Read Chang Naga 2 SAMUEL 22 Bible Online

2 SAMUEL 22 - Chang Naga bible

2 SAMUEL 22

¹Hobaje ladang BUNYUBOUei Dawid haoeibü dangbou ik pendou ka, hoba Saul ik ka khümenkei, khübü chisichia khünyet chalou Dawidei BUNYUBOU to joyoko chia laukei.

²Haoei laukei, BUNYUBOU kho ngeibü laang, hoba ngeibü lapheishon, hoba ngo khümenbou ki.

³Kü Mühghaü, ngeibü laang, ao to ngo satenda. Ngeibü aih hoba ngo khümenbü laang, ngeibü lapheishon hoba ngo satenshang. Ngo khümenbou, nyi ngo khonku ka khümenda.

⁴Ngei BUNYUBOU to ngakei, aoeibü nyensangla muan ki. Ngo dangbou shuong ka püetan kia!

⁵Hailabü deishouei ngo kailepan kikei. Mautilabü deishouei ngo moktikei!

⁶Sheol jolühei ngo shenlepbei, hailabü sungei ngo thangetkei.

⁷Ngo maangshata ngei BUNYUBOU to ngakei. Ngeibü Mühghaü to ngei ngekkei. Haoeibü lembü chem ka haoei kü ngüh ditkei; hoba ngei ngekbü haoeibü nou to loukei.

⁸Kheijinei kaodak nyaakkei hoba lühkei. Müh denshang topeikei hoba nyaakeikei, aieilausi hao khauangko kikei!

⁹Haoeibü kungkhün ka wankhük longkei. Wankak yasebü haoeibü sembung ka laakjung longkei.

¹⁰Haoei mühkei khüpettikei hoba louyankei; sangmei nakthühbü haoeibü you phanga kikei.

¹¹Hao kaakyembü kherabima setkei, hoba seengjung satkei, Hao yeieibü kaak thüka hapbei.

¹²Haoei müh kaijembo ngühlepbo nakthühbü deinyu shuong yoshaian, mühshuong sangmei shangbü kümbei.

¹³Hao thedanga jajalalabüei, wankaka wan longtikei.

¹⁴BUNYUBOUei müh ka langmak maaktikei; hoba Thükenbou Mühghaüei ngüh longtikei.

¹⁵Hobaje haoei laujin kipbei, hoba dangbou shuong lintikei; hoba haoeneibü lam yoongtikei.

¹⁶Kheijinei yungnyu maang kho tangto longkei. Kaodak denshang shuong khongthu la yeiko phaletham yeitilabü. BUNYUBOUei hakbüei haoeibü kungkhün hakhin thakthakbüei longkei.

¹⁷Thükkabou ka haoei yantikei, hoba haoei ngo baman sungkei, deinyu haübü ka haoei ngo yaüankei.

¹⁸Ngeibü dangbou hau kibü ka haoei ngo khümenkei; no mangsenbü shuong ka khümenkei; aieilausi haoen kü shanga yongko hau yaangbü kikei.

¹⁹Ngeibü thushed chaloua haoen kü thükto loukei; lausikei BUNYUBOU ngo kishanga kikei.

²⁰Hopabü kaoen che to toukei haoei ngo leian longkei; haoei ngo khümenkei aieilausi haoei kü to olinkei.

²¹Ngo saopobü thüng BUNYUBOUei kü la pailettikei; ngeibü ik sakteibü thüng haoei kü la pailetbü kukei.

²²Aieilausi ngo BUNYUBOUeibü lama paikei hoba ngeibü Mühghaü ka amaiko bangjung ohau.

²³Aishanga ngei haoeibü ngühkhüm pendou jungeikei, hoba haoei sakkubü ngühkhüm shuong ka ngo abang.

²⁴Ngo toukei hao thedanga shed ashonko kikei, hoba ngo shabü ka bangan kikei.

²⁵Hibü khoei BUNYUBOUei ngo saopobü thüng, hao thea ngo hinseian kibü thüng pailetbü kukei.

