Read Chang Naga 1 CHOBA SHUONG 10 Bible Online

1 CHOBA SHUONG 10 - Chang Naga bible

1 CHOBA SHUONG 10

¹Tou Sheba Chobasao, ladang saoei BUNYUBOU nyena Solomon nyenhang shangabü ditkei, phebü sekbüei saoei hao takteila loukei.

²Hobaje saoei shuong yaangbü che yoa ut yoa ponlemhibü peisilei yoa hon juong hoba namsek laang juong künan Jerusalem to loukei, hoba sao ladang Solomon jungto loukei, saoei jembü maangpona kibü pendou Solomon to lenyokei.

³Hobaje Solomonei Choba sao to saoei phebü pendou jongaikei, hoba haoei aikei huan aphoko pendou sao to lenkei.

⁴Hobaje ladang Sheba Chobasaoei Solomon songsihon kibü pendou hoba haoei kümbü chem,

⁵hoba haoeibü yaangenbü shuongei shaubüyungbü denshang hoba khangenbü shuong küpjembo phobü hoba haoeibü soneikangbü neisimei, hoba haoeibü thung jungbü shuong haoei juokbü lembü kujinei lai BUNYUBOUeibü chem to angkei habü pendou hapan saoei touje ai ongkei laula akiko apbei.

⁶Hobaje saoei Choba to laukei, “Ngeibü mütli ka kaibü kümsilei shuong hoba kaibü songsihon shangabü ngühlang ditbü kho tükde ong ki.

⁷Khei yingsikei ngo alou shongko hoba ngeibü nyekei ühüp shongko ngei maialembo kikei, hoba chühashi, jamde ongkei kü la alenou; kaibü songsihon hoba haabü yaangbü ngei ditbü tokei khaibou.

⁸Kaibü mütli hoba kaibü khangenbü aoyou ka junga athakko loda hoba kaibü songsihon ditda, haoenei haüa.

⁹Kaibü Mühghaü, aoei ka to olinda, hoba no Israel thüka Choba yeitikei, hao haübou, aieilausi BUNYUBOUei Israel ponpen sanouda, hibü matjemla hoba ngühmai kümla no Choba yeitikei.”

¹⁰Hobaje saoei Choba la hon seret khujin bang atbü saongaoto saoche, ponlemhibü juong hoba namsek laang juong kukei. Sheba Chobasaoei Solomon Choba la ponlemhibü juong kubü tegü lubü ka haoei ühüp.

¹¹Hobaje Ofir ka hon hoba almug bu hoba tokei namsek laang juong Hirameibü longchema künbakei.

¹²Hobaje Chobaei almug buei BUNYUBOUeibü chem hoba Chobaeibü chem shanga khamthung hoba chia laubü shuong shanga kongkin si pithung kümbei. Hobaje tat sühko almug bu alou hoba ühüpbei.

¹³Hobaje Solomon Chobaei jembü Choba chemkanbü peisilei juong maangmai kubü to limbo Sheba Chobasao la saoei mangsühbü hoba saoei ai ong hikei pendou kukei, hoba jembü kaodak to sao hoba saoeibü sambü shuong pendou meimeijung ngaikei.

¹⁴Hobaje po chenei Solomon jungto loubü hon jekbü shuongei sungbabü hoba namyak namseibü shuongei sungbabü, hoba ngühyem lulu ka Choba shuongei kubü,

¹⁵hoba governor shuongei kubü to limbo seret khujin bang atbü hon saongao lakto saosemto lak kikei.

¹⁶Solomon Chobaei honei yaübü aih yaangbü saoan kümbei, aih wekoa hon shekel saongao lak bang atkei.

¹⁷Hobaje haoei honei aih saongao sem kümbei, hoba aih chenei haoei hon pound lak sühko lean kümbei hoba Chobaei Lebanon yamchema khübü kho phokei.

¹⁸Aeilaleko tokei Chobaei thunyu hauh jinan thükto hondei lakan Choba setshang yaangbü che kümbei.

¹⁹Hobaje Choba setshang to angla kho younak lak kikei, hoba Choba setshang thüka tongtongbü kikei, hoba setshang jijihama ik denshang kikei, hoba ik denshanga molosaonyu penyi kikei.

²⁰Hobaje khünei molosaonyu anthüknyi, hoba kho younak lak jijiham thona lokei. Kho phatbü lubü Choba sangle aineikei akitei.

²¹Hobaje Solomon Chobaeibü thung pendou honei küman kikei, hoba Lebanon chema jungeibü thung pendou hon lanbüei küman kikei, hoba chandinameije aikei küman akitei; aieilausi Solomon Choba haanga kho aikei aweei.

²²Aieilausi Hirameibü longchem leiyeibü shuongei po sema che hon, chandinam, thunyu hauh, kumei hoba meisu shuong, dogo künbako kikei.

²³Hibü Solomon Choba kaodaka Choba pendou tokei nyaksinam hoba songahona pendou to shanenbou kikei.

²⁴Hobaje kaodakbü pendouei Solomon la Mühghaüei haoeibü maangpona ai songsihon kukei kho ditla lambei,

²⁵hoba haoen mütpem wekoei hao jungto po weko chandinam thung, hon thung, neisimei, lakbühongbü hele, ponlemhibü peisilei, koli shuong, hoba gadu shuong sungbakei.

²⁶Hobaje Solomonei koli sepai shuong hoba koli kailong hajar cheto saongao lei hoba koli sepai shuong hajar anthüknyi haoei phokei, hoba khübü koli kailong shuong haoei Jerusalema Choba yoa phokei.

²⁷Hobaje Chobaei Jerusalema laangminshou hima chandinam phokei, hoba bhuklong hima cedar bulong juong haoei kekei.

²⁸Hobaje Solomonei phobü koli shuong kho Musri si Kilikia ka sungbabü koli shuong kikei, hoba Chobaeibü namyak namseibü shuongei khübü kho tan tan weko namtet kuan jekngaikei.

²⁹Hobaje koli kailong che Ijep ka chandinam saongao lakei sungbakei, hoba koli che saongaoto anjinsemei hoba kho tegü Hitbü Choba pendou hoba Siriabü Choba pendouei lulu shanga sungbakei.