Read Chang Naga 1 CHOBA SHUONG 11 Bible Online

1 CHOBA SHUONG 11 - Chang Naga bible

1 CHOBA SHUONG 11

¹Tou Solomon Chobaei küksithang sao juong, Fa- raoeibü nouyangshou to liman, Moab, Ammon, Edom, Sidon hoba Hit, khübü sao sanoukei,

²lausikei khübü mütli sao shangabü BUNYUBOUei Israelbü to laukei, “Kan haoen yoto ütjan, khei ayinglonga khübüei kaneibü maangpon lubü mühghaü jungto leilabü.” Lausikei Solomonei khübü to sanoua khapyoan apbei.

³Hobaje haoeibü yaksi saongao nyet kikei, hoba thangnyu saongao sem kikei; hoba haoeibü yaksi shuongei haoeibü maangpon ayingbü to sattikei.

⁴Aieilausi ladang Solomon jai lekei, haoeibü yaksi shuongei haoeibü maang- pon haoeneibü mühghaü jungto leikei hoba haoeibü maangpon haobou Dawid tegü akitei.

⁵Aieilausi Solomon Sidonbü mühghaü, Ashtorethbü hoba Ammonbü mangsenlabü Molek aeto sepeikei.

⁶Hobaje Solomonei BUNYUBOU thedanga ai amaibü ki kho jungeikei, hoba bouei kümbü tegü ayingko hao BUNYUBOU aeto ohau.

⁷Kho phaia, Solomonei Moabbü mangsenlabü Khemosh shanga hoba Ammonbü shousi shuong mangsenlabü Molek shanga Jerusalem nyangko kibü shongha chem loubünyu dangkei.

⁸Hobaje kho tegü haoeibü küksithang sao yaksi pendou, aoyouei jen juokko hoba haoeneibü mühghaü shuong lembei, haoen shanga haoei kümbei.

⁹Hobaje BUNYUBOUei Solomon to khauangkei, aieilausi Israel Mühghaü ao hao jungto nyinei longkei, hao ka haoeibü maang- pon bangkei.

¹⁰Hobaje kho shanga hao la ngühkhüm kuko lubü mühghaü jungto ohaujan dogo laukei, lausikei BUNYUBOUei ai sakkukei kho haoei aküm.

¹¹Hibü BUNYUBOUei Solomon to laukei, “Nyi hai kümshongko hoba nyi kü to theyolanyobü hoba sengkubü ngühkhüm shuong laobou ngei ka la sakkukei kho aphoshongko kaibü sangle kho maimaitham ngei leilukulabü, hoba kho ngei kaibü sambü la kulabü.

¹²Lausikei kabou Dawid nyenmai shanga kaibü jihsiphaia ngei akümlabü, lausikei kaibü shou jihsiphaia ngei kho leilutikulabü.

¹³Khei yingasikei ngei sangle pendou kho aleilutikulabü, ngo khangenbou Dawid shanga hoba Jerusalem laobou ngei pienkei kho shanga ka shou la ngei sangle che kulabü.

¹⁴Kheijinei BUNYUBOUei Edombü Hadad Solomon khulimbo dangbou yeitikei, hao Edoma Chobaeibü phetphanbou kikei.

¹⁵Aieilausi ladang Dawid Edoma kikei, lakjaibou lajamleibou Joab, wapyoa haibü shuong khünla angan kikei, hoba Edoma bousu pendou haitikei.

¹⁶(Aieilausi Edoma bousu pendou ühaitikhüm shongko Joab si Israelbü pendou khünei kikei.)

¹⁷Hobaje Hadad yoa haoboueibü sambü shuong Edombü at Ijep to satetlangkei; Hadad je nashou hanbü che ong kiteikei.

¹⁸Hobaje haoen Midian ka meimeian Paran to Ijepbü Choba Farao jungto lousi hao la chem che kukei, hoba shausiyung kubou la lela hao pienkei hoba hao la kao kukei.

¹⁹Hobaje Farao Choba ka Hadadei onou yaang hapsi jembü yak Tahpeneseibü na hao la yakla lela kukei.

²⁰Hobaje Tahpeneseibü naei hao la bousu shou che Genubath bukkukei, ao Tahpeneesei Farao Choba jungto hautikei, hoba Faraoeibü chema haoeibü shousi yoa Genubath kho chingenkei.

²¹Hobaje ladang Ijepa Hadadei Dawid haoeibü bousi shuong yoa yepa dogo ditkei, hoba lakjaibou Joab haia dogo ditkei, Hadadei Farao to, “Ngo ngeibü kaodak to ngaitikai” dogo laukei.

²²Kheijinei Faraoei hao to laukei, “Nyi kü to aiei maang ühaida, hoba chühashi, aila no kaibü kaodak to haumang sühda?” Hobaje haoei laukei, “Ai aying, khei yingsikei ngo khei ong hautikai!”

