Read Chang Naga 2 SAMUEL 21 Bible Online

2 SAMUEL 21 - Chang Naga bible

2 SAMUEL 21

¹Tou Dawid songdak haanga po che phaia che dogo mühsinou po sem kikei, hoba Dawidei BUNYUBOU thenyek lambei. Hobaje BUNYUBOUei laukei, “Ho Saul shangabü hoba sii angtibü danshuong shangbü ki, aieilausi haoei Gibeonbü haitikei.”

²Hobaje Chobaei Gibeonbü ngakei hoba haoen to laukei, (Tou Gibeonbü kho Israel shousi aying, lausikei Amorbü joubü shuong ki; hoba Israel shousi shuongei ik ashatla theyolanyosi dogokei, Saulei Israel si Jihudabü shanga dambüei haoen haitila lambei.)

³Hobaje Dawidei Gibeonbü to laukei, “Kan shanga ngei ai kümla? Kanei BUNYUBOUeibü phet haütila ngei lai paplepbü longtila?”

⁴Gibeonbüei hao to jongaiko laukei, “Kün si Saul ayingsi haoeneibü chemdang kanglanga chandinam ayingsi hon shanga aying; ayingsi Israela müt at ongkei haitilabü kho kün shanga aying.” Hobaje haoei laukei, “Kan shanga ngei ai kümla lenda?”

⁵Haoenei Choba to laukei, “Aoei kün suikei hoba kün mautila huon takkei hoba Israelbü leilang pendoua kün kishang akiko kila huongkei,

⁶khei haoeibü shousi müt nyet kho künla labü, khünei künei BUNYUBOU thedanga Gibeona BUNYUBOU shongha künei haoen phenetnyu haitila thükkei.” Hobaje Chobaei laukei, “Ngei haoen kulabü.”

⁷Lausikei Chobaei BUNYUBOUeibü theyolanyobü haoen kanglanga Dawid si Sauleibü shou Jonathan kanglanga kibü haangjung Mefiboshet langkei püetkei.

⁸Aiaeibü nouyangshou Rizpa, saoeibü shounyi kho Armoni hoba Mefiboshet, aoyou saoei Saul la bukkukei hoba Sauleibü nou- yangshou Merabeibü shousi müt ngao, aoyou saoei Meholatbü Barzillaieibü shou Adriel la bukkukei, haoen Chobaei lekei.

⁹Hobaje haoei haoen Gibeonbü ika kukei, hoba haoenei haoen BUNYUBOU thedanga shongha phenetnyu haitikei, hoba haoen müt nyet liko maukei. Youlat jih shaangboua barli youshou latbü khanglamto haoen haitikei.

¹⁰Kheijinei Aiaeibü nouyangshou Rizpaei senounei sungbakei hoba youlat jih ka khangan mühka haoen thükto langh alot shongko kho sao shanga laanga imtian phokei hoba khübü thükto mühkabü aushuong chaloua loula saoei asakku, ayingsi yamkabü meisiau shuongkei nangnak alouti.

¹¹Ladang Sauleibü thangnyu Aiaeibü nouyangshou Rizpaei ai kümbei kho Dawid la ngetikei.

¹²Dawid haukei hoba Jabesh- Gileadbü mütshuong ka Sauleibü lo si haoshou Jonathaneibü lo sungbakei, hoba Filistiabü shuongei Giboaa Saul haitibü chaloua lan Filistiabü shuongei haoen haitikei, Bethshan khongnyu lambhek ka haoenei koklangan kikei.

¹³Hobaje khüka haoei Saul si haoshou Jonathaneibü lo sungjung angkei, hoba aoyou phenetnyu haitikei haoen nyeteibü lo haoenei yoshaikei.

¹⁴Hobaje haoenei Saul si haoshou Jonathan Zelaa Benjamin kaonyeka Sauleibü bou Kisheibü heea haoenei khünkei, hoba Chobaei sakkubü pendou haoenei kümbei; hoba kho phaia Mühghaüei kaonyekei subüjabü ditkukei.

¹⁵Filistiabüei nyibou Israelbü to wapyokei, hoba Dawid haoeibü khangenbü shuong yoa liko yankei, hoba Filistiabü khulimbo haoen jakkei, hoba Dawid hüan apbei.

¹⁶Hobaje Ishbibenob, mütlou mütyang shuong ka bakbü che aoeibü aubu seret hauanchühbü namkung shekel saongao sem kikei, hoba aoei in haanbü che shouan kikei, haoei Dawid haitila dambei.

¹⁷Lausikei Zeruiaeibü shou Abishaiei hao to thuila loukei hoba Filistia bou to wapyokei hoba hao haitikei. Kheijinei Dawideibü mütshuongei hao to sukeijakei, “Nyi Israelbüeibü hantin nyettikusi amaibüla no touje lason to ohaulabü.”

¹⁸Kho phaia toukei, Goba Filistiabü to nyibou wapyo kikei, kheijinei Saf, ao mütlou mütyang shuong ka bakbü kikei, hao Hushatbü Sibekaiei haitikei.

¹⁹Hobaje toukei Goba Filistiabü to nyibou wapyokei, hoba Bethlehembü Jaare-Oregimeibü shou Elhananei Gitbü Goliat haitikei, hoba haoeibü aubu kho neitakbüeibü jim che phatko kikei.

²⁰Hobaje toukei nyibou Gata wapyokei, khünei mütphon maibü müt che ik jijihama ikjishou lakbang hoba youakei youjishou lakbang pendouei saoto lei yeman kikei, hoba haokei mütlou mütyang shuong ka bakbü kikei.

²¹Hobaje ladang haoei Israel khulimbo huiletkei, Dawideibü na Shimeieibü shou Jonathanei hao haitikei.

²²Habü lei, Gata süngsilop yaangbü phang ka bakbü kikei hoba haoen Dawid khangenbü shuong ikto atkei.