Read Chang Naga 1 CHOBA SHUONG 1 Bible Online

1 CHOBA SHUONG 1 - Chang Naga bible

1 CHOBA SHUONG 1

¹Tou Dawid Choba baushi hoba khuthu phaman kikei, hoba haoenei hao la nei neikukei, lausikei haoei lemabü ühüp.

²Hibü haoeibü sambü shuongei hao to laukei, “Ngeibü BUNYUBOU Choba shanga saosüngbü medei che lambuashi hoba sao Choba junga lotiashi hoba hao thounoutiashi; ngeibü bunyu Chobaei lemabü hapenlabü lele kaibü khukua sao nongtiashi.”

³Hibü haoenei medei maibü che Israel kaijembo pendoua lambei, hoba Shunambü Abishag haoenei hapoukei, hoba sao Choba jungto leian loukei.

⁴Hobaje medeinyu kho sao aeibou maian kikei, hoba haoei Choba to thuiko pangteikei; lausikei Chobaei sao to siisiphe asoyo.

⁵Kheijinei Haggiteibü shou Adonijaei jembü lolo yaangenko laukei, “Ngo Choba yeilabü.” Hobaje haoei koli kailong hoba koli sepai hoba müt anjinsem hao thedang to laangla lamlekei.

⁶Lausikei Dawidei aijih dangakei “Nyi aila hai kümda?” dogo lauko hao to ühak; hoba haokei müt maibü che kikei, hoba hao Absalom thena bukkei.

⁷Hobaje haoei Zeruiaeibü shou Joab to si ungshedbou Abiathar to ngühsong wanyokei hoba haoenei Adonija phai sembo hao to thuikei.

⁸Lausikei ungshedbou Zadok si Jehoiada shou Benaia hoba thuseibou Nathan, Shimei, Rei hoba yaangenbü shuong aoyou Dawid yoa kikei, Adonija yoa akitei.

⁹Hobaje Adonijaei sanlon, masu hoba netthembü shatsinam Zohelet nyangko laangei tetetkei, laobou Enrogela ki, hoba haoei jembü jaisina pendou, Chobaeibü shousi shuong, hoba Jihudabü müt pendou hoba Chobaeibü sambü shuong ngakei.

¹⁰Lausikei thuseibou Nathan hoba Benaia hoba yaangenbü shuong hoba jembü jaisina Solomon haoei anga.

¹¹Kheijinei Nathanei Solomoneibü nyu Bathsheba to laukei, “Nyi Haggiteibü shou Adonija Choba yeibü aditsi, hoba seneibü bunyubou Dawidei kho angekei lo?

¹²Hibü tou ngei ka to sudajada, kaibü langkei si kaibü shou Solomon langkei püetla ngei ka la huon kukho.

¹³Hauashi, hoba Dawid Choba jungto atashi hoba hao to lenshi: ‘Ngeibü BUNYUBOU Choba, nyi kaibü samnyu to thekolanko: Ka shou Solomonei kü phaito songdaklabü, hoba hao ngeibü Choba setshanga setlabü, dogo athelet lo? Kholonga ailaibü Adonijaei songdakda?’”

¹⁴Nathanei athakko laukei, “Chühashi, nyi khünei Choba to joyotoua ngokei khüto lotlabü hoba kaibü ngüh kaangkhühtham sunglettilabü.”

¹⁵Hobaje Bathsheba Choba jungto hauan chem to atkei, hoba Choba aeibou baushi sinan kikei.

¹⁶Hobaje Bathsheba khüpetkei hoba Choba to souhat lenkei. Hobaje Chobaei laukei, “Nyi ai mangsühda?”

¹⁷Hobaje saoei hao to laukei, “Ngeibü bunyubou, nyi BUNYUBOU kaibü Mühghaü nyena thekolanko kaibü samnyu to laukei, ‘Kü phainei ka shou Solomonei songdaklabü, hoba hao ngeibü Choba setshanga setlabü.’

