Read Chang Naga 2 SAMUEL 16 Bible Online

2 SAMUEL 16 - Chang Naga bible

2 SAMUEL 16

¹Ladang Dawidei shongh khu kho hansho limjung haukei, Mefibosheteibü sambü Ziba, hao shuokla gadu tang dang yi setshang yoan, wentek ontoubü saoan, semlüh hek shen saongao, buhekdeihek saongao hoba ih shongmok che sungbakei.

²Hobaje Chobaei Ziba to laukei, “Nyi aila habü ho sungbakei?” Zibaei jongaikei, “Gadu shuong kho Chobaeibü chemdang setla shanga, wentek si buhekdeihek kho heshou shuongei shaula shanga, hoba ih kho aoyou yama hüla manglaje khübüei yungla shanga.”

³Hobaje Chobaei laukei, “Hobaje kaibü bunyuboueibü shou lanei ki?” Zibaei Choba to laukei, “Chühashi, hao Jerusalema kida, aieilausi haoei laukei, ‘Tat Israelbüei küboueibü sangle kü la kungailabü.’”

⁴Kheijinei Chobaei Ziba to laukei, “Chühashi, Mefiboshet shangabü pendou kho ka shangabü ki.” Hobaje Zibaei laukei, “Ngei souhat lenda, ka thedanga ngei ponpen onou haptishima, ngeibü bunyu Choba.”

⁵Ladang Dawid Choba Bahu- rim to loukei, Sauleibü chem ka Geraeibü shou Shimei nyenbü chempen che longkei; hoba Dawid loujinei haoei athakko khükkei- uokkei.

⁶Hobaje haoei Dawid to laangei tetkei, hoba Dawideibü sambü pendou to tetkei hoba pendou, hoba hau kibü müt pendou haoeibü nanae si maeae ik hama kikei.

⁷Hobaje Shimeiei haoei khükjiuokjinei laukei, “Satashi, satashi, no sii angtibü müt, jim akibü müt!

⁸Saul, aoeibü setshanga nyi songdakda, haoeibü chemdang sii phinbü pendou ka thükto BUNYUBOUei phok lama hoba BUNYUBOUei sangle kho kaibü shou Absalom ik to kua. Chühashi, kongbü maubü ka thüka kia, aieilausi no sii angtibü müt ki.”

⁹Kheijinei Zeruiaeibü shou Abishaiei Choba to laukei, “Aila ho kei haibü haoei bunyu to khükdauokda? Ngo angan haoeibü khu thetakho.”

¹⁰Hobaje Chobaei laukei, “Kan Zeruiaeibü shousi shuong, kan yoa ngei ai kümla? BUNYUBOUei hao to lenbü shanga haoei khükdauokda yingalonga Dawid to khüktiuoktishi, khei yingalonga nyi aila hai kümbei, dogo aoei laula?”

¹¹Hobaje Dawidei Abishai hoba haoeibü sambü shuong pendou to laukei, “Chühashi, kü shou ao ngeibü shimung ka loukei, haoei ngeibü langkei lamda; ho Benjaminbü hoei tou latetche aei kümla athükla! Hao khei phokushi, hoba hao la khüktiuoktiashi. Aishanga BUNYUBOUei hao la sakkukei.

¹²Aingenyu BUNYUBOUei ngeibü khonsak thükto chühlabü, hoba tat kü to khükbüuokbü shanga BUNYUBOUei maibüei kü la kungaila thükkei.”

¹³Hibü Dawid hoba hao mütshuong lama haujinei, shongh naphei thito Shimei haukei hoba hao haujinei khükkeiuokkei, hoba hao to laangei tetkei hoba odsinot phinan jinkukei.

¹⁴Hobaje Choba hoba hao yoa kibü mütshuong pendou maang ngainsheman Jordan sühkei, hoba khünei hao lolo haksomang maikei.

¹⁵Absalom hoba müt pendou Israelbü mütshuong, hoba hao yoa Ahithofel Jerusalem to loukei.

¹⁶Hobaje ladang Arkbü Hushai, Dawideibü maangjam thangbou, Absalom jungto loukei, hoba Hushaiei Absalom to laukei, “Choba salangko kishi! Salangko kishi!”

¹⁷Hobaje Absalomei Hushai to laukei, “Ho ka thangbou to kaibü sanou sai? Aila no kathangbou phaito ohau?”

¹⁸Hobaje Hushaiei Absalom to laukei, “Aying, lausikei BUNYUBOUei ao hoba habü mütli hoba Israelbü pendouei pienkei, ngo hao shangabü yinglabü, hoba hao yoa ngo kilabü.

¹⁹Hobaje nyibou ngei aoto khangenla hao shou thedanga ngei akhangenlep lo? Ngei kabou yoa khangenbü tegütham, ka junga ngo kilabü.”

²⁰Kheijinei Absalomei Ahithofel to laukei, “Kaibü dambü lenshi, senei ai kümla?”

²¹Hobaje Ahithofelei Absalom to laukei, “Kaboueibü thangnyu aoyou haoei apyokei haoen jungto atshi, hoba Israelbü pendouei no kabou to khüpyoda dogo ditlabü, hoba ka yoa kibü pendoueibü ik hau kiko yeilabü.”

²²Hibü haoenei Absalom shanga chemdaka nei- chem dangkei, hoba Absalomei Israelbü pendou thedanga hao boueibü thangnyu shuong jungto atkei.

²³Hobaje khübü chaloua Ahithofelei kubü ngüh khoje Mühghaü to theyoko joyobü tegü kikei. Kho tegü Dawid si Absalom haosi hamei Ahithofeleibü ngüh kho weeiko kikei.