Read Chang Naga 2 SAMUEL 14 Bible Online

2 SAMUEL 14 - Chang Naga bible

2 SAMUEL 14

¹Tou Zeruiaeibü shou Joabei Chobaeibü maangpon Absalom aei sepeiakei dogo chühenkei.

²Hibü Joab Tekoa to haukei, hoba khüka yaksa che leian loukei, hoba sao to laukei, “Ngei ka to sudajada, no lolo manghaapbü neinouashi, hoba manghaapbü neisimei leashi, hoba nyi onang tenaang lausikei jih lounyu haibü shanga mang haapbo kibü yaksa che tegü kishi;

³hoba Choba jungto atshi, hoba hao to ho tegü joyoshi.” Hibü Joabei saoeibü sembunga khübü ngüh jinkukei.

⁴Hobaje ladang Tekoa sao khoei Choba to joyokei, saoei saoeibü thenyek kaoei khüpjung atan souhat lenkei, hoba laukei, “Thuikai, O Choba.”

⁵Hobaje Chobaei sao to laukei, “No aiei khonsaktida?” Hobaje saoei jongaikei, “Ngo latnyu che ki hoba kü lao haia.

⁶Hobaje kaibü samnyueibü bousushou mütnyi kibü haosi ham khongthua oyokei hoba haoen pankulabü ao akitei, lausikei cheei che to ngümbei hoba haosi yoa cheei che kho haitikei.

⁷Hobaje chühashi, khümbo kaibü samnyu khulimbo longa, hoba haoenei laukei, ‘Na haibou kho khümbo kuashi, khünei na ao haoei haitikei haoeibü langkei shanga künei hao haitilabü hoba kho tegü phetphanbü kei mautilabü;’ kho tegü ngeibü wankak yasebü haoenei jonnyetkulabü hoba ngeibü lao la kaodaka nyen ayingsi joubü aphokulabü.”

⁸Hobaje Chobaei yaksanyu to laukei, “Kan chem to ngaiashi hoba ngei ka shanga ngühkhüm kulabü.”

⁹Hobaje yaksanyu khoei Choba to laukei, “Ngeibü BUNYUBOU, O Choba, shedbü kho kü thüka hoba küboueibü chemdang thüka kitishi; hoba Choba si haoeibü Choba setshangje shedbü akiko kishi.”

¹⁰Hobaje Chobaei laukei, “Atei ka to denche laualonga, hao kü jungto leian kai, hoba haoei ka to nyibou ladangkei ameitilabü.”

¹¹Kheijinei saoei laukei, “Sanoudambo Chobaei BUNYUBOU kaibü Mühghaü la sii phoklambüei touje ühaitilabü, hoba ngeibü shou amautila damentishima.” Hobaje haoei laukei, “BUNYUBOU lang kisije kashou khulou pem che ongkei kaoa üatlabü.”

¹²Kheijinei yaksanyuei laukei, “Kaibü samnyu la ngeibü bunyu Chobala ngüh che lentishi.” Hobaje haoei laukei, “Lenashi.”

¹³Hobaje yaksanyuei laukei, “Aila khülonga ho tegü Mühghaüeibü mütli shanga huon amaibü takda? aieilausi Chobaei haoei shian sattibü nyibou chem to aleingaisije ho tegü laubüei Choba khokei shedbü kakbü che tegü ki.

¹⁴Aishanga kün pendou haiphang, hoba kaoa dei jonan apbü nyibou mokngaila amaibü che tegü ki, ayingsi Mühghaüei langkei alangda, lausikei ao shian sattian ki hao ka inletbü shuong che ayingla shanga huon takda.

¹⁵Tou khei yingsije ngeibü bunyu Choba to ho ngühei joyola ngo loukei, aieilausi mütshuongei ngo hattikei, hoba kaibü samnyuei maanglem phoan, ngei Choba to joyosi aingenyu Chobaei haoeibü sambüei subüjabü kümbula thükkei.

¹⁶Aishanga Chobaei ditlabü hoba haoeneibü sambü kho müt aoei ngo hoba ngeibü shou Mühghaüeibü phetphan ka mautilabü ki, hao ik ka püetlabü.

