Read Chang Naga 2 SAMUEL 3 Bible Online

2 SAMUEL 3 - Chang Naga bible

2 SAMUEL 3

¹Tou Saul si Dawid chempen kanglanga wapyo lounyu kikei, hoba Dawid hau kibou yeikei, lausikei Sauleibü chem- pen hau akibou yeikei.

²Hobaje Hebrona Dawid la shousi shuong bukkukei; hoba haoeibü shou jaishoubou kho Amnon, Jezreelbü sao Ahinoameibü shou.

³Hobaje kho thenkabou kho Karmelbü Nabaleibü yak Abigail ka Kileab hoba semboubü, Geshurbü Choba Talmaieibü shou nouyangnyu Maakaeibü shou Absalom,

⁴hoba leiboubü Haggiteibü shou Adonija hoba ngaoboubü kho Abitaleibü shou Shefatia,

⁵hoba lakboubü Dawideibü yak Egla ka Ithream. Habü ho Hebrona Dawid la bukkukei.

⁶Sauleibü chemdang si Dawideibü chemdang kanglanga wapyo kibü jihsiphaia Sauleibü chung Abnerei hao lolo hau kingaikei.

⁷Tou Sauleibü thangnyu che Rizpa nyenan Aiaeibü nouyangnyu kikei, hoba Ishboshethei Abner to laukei, “Kü boueibü thangnyu jungto no aila haukei?”

⁸Kheijinei Ishboshetheibü ngüha Abner aeibou khauangkei hoba laukei, “Ngo Jihudabüeibü keieibü khu sai? Tat ngei Sauleibü chung, haoeibü jaisinasi hoba hao thangbou shuong to sanou lena, hoba Dawideibü ika no khümbo aku, khei yingsikei, nyi tatje ho yaksa shanga kü la shedbü kuda.

⁹Mühghaüei Abner to khei kümshi, hoba BUNYUBOUei Dawid to ai theyolanyokei kho ngei hao to akümenlonga tokei aeikei kümshi.

¹⁰Sauleibü chemdang ka sangle kho jeileilabü, hoba Dawid Choba setshang Israel hoba Jihuda thüka khei Dan ka Beersheba sühko yaükei.”

¹¹Hobaje haoei Abner to lubü ngüh che ongkei ajongaien, aieilausi haoei hao to hatkei.

¹²Hobaje Abnerei ngühlang künbü shuong Hebron to Dawid jungto hautiko laukei, “Kao kho aoshangabü? Kü to theyolanyobü che kümashi, hoba chühashi, Israel pendou ka jungto sungbala ngeibü ik ka yoa kilabü.”

¹³Hobaje haoei laukei, “Maiakei, ngei ka to theyolanyobü che phokho; lausikei ka ka denche mangsühda, kho nyi kü the hapla loujinei shaangla nyi Sauleibü shou Maikel leian alou shongko nyi ngeibü the ühüplabü.”

¹⁴Hobaje Dawideibü ngühlang künbü shuong Sauleibü shou Ishbosheth jungto hautiko laukei, “Kü yak Maikel ao shanga ngei Filistia büeibü phekhop saongao mu kukei, sao kü la khümbo kungaishi.”

¹⁵Hobaje Ishboshethei hautikei hoba saoeibü lao, Laisheibü shou Paltiel ka sao leian sungkei.

¹⁶Hobaje saoeibü lao hao yoa haapbo haukei, hoba sao phainei Bahurim sühko sembei. Kheijinei Abnerei hao to laukei, “Ngaiashi!” Hibü hao sepeinyu haukei.

¹⁷Hobaje Abnerei Israelbü bousijaisi shuong to joyoko laukei, “Danbü jihsiphaia kan thüka Choba lela kanei Dawid lambei.

¹⁸Tou khülonga kho kümashi, aieilausi BUNYUBOUei Dawid shanga joyoko laukei, ‘Ngo khangenbou Dawideibü ikei Filistiabü ik ka ngei ngeibü mütli Israel khümenlabü.’ ”

¹⁹Hobaje Abnerei toukei Benjamineibü noua joyokei hoba Abnereikei Hebrona Dawideibü noua Israel hoba Benjamin mütli khümboei kümla maikei dogo laubü pendou laukei.

²⁰Hibü Abner Dawid jungto Hebron to hao yoa müt saoche yoan loukei, Hobaje Dawidei Abner si hao yoa kibü müt shuongla lem che likukei.