²⁶Üeisanou dambü to nyi no lolo üeisanou lenlabü, shedbü akibü müt to nyi no lolo shed akibü lenlabü.

²⁷Hinseibü shuong to nyi no lolo hinseibü lenlabü, lausikei kombünongbü shuong to nyi no lolo tangsheitham lenlabü.

²⁸Khonsak khonkubü shuong nyi khümenlabü, lausikei yonglam lilibü yantila kaibü nyek haoen thüka kia.

²⁹Aishanga no ngeibü hantin ki, O BUNYUBOU; hoba BUNYUBOUei ngeibü nakthüh ngesaktikulabü.

³⁰Haü, no danko ngei sepai tan nitnyintila thükkei, hoba ngeibü Mühghaü danko ngo kümthang thüka saiyeila thükkei.

³¹Mühghaü shangaje haoeibü lamnyu benbüsoubü; BUNYUBOUeibü ngüh takteian chüha; hao to maanglem phobü shuong shanga hao kho aih che ki.

³²BUNYUBOU to limbo Mühghaü ao ki? hoba seneibü Mühghaü to liman Laangnyu ao ki?

³³Mühghaü ngeibü kaangbüsekbü lapheishon ki; hoba ngeibü lamnyu maikeimainyu kümakei.

³⁴Haoei ngeibü you meishi saoen you phatko yeitikei hoba thükaenei suokbüa khümenan phokuda.

³⁵Wapyola shanga haoei ngo lenenda, hibü ngeibü ik phemei chinam lau bühenda.

³⁶Toukei nyi kaibü khümenbü aih kü la kua; hoba kaibü thuibüei ngo yaang yeitia.

³⁷Nyi kü phanga ngeibü younak ongatham yeitikei, hoba ngeibü you ashekti.

³⁸Ngei ngeibü dangbou shuong shijung haukei, hoba haoen mautikei; ayingsi haoen amaushongko ngo asepei.

³⁹Hobaje haoen apienlabü lele ngei haoen suia, hoba haoen aüan apa, haü, haoen ngeibü you phanga tuongan kia.

⁴⁰Aishanga lason shanga nyi kü la shembe kaangkhühtham shenkukei, aoyou kükhu limbo huongenkei, nyi haoen kü phanga nyemtikei.

⁴¹Kü to mangsenbü shuong ngei wapan apbula shanga, nyi tokei ngeibü dangbou shuong kü jungto haoeneibü shenjang thotikei.

⁴²Haoenei chühkei, lausikei khümenla ao akitei; haoenei BUNYUBOU to ngekkei, lausikei haoen to haoei ajongai.

⁴³Ngei haoen to thamngula yeiko ngümbei, khong kabü thime tegü ong ngei haoen hannyinkei hoba haoen lintikei.

⁴⁴Nyi toukei kü mütli oyophetyobü ka ngo khümenkei, nyi ngo phangshuongeibü khu lela phokukei; ngei angebü müt shuongei ngo khangenlabü.

⁴⁵Yenbou shuongei haoen lolo hehoat dogo ngüha lelabü, haoenei kü shanga ditsilengko haoenei kü to ngüha lelabü.

⁴⁶Küksithang shuong yuian aplabü, hoba haoen lolo haoen hushang ka longlabü.

⁴⁷BUNYUBOU lang kida; hoba ngeibü laang haülabou yingshi, hoba ngeibü khümenbü laang, ngeibü Mühghaü yaangentiashi.

⁴⁸Mühghaü aoei kü la phok lambuda, hoba kü phangto mütshuong lottida,

⁴⁹aoei ngeibü dangbou shuong ka leiyenkei, nyi khulimbü shuong thüka yaangentiko, hoba sekbülakbü müt ka ngo khümenda.

⁵⁰Hibü, O BUNYUBOU, phang shuong yoa ngei ka la nyensang kulabü, hoba ka nyen shanga nyensang chia laulabü.

⁵¹Haoeibü Choba la haoei thüksimin yaang hoba haoei naangenbou Dawid la, hoba haoeibü thensilen pendou shanga üeisanou lenda.