¹⁷Hobaje kaibü samnyuei dambei, ‘Ngeibü bunyu Choba ngühei ngo haksoa phokulabü,’ aishanga ngeibü bunyu Choba kho maibü amaibü lenenbü Mühghaü hangangbü phatko ki. BUNYUBOU kaibü Mühghaü ka yoa kishima.”

¹⁸Kheijinei Chobaei yaksanyu to jongaikei, “Ngei ka to phebü aikei kü ka huan tepho.” Hobaje yaksanyu khoei laukei, “Tou ngeibü BUNYUBOU Chobaei joyoshima.”

¹⁹Hobaje Chobaei laukei, “Ho pendoua Joab ik atan kikei, lo?” Hobaje yaksanyu khoei jongaikei, “No kishongko aoeikei ngeibü bunyu Chobaeibü mae ik ka nanae aeto sepeila athük, aishanga kaibü sambou Joabei kü la sakkuko laubü ki; habü ngüh pendou kaibü samnyu sembunga haoei jinkukei.

²⁰Lausikei kümsilei jaksheitila shanga kaibü sambou Joabei kümbei hoba kaodaka kümsilei pendou ngela Mühghaü hangangbü songsido kibü phatko ngeibü bunyubou songeidoei keibü ki.”

²¹Hobaje Chobaei Joab to laukei, “Tou chühashi, ngei ho sakkua, hauashi, heshoubou Absalom nyibou leian kai.”

²²Hobaje Joab kaoa khüpetkei, hoba souhat lenkei, hoba Choba kho haükukei, hoba Joabei laukei, “Chobaei haoeibü sambüeibü subüjabü sakkusije tat kaibü sambouei, O ngeibü bunyubou Choba, ka thedanga ngei onou hapa dogo ngeda.”

²³Hibü Joab meimeian Geshon to haukei hoba Absalom Jerusalem to leian loukei.

²⁴Hobaje Chobaei laukei, “Hao haoeibü chem to ngaitiashi, lausikei hao la kü thenyek tehüpti.” Hobaje Absalom haoeibü chem to ngaikei, hoba Chobaeibü thenyek ühüp.

²⁵Tou Israel pendoua Absalom tegü hao hemaisaomaibü aeibou sanglabü lele lubü akitei; haoeibü youdem ka haoeibü khunyuyo sühko chühenlabü akitei.

²⁶Hobaje haoei ladang haoeibü khu shukei, aieilausi po thonbü weko haoei khu shuko kikei, aishanga hao to khulou kho shangtüngtham kijinei haoei shuan apbo lekei, hoba haoei haoeibü khua khulou kho takanchühkei; Chobaeibü seret hauanchühbüei shekel saoan onkei.

²⁷Hobaje Absalom la shousi bousushou sem hoba yaksashou che bukkukei. Yaksanyueibü nyen Tamar, sao hemaisaomai yaksa che kiteikei.

²⁸Hobaje Absalom Jerusalema po nyi onko kikei, hoba haoei Chobaeibü thenyek ühüp.

²⁹Kheijinei Absalomei hao Choba jungto hautila Joab ngala hautikei, lausikei haoei hao jungto alou hoba haoei nyibou hautikei lausikei hao alou.

³⁰Hibü haoei haoeibü sambü shuong to laukei, “Chühashi, Joabeibü sek ngeibü sek nyangko kia khünei haoeibü barli youshou sek kia; hoba hauan khünei wan sapshi.” Hobaje Absalomeibü sambü shuongei seka wan sapbukei.

³¹Kheijinei Joab meimeikei hoba Absalom jungto haoeibü chem to loukei, hoba hao to laukei, “Aila kaibü sambü shuongei ngeibü seka wan jinkukei?”

³²Hobaje Absalomei Joab to jongaikei. “Chühashi, aila ngo Geshur ka loukei? Kü shanga khünei ong toukei kibü maibou yinglabü dogo phela shanga no Choba jungto hautila hato kaiya dogo ka jungto ngüh hautikei. Tou khei yingsije ngo Choba jungto hautishi, hoba kü to shedbü kisi haoei ngo haitishi.”

³³Kheijinei Joab Choba jungto haukei, hoba hao to laukei, hoba haoei Absalom ngakei. Hibü hao Choba jungto loukei, hoba Choba thedanga kaoa khüpetkei, hoba Chobaei Absalom to sembung shepbei.