²¹Hobaje Abnerei Dawid to laukei, “Ngo meimeijung haukho, hoba Israel pendou ngeibü bunyu Choba jungto leishailabü, khünei ka yoa theyolanyobü lelabü, hoba ka soushouei maangdakbü pendou thüka no Choba lela thükkei.” Hobaje Dawidei Abner hautikei, hoba hao sangmaia haukei.

²²Hobaje chühashi, Dawideibü khangenbü shuong hoba Joab sangshibü ka loukei, hoba haoen yoa soletbü peisilei juong sungbakei, lausikei Abnerje Dawid yoa Hebrona akitei, aieilausi haoei hao hautian kikei, hoba hao haksobüa hauan kikei.

²³Ladang Joab si hao yoa kibü lakjaibü shuong louan kikei, haoenei Joab to laukei, “Nereibü shou Abner Choba jungto loukei hoba haoei hao hautia, hoba hao sangmaia haua.”

²⁴Kheijinei Joab Choba jungto loukei hoba laukei, “Nyi ai kümbei? Chühashi, Abner ka jungto loukei, aila nyi hao sattian apbei, hao khei ong haukei sai?

²⁵Nereibü shou Abner kho nyi ngekei, no huonettilabü, hoba hau longai dogo kümbü, hoba nyi kümbüleibü pendou ngean sungla hao loukei.”

²⁶Hobaje Joabei Dawid jungka longeian phaia Abner phaito ngühlang künbü shuong hautikei hoba haoenei hao Sira deikhün ka leian longeikei, lausikei Dawidei kho ange.

²⁷Hobaje ladang Abner Hebron to sepeinyu longeikei, Joabei hao phainei hao to huphanga joyola tegütham bakhün to leian lotkei, hoba khünei hao la shimunga hankei; khünei hao Joabeibü na Asahel sii phinbü shanga haikei.

²⁸Hobaje kho phaila Dawidei ditjinei, haoei laukei, “Ngo hoba ngeibü sangle Nereibü shou Abnereibü sii ka ponpen shanga BUNYUBOU thedanga shedbü aki.

²⁹Kho Joabeibü khu thüka hoba haoboueibü chung pendou thükto attishi, hoba Joabeibü phangsichunga mang ka mousi senbü ayingsi im baubü ayingsi jua soubü che ayingsi inei haibü, ayingsi shaueiyungei kaangbü cheje ayoko tekiti.”

³⁰Hibü Joab si haoeibü na Abishai haosiei Abner haitikei, aieilausi haoei haoeneibü jaisina Asahel kho Gibeona lasona haitikei.

³¹Hobaje Dawidei Joab to hoba hao yoa kibü müt pendou to laukei, “Kaneibü neisimei jitnyinashi, hoba senou neiei shembe lokashi hoba Abnereibü mang haapashi.” Hobaje Dawid mang lengbü phainei sembei.

³²Hobaje haoenei Hebrona Abner khünkei, hoba Chobaei ngüh longko Abnereibü heea haapbukei, hoba müt pendou haapbei.

³³Hobaje Chobaei Abner shanga mang haapbo laukei. “Ngoubüloubü müt haibü tegü Abner hailep lo?

³⁴Kaibü ik akhühko kikei, ayingsi kaibü you namlühei aphen. Amaibou thedanga müt che tuongbü phatko no kho tegü tuongkei!” Hobaje müt pendouei hao shanga nyibou manghaapbei.

³⁵Hobaje müt pendouei toukei chaseko Dawid sukojako shautiyungtila loukei, lausikei Dawidei thekolanko laukei, “Chanyu anep shongko ngei shausiyung jepan chühalonga ayingsi denche yingalonga Mühghaüei kho tegü, ayingsi aeikei kümshima.”

³⁶Hobaje müt pendouei kho ngean apbei, hoba khoei mütshuong olintikei.

³⁷Hibü müt pendouei hoba Israelbü khünyet kho Nereibü shou Abner haitibü kho Chobaei aying dogo ditenkei.

³⁸Hobaje Chobaei haoeibü khangenbü shuong to laukei, “Kanei tat Israela Chobaeibü shou che hoba yaangbü müt che tuongkei dogo angekei lo?

³⁹Hobaje naangenko pienbü Choba che yingsi dogokei tat ngo hau akiko kia; hoba Zeruiaeibü shousi shuong khübü mütshuong kü shanga yongko sekakei. BUNYUBOUei amaibü kümbou la jembü kümsileiei muthüng pailettiashi.”