Read Chang Naga 2 SAMUEL 6 Bible Online

2 SAMUEL 6 - Chang Naga bible

2 SAMUEL 6

¹Dawidei nyibou Israelbü pienbü müt pendou, hajar khujin liko yoshaitikei.

²Hobaje Dawidei meimeijung hao yoa kibü müt pendou Jihudaa Baala ka Mühghaüeibü Saopobü Busen jungan angla haukei, kho Thükenbou BUNYUBOU ao kaakyembü kherabim thüka setan ki hao nyena ngada.

³Hobaje haoenei Mühghaüeibü Busen kho Abinadabeibü chem ka sungjung haukei hoba kailong haanbü chenei jinkei hoba Abinadabeibü shounyi, Uzza si Ahioei kailong haanbü kho leikei.

⁴Hobaje shongha kibü Abinadabeibü chem ka haoenei Mühghaüeibü Busen yoa künlangkei, hoba Busen thedanga Ahio haukei.

⁵Hobaje fir buei kümbü kongkin, pithung, pitbü kongkin, sen, ikjishoua lonan lükbou hoba kaangbü laa, hoba kongkin pithung phang juongei Dawid si Israel chung pendouei BUNYUBOU thedanga kaangkei.

⁶Hobaje ladang haoen Nakon amshang sühko loukei, Uzzaei ik longan Mühghaüeibü Busen to ik- phen lambei, aieilausi masu shuong kho phaiyetkei.

⁷Hobaje BUNYUBOU khauang Uzza khulimbo longkei hoba khünei mashikbü shanga haitikei, hoba khünei Mühghaüeibü Busen nyangko haikei.

⁸Hobaje Dawid aolinko kikei, aieilausi BUNYUBOU Uzza thükto khauang longkei hoba haoei kho kaonyek to Perez Uzza dogo tat sühko lauda.

⁹Hobaje khünyet kho Dawidei BUNYUBOU to hatko kikei; hoba haoei laukei, “BUNYUBOUeibü Busen kü jungto lai loula?”

¹⁰Hibü Dawidei BUNYUBOUeibü Busen kho Dawid sangnyu to sonjung atmang asüh; lausikei Dawidei kho Gitbü Obededom chem to sonjung haukei.

¹¹Hobaje BUNYUBOUeibü Busen kho Gitbü Obededom chema lit sem kikei, hoba BUNYUBOUei Obededom si haoeibü chemdang pendou haükukei.

¹²Hobaje Dawid Choba la ho ngetiko laukei, “Mühghaüeibü Busen phobü nyena BUNYUBOUei Obededom chemdang hoba hao shangabü pendoua haükua.” Hobaje Dawid hauan Obededomeibü chem ka Mühghaüeibü Saopobü Ngühkhüm Busen kho sungngaikei hoba Dawid sangnyu to olinbüei sungjung atkei.

¹³Hobaje BUNYUBOUeibü Ngühkhüm Busen jungbü shuong youyaü lak hauan kikei, haoei masu pongsu che hoba masu shoushou netthembü che, haitian lembei.

¹⁴Hobaje Dawid BUNYUBOU thedanga haoeibü hau pendouei saiko laakko tombei hoba Dawidei ungshedbou saopobü heleei shembe kaian kikei.

¹⁵Hibü Dawid hoba Israel mütli pendouei olinko hoba teklaang metbü langei BUNYUBOUeibü Busen sunganbakei.

¹⁶Hobaje BUNYUBOUeibü Busen kho Dawid sangnyu to lotjinei Sauleibü nouyangnyu Maikelei koulom ka seman litikei, hoba Dawid Choba BUNYUBOU thedanga saiyeibü hoba tombü hapbei, hoba saoei saoeibü maangpona hao nyikuko attikei.

¹⁷Hobaje haoenei BUNYUBOUeibü Busen kho jungan lotkei, hoba Dawidei kho shanga neichem dangan kibü sünga kho phoshanga phokei, hoba Dawidei BUNYUBOU thedanga juokbü lembü kukei.

¹⁸Hobaje ladang Dawidei juokbü lembü si sangmai lembü kho thonkei, haoei mütshuong Thükenbou BUNYUBOU nyena haükukei.

¹⁹Hobaje müt pendou khei tan khümbo yoa bousu la hoba yaksa la mütpem weko la wentek che che hoba phe jushin che che hoba kismis haoei kukei. Kho tegü müt pendou lulueibü chem to linkei.

²⁰Kheijinei Dawidei haoeibü chempen haükula sepeinyu haukei. Hobaje Sauleibü shou Maikel Dawid shuokla loukei, hoba laukei, “Tatje Israelbü Choba lai soneikangko kikei! Aoei tat jembü lolo haoeibü sambüsao shuong thedanga haangalongbü mütshuong yoa himou akakko jembü lolo mütkong kibü tegü mütkong kikei!”

²¹Hobaje Dawidei Maikel to jongaiko laukei, “BUNYUBOUa ngo tomda, aoei BUNYUBOUeibü mütli, Israel thüka ngo leiyeibü lela, kabou hoba haoeibü chemdang pendou thüka ngo pienkei; hibü ngo BUNYUBOU thedanga louyoja- yolabü.

²²Hobaje ngo khütokei chühajanbou yinglabü; lausikei nyi laubü sambü saoshuong, haoen thedanga ngo nyensang nyenhaang kilabü!”

²³Hobaje Sauleibü shou Maikel hainyet sühko shousi akitei.