²³Hobaje Eliadeibü shou Re- zon, ao hao sambou Zoba Choba Hadadezer ka satjung haukei, Mühghaüei hao khulimbo dangbou longtikei.

²⁴Hobaje haoei sepai tan che thüka leiyeibou yeian jembü mütli hao jungto leishaikei, hoba ladang Dawidei hao Zobaa haitikei, haoen Damaska to loukei hoba khünei kian Damaskaa songdakkei.

²⁵Hobaje Solomonei songdakbü sünga Hadadei amaibü kümbü shanga hao Israeleibü dangbou yeikei, hoba Israel to mangsenkei hoba Siriabü thüka songdakkei.

²⁶Hobaje Nebateibü shou Je- roboam, Zereda kabü Efraim ka, hoba Solomon khangenbou che, aoeibü nyu latnyu che nyenei Zerua kikei; haoeikei jembü ik Choba khulimbo tuokkei.

²⁷Hobaje haoei jembü ik Choba khulimbo tuokbü kho ho kikei, Solomonei Millo kümbei hoba haobou Dawid sangnyu leilubü kümetkei.

²⁸Hobaje Jeroboam kho kaangbüsekbü müt che kikei hoba Solomonei heshoubou kho aeibou sobüsepbü müt che dogo chühenkei, hoba Josef mütli ka kümsilei pendou hao la khümbo kukei.

²⁹Hobaje kho chaloua ladang Jeroboam Jerusalem ka haukei, Shilobü Ahija thuseibouei hao lama hapbei. Tou Ahija neisimei haanbü lean kikei; hoba haosi mütpem khongthua kikei.

³⁰Hobaje Ahijaei nei haanbü laobou haoei neian kikei kho hangletkei hoba anthüknyi la yeiko jitnyinkei.

³¹Hobaje haoei Jeroboam to laukei, “Nyi phejan an leashi, aieilausi Israel Mühghaü BUNYUBOUei hai lauda, ‘Chühashi, ngei Solomon ik ka sangle kho jitnyinlabü hoba ka la mütli an kulabü.

³²Lausikei ngo khangenbou Dawid nyen shangabü hoba Jerusalem nyen shangabü Israel mütli pendou ka pienbü sangnyu kho mütli che ngei lelabü.

³³Aieilausi haoenei ngo maan apbei, hoba Sidonbü mühghaü, Ashtoreth hoba Moabbü mühghaü Khemosh hoba Ammonbü shousi shuong mühghaü Molek haoenei lembei, hoba ngeibü ngühmai shuong ajungeiko hoba haobou Dawid hima akiko haoenei ngeibü lamnyua apai.

³⁴Khei yingasikei sangle pendouje ngei hao ka asungngailabü; lausikei ngo khangenbou Dawid, aoei ngei sakkubü hoba ngeibü ngühmai jungeikei, hao shangabü, ngei haoeibü salang sünga Choba yeitilabü.

³⁵Lausikei hao shou ka sangle sungngailabü, hoba ngei ka la chung an khokei kulabü.

³⁶Hobaje ngo khangenbou Dawidei Jerusalem kü thedanga hantin che phola shanga, laobou ngei kü nyen shanga khünei phola pienkei, hao shou la ngei chung che kulabü.

³⁷Hobaje ngei no lelabü, hoba kaibü soushou pendouei mangsühbü tegü nyi songdaklabü hoba nyi Israel thüka songdaklabü.

³⁸Hobaje ngei sakkubü pendoua nyi ngüha lea longa, hoba kü thea ai janbü ki kho kümbo hoba ngeibü lamnyua paia longa hoba ngo khangenbou Dawid hima ngeibü ngühkhüm hoba ngei sakkubü shuong phoa longa, khei ngo ka yoa kilabü, hoba ngei Dawid shanga kümbubü tegü ngei chem tükde dangkulabü hoba ngei ka la Israel kulabü.

³⁹Hobaje kho shanga ngei Dawid lilabü thensilen khonkutilabü, lausikei ponpen shanga aying.’ ”

⁴⁰Hibü Solomonei Jeroboam haitila lambei, lausikei Jeroboam meimeijung Ijep Choba Shishak jungto Ijep to satetlangkei; hoba Solomon ühaishongko Ijepa kikei.

⁴¹Tou Solomoneibü kümsilei joubü hoba haoei kümbü pendou hoba haoeibü songsihon khübü kümsilei pendou kho Solomoneibü lea doan aki lo?

⁴²Hobaje Solomonei Israelbü pendou thüka Jerusalema songdakbü kho po saonyi kikei.

⁴³Hobaje Solomon bousi shuong yoa haksokei hoba haobou Dawid sangnyua khünkei hoba hao shou Rehoboamei hao jeiko songdakkei.