Read Chang Naga 2 SAMUEL 4 Bible Online

2 SAMUEL 4 - Chang Naga bible

2 SAMUEL 4

¹Ladang Sauleibü shou Ishboshethei Hebrona Abner haia dogo ditkei haoeibü ik hau akiko apbei hoba Israelbü pendou khonkuko kikei.

²Hobaje Sauleibü shou Ishboshethei shuong thüka lajamleibü müt nyi kikei, cheeibü nyen Baana, hoba cheeibü nyen Rekab Beerotbü Rimmoneibü shou Benjamineibü shousi shuong ka kikei, aieilausi Beerot kei Benjamina lühbaka yoan kikei.

³Hobaje Beerotbü Gittaim to satkei hoba tat sühko khünei küksithang bukmüt la lean kia.

⁴Tou Sauleibü shou Jonathaneibü shou che sokebü kikei. Ladang Saul si Jonathan shanga Jezreel ka ngühlang loukei, hao po ngao jaishou kikei hoba nabukbüei leian sungan satkei hoba sao satla panteijinei hao tuongkei hoba you ngokan sokean apbei. Hobaje haoeibü nyen Mephiboshet kikei.

⁵Hobaje Beerotbü Rimmoneibü shousi Rekab hoba Baana, haosieibü chem to haukei hoba chanyu kaangbü jiha Ishbosheth, hao chajihboua haksoko kijinei haoeibü chem to loukei.

⁶Hobaje chühashi, koukhün lomnyu kho whet youshou sipbo kikei, lausikei sao ngakbü ka nyeket shiettian kikei; hibü Rekab si Baana chem maang to shetjung atkei.

⁷Hobaje hao yepshanga phetetnyu lengan kijinei ladang haosi chem maang to lotkei, haosiei hao to ngümbei hoba haitikei. Hobaje khu thetkei hoba haoeibü khu jungan langyang sünga Araba lam to haukei.

⁸Hobaje haoenei Ishboshetheibü khu Dawid jungto Hebron to sungbakei, hoba Choba to laukei, “Kaibü langkei lambou kaibü dangbou Sauleibü shou Ishboshetheibü khu to chühashi, hoba tat ngeibü bunyu Choba Saul hoba haoeibü lilabü to BUNYUBOUei phok lama.”

⁹Hobaje Dawidei Rekab si haoeibü na Baana, Beerotbü Rimmoneibü shounyi to jongaikei, hoba haosi to laukei, “BUNYUBOU lang kiabü, aoei ngeibü soushou khulimbü pendou ka khümenkei,

¹⁰ladang müt cheei, ‘Chühashi, Saul haia’ dogo ngühlang maibü sungbakei dogo dambo laukei, ngei hao senetkei hoba Ziglaga hao haitikei, kho haoeibü ngühlang shanga pailetbü kiteikei!

¹¹Müt amaibüei saopobü müt jembü chema jembü yepshanga kian haitisi lai aei ong ayingla. Ngei tou kasieibü ik ka haoeibü sii ahilepsi? Hobaje no kaodak ka alanglep lo!”

¹²Hobaje Dawidei haoeibü heshou shuong la sakkukei hoba haoenei haosi haitikei hoba haosieibü you si ik danan apbukei, hoba khübü kho saütian phokei. Lausikei haoenei Ishboshetheibü khu sungkei hoba kho Hebrona Abnereibü heed- anga khünkei.