Read Chang Naga 2 SAMUEL 23 Bible Online

2 SAMUEL 23 - Chang Naga bible

2 SAMUEL 23

¹Tou habü ho Dawideibü thonbü ngüh shuong ki. Jesseeibü shou Dawidei laukei, ao thükaeto angtikei, haoei lauda; Jakobeibü Mühghaüei onang naangkuko pienbü, hoba Israel nyensang chia maibü lauda:

²“BUNYUBOUeibü soushouei ngo danko joyoda, hoba haoeibü ngüh ngeibü lishanga kikei.

³Israel Mühghaüei laukei, Israelbü laangei kü to joyokei; müt thüka ngühmaanglanko songdakbou kho, Mühghaü to souhatbüa songdakbou kho ki.

⁴Chanyu longjinei tegü hao ngeyang ngesak tegü kilabü, sangmei akibü ngeyang; kao ka sang longtibü lang phatko.

⁵Toukei Mühghaü yoa ngeibü chem khünei aki lo? Aishanga haoei thon akibü thebülanbü kü to kümakei, ajanjan pendoua yenetnyu hoba püetan ki. Aishanga haoei kü to thuibü hoba ngeibü maangdak pendou alongtilep lo?

⁶Lausikei Mühghaü to ühütbü müt pendou tekan apbü phatko ki; aieilausi haoeneibü ikei jungla athük.

⁷Lausikei haoen to meitibü mütei haoen lolo namkung hoba aubu jungda; hoba haoen kho haoen kishanga wanei lonan apda.”

⁸Habü ho Dawideibü sekbülakbü sepai shuong nyen: Josheb-bashebet Takemonbü che, kongnyubou sem yoa che kikei. Haoei saongao set khulimbo haoeibü aubu lepbei hoba chemala haitikei.

⁹Hobaje lakjaibü müt sem yoa hao to thenbou kho Ahohieibü shou Dodai, hao shou Eleazar kikei. Lason wapyola Filistiabü yoshaian kijinei hoba Israelbü kukjung satjinei hao hoba Dawidei haoen khulimbo thangetkei.

¹⁰Hao meimeikei hoba haoeibü ik anoushongko hoba ina haoeibü ik akhangyo shongko Filistiabü wapan attikei; hoba kho chaloua BUNYUBOUei thüksimin yaang haptikei hoba hao phainei müt haitibü shuong ka peisilei saüan chühla ong loukei.

¹¹Hobaje hao to thenbou kho Herarbü Ageeeibü shou Shamma kikei. Filistiabüei Lehia lentilei shenan kibü kaonyek chenei kiko yoshaikei hoba mütshuong kho Filistiabü to hatla satkei.

¹²Lausikei Shamma hao sekmang jenyua lokei hoba kho thangetkei, hoba Filistiabü haitikei, hoba BUNYUBOUei thüksimin yaang sungbakukei.

¹³Hobaje khuleibü müt khujin yoka müt sem yankei, hoba Adullam laangpoba Dawid jungto youlat jiha Filistiabü tan che Refaim yomanga shaian kibü to loukei.

¹⁴Kheijinei Dawid lapheishona kikei; hoba Filistiabü sepai tan Bethlehema kikei.

¹⁵Hobaje Dawidei chem waangko laukei, “O müt atei ongkei Bethlehem bakhün nyangko kabü deikhün khüka kü la yungla sungbakua ma!”

¹⁶Kheijinei lakjaibü müt semei Filistiabü shaishang to tujung atkei hoba bakhün nyangko kibü Bethlehembü deikhün kho ka khukei hoba kho Dawid jungto sungbakei. Lausikei haoei kho ka ayung, haoei kho BUNYUBOU la yeian jinkukei.

¹⁷Hobaje haoei laukei, “O BUNYUBOU, ngei ho akümenlabü lele kü jungka saako kuktishi. Aoyouei jembü langkei khümbo kua haoeneibü sii ngei yunglep lo?” Hibü khoei khüka haoei ayung. Lakjaibü müt sem khoei kho kümbei.

¹⁸Hobaje Zeruiaeibü shou Joabeibü na Abishai müt khujin yoa konglebou kikei. Hobaje haoei haoeibü aubu saongao sem thükto hinkei hoba haoen haitikei, hoba sem to limbo nyenhang che sungbakei.

¹⁹Khujin yoa hao sonenboutham kikei, hoba haoeneibü leiyeibou yeikei, lausikei haoei sem khoje aonlang.

²⁰Hobaje Jehoiadaeibü shou Benaia, Kabzeel ka maang kaangbü müt, kümsilei yaangbü che kikei; haoei Moaba Arieleibü shousishuong müt nyi haitikei. Haoei toukei louyenan ninthu lenan kibüa molosaonyu che püngkhüna haitikei.

²¹Hobaje haoei Ijepbü süngsilop maibü che haitikei. Ijepbü kho haoeibü ika aubu che kikei; lausikei Benaia ju che jungan yankei, hoba Ijepboueibü ik ka aubu kho sokei, hoba hao haoeibü aubuei suettikei.

²²Habü ho Jehoiadaeibü shou Benaiaei kümbei, hoba lakjaibou müt sem to limbo nyenhang sungbakei.

²³Khujin khotoje hao hangenbou kikei, lausikei haoei sem khoje aonlang. Hobaje Dawidei hao kho hao lombou la yeitikei.

²⁴Joabeibü na Asahel, khujin yoa che, Bethlehembü Dodo shou Elhanan.

²⁵Harod ka Shamma, Harod ka Elika.

²⁶Paltibü Helez, Tekoa ka Ikkesh shou Ira,

²⁷Anathot ka Abiezer, Hushatbü Mebunnai;

²⁸Ahohibü Zalmon, Netofabü Maharai

²⁹Netofa ka Baona shou Heleb, Benjaminbü Gibea ka Ribaieibü shou Ittai.

³⁰Pirathon ka Benaia, Gaash shumang ka Hiddai

³¹Arbathibü Abialbon, Bahurim ka Azmavet.

³²Shaalban ka Eliahba, Jashem shousi shuong.

³³Hararbü Shamma shou Jonathan Hararbü Sharareibü shou Ahiam,

³⁴Maakabü Ahasbaieibü shou Elifelet, Gilobü Ahithofeleibü shou Eliam.

³⁵Karmelbü Hezro, Arbibü Paarai;

³⁶Zoba ka Nathaneibü shou Igal, Hagri shou,

³⁷Ammonbü Zelek, Zeruiaeibü shou Joab insiaubu jungbou Beerot ka Naharai.

³⁸Ithribü Ira, Ithribü Gareb.

³⁹Hitbü Uria; pendouei khujinto nyet.