Read Chang Naga 2 SAMUEL 24 Bible Online

2 SAMUEL 24 - Chang Naga bible

2 SAMUEL 24

¹Hobaje BUNYUBOU Israel khulimbo khau angkei, hoba haoei haoen khulimbo Dawid thungeiko laukei, “Hauashi, Israel si Jihuda mütshang weanchüh- ashi.”

²Hibü Chobaei Joab to hoba hao yoa kibü sepai tan leiyeibü shuong to, “Israel chung pendou shoongko Dan ka Beersheba sühko haushi, hoba ngei mütshang lühbak ngela shanga weanchühashi.”

³Lausikei Joabei Choba to laukei, “BUNYUBOU kaibü Mühghaüei mütshuong wean chühtishima, haoen lajuche yingla yingsikei sao ngaoneikei haatishima, hoba ngeibü bunyu Choba nyekei kho haptishima; lausikei aila ngeibü bunyu Chobaei khünei olinla?”

⁴Lausikei Chobaeibü ngüh khoei Joab si sepai tan leiyeibü thüklangkei. Hibü Joab si sepai tan leiyeibü shuongei Choba thedang ka Israel mütshang wela haukei.

⁵Haoen Jordan dankei hoba Aroer ka khangkei hoba yomang jenyua kibü ka Gad aephei hoba Jezer aeto haukei.

⁶Haoei Gilead to loukei, hoba Hitbü kaodak Kadesh to loukei, hoba haoen Dan to loukei, hoba Dan ka haoen Sidon kaijembo to haukei.

⁷Hobaje Tur lapheishon ka Hiva hoba Kananbü sangnyu shuong to loukei, hoba Beershebaa Jihuda kabü Negeb to angkei.

⁸Kho tegü kaonyek pendou shoongko haoen haukei, lit gü hoba chalou saoche thonlama haoen Jerusalem to loukei.

⁹Hobaje Joabei Choba la müt yoshaibü lühbak kukei. Israela injung thükbü maangkaangbü hajar saongao set kikei, hoba Jihudaa müt hajar saongao ngao kikei.

¹⁰Lausikei Dawidei mütshuong weanchühan phaia haoeibü maangponei hao to lambei. Hobaje Dawidei BUNYUBOU to laukei. “Ngei ai kümbei khünei ngei shabü yaang shona; lausikei tou, O BUNYUBOU, ngei ka to sudajada, no khangenboueibü shedtiyatibü langbüma; aishanga ngei aeibou ngoualoua küma.”

¹¹Hobaje ladang Dawid ngeyang laksepbei BUNYUBOUeibü ngüh Dawideibü thuseibou Gad jungto louan laukei,

¹²“Hauashi, hoba Dawid to lenashi, BUNYUBOUei hai lauda: ‘Ngei ka la den sem tetkuda; khübü yoka che pienashi, khünei ngei ka to kho kümlabü.’ ”

¹³Hibü Gad Dawid Choba jungto haukei hoba hao la ngetikei, hoba hao to laukei, “Ngei kaonyeka mühsinou po nyet loutila sai? Ayingsi no kaibü dangbou shuongei shijinei lit sem hatla sateila? Ayingsi kaibü kaonyeka chalou sem shatlim longtila? Tou nyi damanchühashi, hoba ngei hautibou jungto ai jongaibü kula janthetashi.”

¹⁴Hobaje Dawidei Gad to laukei, “Ngo khonsak yaangbüa kia, sen BUNYUBOUeibü ik to atetkho; aieilausi haoeibü üeisanou yaang kia, hoba ngo müteibü ik to tüatkho.”

¹⁵Hibü ngeyang ka jih takletbü sühko BUNYUBOUei shatsinyat lim hautikei, hoba khünei Dan ka Beersheba sühko müt hajar anjinlei haikei.

¹⁶Hobaje ladang hangangbüei Jerusalem ae, shemtila shanga haoeibü ik shingkei, BUNYUBOUei amaibüka haoeibü maangpon senetkei hoba müt yoa shemtibou hangangbü to laukei, “Khoei soua! Khüae leshi.” Hobaje BUNYUBOU hangangbü kho Jebusbü Arauna amshang nyangko kikei.

¹⁷Kheijinei Dawidei BUNYUBOU to hao mütshuong shemtibou hangangbü kho hapan joyoko laukei, “Ditashi, ngei shed shona, ngei amaiko küma; lausikei habü sanshuongei haoenei ai kümbei? Sanoudambo kaibü ik kükhu limbo hoba kün chemdang thükto yingshima.”

¹⁸Hobaje khünyet kho Gad Dawid jungto loukei, hoba hao to laukei, “Angashi, Jebusbü Arauna amshang thüka lemshang che kümashi.”

¹⁹Hobaje Gadei lenbüa BUNYUBOUei sakkubü tegü Dawid angkei.

²⁰Hobaje Araunaei chühlitikei, hoba Choba hoba hao khangenbü shuong hao ae louko hapbei, hoba Arauna angkei, hoba Choba thedanga haoeibü thenyek kao ae yeian khüpetkei.

²¹Hobaje Araunaei laukei, “Ngeibü bunyubou Choba aila louda?” Hobaje Dawidei laukei, “BUNYUBOU to lemshang che kümla shanga ka ka amshang jeklabü hoba mütshuong ka shieikoe nangan aplabü.”

²²Hobaje Araunaei Dawid to laukei, “Ngeibü bunyu Chobaei hao thedanga ai maikei kho leashi hoba kuashi, juokbü lembü shanga masu hoba shaubü nakletbü peisilei shuong kho to chühashi;

²³ho pendou, Choba, Araunaei Choba la kuda.” Hobaje Araunaei Choba to laukei, “BUNYUBOU kaibü Mühghaüei no sungletshima.”

²⁴Hobaje Chobaei Arauna to laukei, “Aying, lausikei ngei kho ka ka munamei ong jeklabü; ayinglonga ngei munam akukoje BUNYUBOU ngeibü Mühghaü la juokbü lembü akulabü.” Hibü Dawidei amshang si masu shuong kho chandinam shekel anjinsemei jekkei.

²⁵Hobaje khünei Dawidei BUNYUBOU la lemshang che kümbukei, hoba juokbü lembü si sangmai lembü kukei. Hobaje kaonyek shanga BUNYUBOU suletkei hoba Israel ka shieikoe bangkei.