¹⁸Lausikei chühashi, tou Adonijaei songdakda, hoba no ngeibü bunyubouei kho angeda;

¹⁹hoba haoei sanlon, masu hoba amenbü shatsinam hoba sanlon souko haitian lembeisakei; hoba ungshedbou Abiathar hoba sepai tan leiyeibou Joab haoei ngakei, lausikei no khangenbou Solomon haoei anga.

²⁰Hobaje tou ngeibü bunyubou Choba, Israel shousi shuongei ngeibü bunyubou Choba hao phainei ao Choba setshanga setla kho haoen la lentila hao to chühko kia.

²¹Ayinglonga ho haüthüklabü, ladang ngeibü bunyubou Choba jembü pisibousi shuong yoa yeplaje, khei ngo hoba kü shou Solomon shedbüshabü shuong yoa weyolabü.”

²²Hobaje chühashi, saoei Choba to joyoko kitoua thuseibou Nathan lotkei.

²³Hobaje haosiei Choba to laukei, “Thuseibou Nathan hanei kia.” Hobaje ladang hao Choba jungto loukei, haoeibü thenyek kaoae yeian haoei Choba junga khüpetkei.

²⁴Hobaje Nathanei laukei, “O Choba, ngeibü bunyubou, ‘Adonijaei kü phainei songdaklabü hoba hao ngeibü Choba setshanga setlabü,’ dogo nyi laukei lo?

²⁵Aieilausi hao tat yana hoba masu si amenbü shatsinam hoba sanlon souko haoei haitian Chobaeibü shousi shuong hoba sepai leiyeibü shuong si ungshedbou Abiathar haoei ngakei hoba chühashi, haoenei hao junga shauanyungan lauda, ‘Adonija Choba salangko kishi!’ dogo lauda.

²⁶Lausikei ngo, khei no khangenbou, hoba ungshedbou Zadok hoba Jehoiadaeibü shou Benaia hoba no khangenbou Solomon haoei anga.

²⁷Ho ngeibü bunyubou Chobaei, haoei hao khangenbü shuong to, ngeibü bunyubou Choba setshanga hao phainei ao setlaje alenko kümbei sai?”

²⁸Kheijinei Dawid Chobaei jongaiko laukei, “Kü jungto Bathsheba ngaba.” Hibü sao Choba kishang to loukei hoba hao junga lokei.

²⁹Hobaje Chobaei thekolanko laukei, “Thushed pendou ka ngeibü soushou khümenbou BUNYUBOU ki shongko,

³⁰maimaitham BUNYUBOU Israel Mühghaü nyena ngei ka to theyolanyobü tegü, kü phainei maimaitham ka shou Solomonei songdaklabü, hoba kü jeila hao Choba setshanga setlabü.”

³¹Kheijinei Bathshebaei jembü thenyek kaoae khüpetan lembei hoba laukei, “Ngeibü bunyubou Choba Dawid thon akiko kishi!”

³²Hobaje Dawid Chobaei laukei, “Ungshedbou Zadok, thuseibou Nathan hoba Jehoiada shou Benaia kü jungto ngaashi.” Hobaje haoen Choba jungto loukei.

³³Hobaje Chobaei haoen to laukei, “Kan yoa kaneibü bunyubou khangenbü shuong leiashi, hoba kü shou Solomon ngeibü gadua settiashi hoba hao Gihon to leian yanashi.

³⁴Hobaje ungshedbou Zadok si thuseibou Nathanei, Israel thüka Choba lela hao onang naangkuko pienashi hoba kanei teklaang metko, ‘Solomon salangko kishi!’ dogo ngekashi.

³⁵Kheijinei kan hao phaito anglabü, hoba hao louan Choba setshanga setlabü; aieilausi haoei kü jeila songdaklabü hoba hao Israel si Jihuda thüka leiyeibü yeila ngei pienkei.”

³⁶Hobaje Jehoiada shou Benaiaei Choba to jongaiko laukei, “Amen! BUNYUBOU, ngeibü BUNYUBOU Chobaeibü Mühghaüei kho khei yingtishi.

