Read Chang Naga 2 SAMUEL 15 Bible Online

2 SAMUEL 15 - Chang Naga bible

2 SAMUEL 15

¹Kho phaia Absalomei hao shanga kailong che hoba koli shuong hoba hao thedanga laangla müt anjineisem lamlekei.

²Hobaje Absalom tongde pikei, hoba bakhün koukhün naphei nei loko lekei, hoba müt at Choba jungto matjemla shanga matsisangh at kijinei Absalomei hao ngalabü hoba laulabü, “No laobou sangnyu ka?” Hobaje ladang haoei, “Kaibü sambou, Israela ho sangnyu, hoba kho sangnyu ka” dogo laulaje,

³Absalomei hao to lenlabü, “Chühashi, nyi hibü kho maibü hoba tükde ong; lausikei kaibü ngüh ditkula Chobaei aokei ohautikei.”

⁴Toukei Absalomei laukei, “Kaonyeka matjembou kho ngo che yinga tegüje khei ngühsidei kibü müt weko kü jungto louan ngei hao la ngühmai ngüh matjem kukhoulabü.”

⁵Hobaje ladang ong müt atei hao la souhat kula nyangko loukei, haoei jembü ik longan hao to hatlepan hao to sembung shepbei.

⁶Kho tegü Absalomei Choba jungto matjemla loubü Israelbü pendou to kümbei; kho tegü Absalomei Israelbü maangpon suletkei.

⁷Hobaje po leiboubü thonlama Absalomei Choba to laukei, “Ngei ka to sudajada, Hebrona ngei BUNYUBOU to ai theletkei, ngei theletbü kula ngo hautiashi.

⁸Aishanga kaibü sambouei Geshura kijinei Siriaa theletbü che theletkei hoba laukei, ‘Maimaitham BUNYUBOUei ngo Jerusalem to leibaa longa kheijinei BUNYUBOU khangenlabü.’ ”

⁹Hobaje Chobaei hao to laukei, “Sangmaia hauashi.” Hibü hao meimeikei hoba Hebron to haukei.

¹⁰Lausikei Absalomei Israel pendou aeto shuchühbü hautiko laukei. “Kanei teklaang ngühlang ditsilengko, ‘Absalom Hebrona Choba ki!’ dogo kanei laulabü.”

¹¹Hobaje Absalom yoa Jerusalem ka chibü müt saoan haukei, hoba haoenei lansanbüei haukei, hoba haoenei aikei angekei.

¹²Hobaje ladang Absalomei haitibü lembü kuko kitoua haoei Dawid la songsido kubou haoeibü sangnyu Gilo ka Gilobü Ahithofel ngala hautikei. Hobaje khulimbo huontakbü kho hau kian apbei, hoba Absalom yoa müt ae ae haakei.

¹³Hobaje ngühlang künbü che Dawid jungto louan laukei, “Israelbüeibü maangpon Absalom phaito hauan apa.”

¹⁴Kheijinei Jerusalema hao yoa kibü haoeibü sambü shuong to haoei laukei, “Meimeiashi hoba sen satkho, khei ayinglonga sen shanga Absalom ka satenshang aki, haoei sen tongde laphetbüla, hoba sen thüka amaibüei sühbüla hoba inei sangnyu to wapbula hali hauashi.”

¹⁵Hobaje Chobaeibü sambü shuongei Choba to laukei, “Chüh- ashi, ngeibü bunyuei ai janenda kho kümla kaibü sambü shuong lamleakei.”

¹⁶Hibü Choba hoba hao phainei haoeibü chemdang pendou haukei. Hobaje Chobaei chem lomla thangnyu müt an apyokei.

¹⁷Hobaje Choba kho hoba hao phainei haoeibü chemdang pendou haukei, hoba chem thonbüa haoen otkei.

¹⁸Hobaje haoeibü sambü pendou hao nyangko danjung haukei; hoba Keretbü pendou hoba Peletbü pendou, hoba Gat ka hao phainei sembü saongaolak pendou kho Choba thedang to danjung haukei.

¹⁹Kheijinei Chobaei Gitbü Ittai to laukei, “No kün yoa aila hauda? Sepeinyu ngaiashi, hoba Choba yoa kishi, aishanga noje küksithangbü, hoba kaibü kaodak ka shian sattibü che ki.

