chühkei, hoba chühashi, shongh ae lam khüto hao phaito müt juong loukei.

³⁵Hobaje Jonadabei Choba to laukei, “Chühashi, Chobaeibü shousi shuong louakei, kaibü sambouei laubü tegü haüthüka.”

³⁶Hobaje haoei joyokhümbüyam, chühashi, Chobaeibü shousi shuong loukei, hoba haoen ngüh longko haapbei.

³⁷Lausikei Absalom satkei hoba Geshurbü Choba Ammihureibü shou Talmai jungto haukei. Hobaje Dawidei hao shou shanga chalou angboua haapbei.

³⁸Hibü Absalom satkei hoba Geshur to haukei, hoba khünei po sem kikei.

³⁹Hobaje Dawid Chobaei soushoua Absalom jungto haula haiyeiko kikei, aieilausi Amnon shangaje hao haian apsije hao maang thonan kikei.