³⁷BUNYUBOU, ngeibü bunyubou Choba yoa kibü tegü hao Solomon yoa kishi hoba ngeibü bunyubou Dawid Choba setshang toje haoeibü Choba setshang yaangbou yingtikushi.”

³⁸Hibü ungshedbou Zadok, thuseibou Nathan hoba Jehoiada shou Benaia, hoba Keretbü si Peletbü louyenkei, hoba Dawid Chobaeibü gadua Solomon settian Gihon to hao leian loukei.

³⁹Hobaje ungshedbou Zadokei neichem ka onang thungdou sungkei hoba Solomon la naangkukei. Hobaje haoenei teklaang metkei hoba mütshuongei laukei, “Solomon salangko kishi!”

⁴⁰Kheijinei müt pendou hao phaito angkei, hoba mütshuongei pithung metkei, hoba olinbü yaangbüei olinyokei, hibü haoeneibü ngühlangei kaoa tenkei.

⁴¹Hobaje Adonija si hao yoa kibü shuong shaubüyungbü thonko loujinei haoenei kho ditkei. Hobaje ladang Joabei teklaang ngühlang ditkei, haoei laukei, “Ai yingbü ka sangnyua ngühbü yaang ho lai longda?”

⁴²Hobaje haoei joyoko kitoua, chühashi, ungshedbou Abiathar shou Jonathan loukei. Hobaje Adonijaei laukei, “Kaiyeda; aieilausi no müt maibü hoba ngühlang maibü künbako kilabü.”

⁴³Hobaje Jonathanei jongaiko laukei, “Khei aying! Maimaitham seneibü bunyubou Dawid Chobaei Solomon Choba yeitia.

⁴⁴Hobaje Chobaei ungshedbou Zadok si thuseibou Nathan, Jehoiada shou Benaia hoba Keretbü si Peletbü hao yoa hautikei, hoba haoenei hao Chobaeibü gadua settikei.

⁴⁵Hobaje ungshedbou Zadok si thuseibou Nathanei hao Choba la lela Gihona onang naangkuko pienkei. Hobaje haoen khüka olinyoko angkei; hibü sangnyua nyibou ngühbü longda. Kanei ditbü ngühlang kho ho.

⁴⁶Hobaje Solomon kei sanglea Choba setshanga setda.

⁴⁷Hobaje aeilaleko Choba khangenbü shuongei seneibü bunyubou Dawid Choba haükula louan, ‘Kaibü Mühghaüei Solomon, kaibü nyen toje maibou yeitishi, hoba kaibü Choba setshang tokei haoeibü Choba setshang yaangbou yeitishi!,’ dogo lauda. Hobaje Chobaei jembü lolo shena khüpetkei,

⁴⁸hoba laukei, ‘Ngeibü nyekeikei hapouko tat ngeibü Choba setshanga setla kü la aoei kukei kho Israel Mühghaü BUNYUBOU haübou yingshi.’ ”

⁴⁹Kheijinei Adonijaeibü yensi shuong pendou hatko loenkei hoba mütpem weko jembü haang to ngaikei.

⁵⁰Hobaje Adonija Solomon to hatko hao loan meimeijung haukei, hoba lemshon laang thona ikphen lambei.

⁵¹Hobaje Solomon to ho hai laukei, “Chühashi, Solomon Choba to Adonijaei hatda; aieilausi chühashi, haoei lemshon laang thona hatan lauda, ‘Solomonei haoeibü sambü jembü inlouei awapettilabü dogo kü la shaang thebülanbü.’ ”

⁵²Hobaje Solomonei laukei, “Haoei jembü lolo mubü müt che dogo lenena longa haoeibü khu ka khulou pem che ongkei kaoa üatlabü; lausikei hao to amaibü hapa longa hao hailabü.”

⁵³Hibü Solomon Chobaei hautikei hoba haoenei hao lemshang ka leian louyenkei. Hobaje hao louan Solomon Choba to souhat lenkei, hoba Solomonei hao to laukei, “Kaibü chem to ngaiashi.”