²⁰No miet ong loukei, hoba ngokei laeto haudaje angenyu kisi tat ngei kün yoa shoongaitilep lo? Sepeinyu ngaia, hoba ka yoa kaibü jaisinasi shuong leian hauashi, hoba BUNYUBOUei ka to üeisanou hoba maanglemenbü lenshima.”

²¹Lausikei Ittaiei Choba to jongaikei, “BUNYUBOU lang kisije hoba ngeibü bunyubou lang kisije, ngeibü bunyubou lanei ong kilaje, haila shanga yingsikei, ayingsi langkei shanga yingsikei, khünei kaibü sambükei kilabü.”

²²Hobaje Dawidei Ittai to laukei, “Khülonga hauashi, danjung hauashi.” Hibü Gitbü Ittai danjung haukei, hao yoa kibü haoen müt pendou yoa hoba hanbü shuong pendou yoan haukei.

²³Hobaje kaonyek pendouei müt pendou danjung haujinei kaangko haapbei, hoba Chobaei Kidron shushou danjung haukei, hoba müt pendou yam aeto danjung haukei.

²⁴Hobaje Abiathar angkei hoba chühashi, tokei Zadok loukei, Levibü pendou yoa Mühghaü Ngühkhüm Busen sungbakei, hoba sangnyu ka mütshuong adankhüm shongko haoenei Mühghaüeibü Busen kho phokei.

²⁵Kheijinei Chobaei Zadok to laukei, “Mühghaüeibü Busen kho sangnyu to künan atngaiashi. Mühghaü thedanga ngei onou hapsije haoei ngo leingaibalabü; hoba ngei ho hoba hao kishang ham hapmailabü.

²⁶Lausikei haoei kü to, ‘Ngeibü olinbü ka to aki,’ dogo laualonga, chühashi, ngo hanei kia, hao thedanga ai maikeije kho kü to kümshima.”

²⁷Tokei Chobaei Zadok ungshedbou to laukei, “Chühashi, no hoba Abiathar; kasieibü shounyi, Ahimaaz si Abiathareibü shou Jonathan yoa sangmaia sangnyu to ngaiashi.

²⁸Chühashi, yamlamang pholia ka ka kü la ngetilabü ngüh alou shongko haiteishi.”

²⁹Hibü Zadok si Abiathar hamei Mühghaüeibü Busen kho Jerusalem to künan ngaikei, hoba haoen khünei kikei.

³⁰Lausikei Dawid Oliv shongh to angkei, hoba haujinei haapbo you kong hoba haoeibü khu yuklepan haukei, hoba hao yoa kibü müt pendouei haoeneibü khu yuklepbei hoba haoen haujinei haapbo angkei.

³¹Hobaje Dawid to, “Absalom yoa huon amaibü takbü yoa Ahithofel yoakei” dogo ngetikei. Hobaje Dawidei laukei, “O BUNYUBOU, ngei ka to sudajada, Ahithofel huonsiyou kho ngoubüla yeitishima!”

³²Ladang Dawid shongh khu Mühghaü lemshang khüto loukei, chühashi, Arkbü Hushai haoeibü mangyuk jitnyinan hoba haoeibü khua tham naangan loukei.

³³Dawidei hao to laukei, “No kü yoa haualonga no kü shanga onat che yinglabü.

³⁴Lausikei no sangnyu to ngaialonga, hoba Absalom to, ‘O Choba, ngo kaibü sambüla lelabü; shangied ngo kaboueibü sambü kikei, hibü tou ngo kaibü sambü yeilabü,’ dogo laualonga kheijinei nyi kü shanga Ahithofel lamthen thüka thük haplabü.

³⁵Zadok si Abiathar ungshedbou nyi ka yoa aki lo? Hibü nyi Chobaeibü chem ka aiong ditlaje, kho Zadok si Abiathar ungshedbou to lenshi.

³⁶Chühashi, haosieibü shounyi haosi yoa khünei kia. Ahimaaz, Zadokeibü shou hoba Jonathan, Abiathareibü shou, hoba haoen danko nyi aiong ditlaje kü la lenlabü.”

³⁷Hibü Dawideibü thangbou Hushai, sangnyu khüto Absalom Jerusalem to longeian kijinei loukei.