Read Chang Naga 1 CHOBA SHUONG 12 Bible Online

1 CHOBA SHUONG 12 - Chang Naga bible

1 CHOBA SHUONG 12

¹Kheijinei Rehoboam Shekhem to haukei, aieilausi Israelbü pendou Shekhem to hao Choba yeitila louan kikei.

²Hobaje ladang Nebateibü shou Jeroboamei kho ditkei (aishanga khün sühko hao Solomon Choba ka satetlangan Ijepa ong kiteikei), kheijinei haoenei hao ngala hautikei.

³Hobaje Jeroboam yoa Israelbü tan pendou loukei hoba Rehoboam to hai laukei,

⁴“Kabouei kün on atshaitikei, hibü tou kabouei ai amaibü kümbei kho kümetashi hoba haoei on atshaibü ai kün la künkukei kho songoktham yeitishi hoba künei no khangenlabü.”

⁵Hobaje haoei haoen to laukei, “Ngaiashi, hoba chalou sem phaia nyibou kü jungto kangai.” Hibü mütshuong sepeinyu ngaikei.

⁶Hobaje Rehoboamei jaishou shuong, aoyou haobou Solomon langkeijinei khangenbü shuong kikei, haoen to hai phekei, “Ngei habü mütshuong to jongaila kanei kü la ai songsido kula?”

⁷Hobaje haoenei hao to laukei, “No tat habü mütshuong khangenbou che yeimang süha longa nyi haoen khangenashi hoba haoen to ngüh maibüei jongaiko joyoashi, khei yingalonga haoen kho ponpen shanga no khangenbou yeilabü.”

⁸Lausikei jaishou shuongei hao to ai lenkei kho asunglet, hoba heshou shuong aoyou hao yoa liko chingenkei hoba aoyou hao yoa lokei, haoen ka haoei songsido lekei.

⁹Hobaje haoei haoen to laukei, “Aoyouei kü to, ‘Kabouei künkubü on sotishi,’ dogo laukei haoen to jongaila shanga kaneikei ai songsido kula?”

¹⁰Hobaje heshou shuong aoyou hao yoa liko chingenkei haoenei hao to laukei, “Ka to aoyouei, ‘Kabouei kün on atshaitikei, lausikei nyi songoktishi,’ dogo lauko joyokei, nyi haoen to hai lenshi, ‘Ngeibü ikjishou hanbou ho küboueibü shenjang tokei shangtüngbou!’ dogo lenshi.

¹¹Hobaje kübouei kan on atshaitikei yingalonga khüto ngei aei jinyokulabü; hoba kübouei kan to semjinei ngüman kialonga ngei kan sinkipei shieikoelabü.”

¹²Hibü semnyet phaia Jeroboam hoba mütshuong pendou Rehoboam jungto ngaikei, aieilausi Chobaei laukei, “Chalou semnyeta kü jungto kangai.”

¹³Hobaje haoei jaishou shuongei hao to lenbü inletkeibuba mütshuong to aeibou shoulotham jongaikei,

¹⁴hoba heshou shu- ongei songsido kubü tegü haoei jongaiko laukei, “Kübouei kan buleng atshaitikei, khüto ngei tokei jinyokulabü; hoba kübouei kan to semjinei ngümbei, lausikei ngeije kan sinkipei shieikoelabü.”

¹⁵Hibü kho tegü Chobaei mütshuong to ngüha ale, aieilausi kho BUNYUBOUei haüthüktibü, khei haoeibü ngüh loushedla shanga BUNYUBOUei Shilobü Ahija danko Nebateibü shou Jeroboam to joyokei

¹⁶Hobaje ladang Israelbüei haoen to Chobaei ngüha aleda dogo ngean apbei, haoenei Choba to laukei, “Dawid yoa kün phejan aki, Jesse shousi to kün ainei hambei? O Israel, kan lulu neichem to linashi! O Dawid, kan jembü chem lamjung ngaiashi!” Hibü Israelbü shuong lulueibü neichem lamjung ngaikei.

¹⁷Lausikei Jihuda sangnyu shuonga kibü Israel shousi shuong shangaje haoen thüka Rehoboamei songdakkei.

¹⁸Kheijinei Rehoboam Chobaei Adoram, ao kümaleia leiyeibou kikei, hao hautisi Israelbü pendouei hao to laangei tetkei, hoba hao haikei. Hobaje Rehoboam Choba haoeibü koli kailonga tongde pükan Jerusalem to satkei.

¹⁹Hibü Israelei tat sühko Dawid chung khulimbo loda.

²⁰Hobaje ladang Israelbüei Jeroboam longeia dogo ditkei, haoenei hao mütshuong jungto ngakei, hoba Israelbü pendou thüka hao Choba yeitikei. Jihuda chung ong Dawid thensilen yoa ngühmaang lanko yokei.

²¹Ladang Rehoboam Jerusalem to lousühkei haoei Jihuda chung hoba Benjamin chung pendou pienbü shuong wapyobü shuong hajar saongaoto lei Israel chung khulimbo wapyola hoba Solomoneibü shou Rehoboam jungto nyiboukei sangle sungbala huishaikei.

²²Lausikei Mühghaü müt Shemaia jungto Mühghaü ngüh louan laukei,

²³“Jihuda Choba Solomoneibü shou Rehoboam to hoba Jihuda si Benjamin chung pendou to hoba joubü mütshuong to hai lenashi,

²⁴‘Khei BUNYUBOUei lauda, kan üangjan ayingsi Israelbü shuong, kaneibü jaisinasi shuong khulimbo awapyojan, hoba mütpem weko lulueibü chem to ngaiashi; aieilausi ho ngeibü kümsilei.’” Hibü haoenei BUNYUBOUeibü ngüha leko mütpem weko lulueibü chem to ngaikei.

²⁵Kho phaia Efraim shongh kaodaka Jeroboamei Shekhem lapheishon kümbei, hoba khünei longche kikei, hoba haoei khüka meimeijung hauan Penuel kümbei.

²⁶Hobaje Jeroboamei haoeibü maanga laukei, “Dawid jungto sangle kho nyibou ngailep yingkao?

²⁷Jerusalema BUNYUBOUeibü chema habü mütli shuongei lembü kula anga longa kheijinei habü mütli maangpon haoeneibü bunyu, Jihudabü Choba Rehoboam jungto sepeilabü, hoba ngo haitilabü, hoba Jihuda Choba Rehoboam jungto ngailabü.”

²⁸Kheijinei Chobaei huon lambei, hoba honeibü masu paangshou penyi kümbei hoba haoei haoen to laukei, “Kan shanga Jerusalem to anglabü kho aeibou sekkei, kan Ijep kaodak ka leian loubü mühghaü shuong to chühashi, O Israel.”

²⁹Hobaje haoei che Bethela phokukei hoba lubü kho Dana phokukei.

³⁰Hobaje kho kümsilei shabü che la yeian apbei, aieilausi mütshuongei che kho lemlakei Dan sühko haukei.

³¹Hobaje haoei shongh shongha lemshang kümbei, hoba mütshuong yo ka haoei ungshedbou shuong pienkei, lausikei haoen Levi shousi shuong aying.

³²Hobaje Jeroboamei lit set boubü chalou anthükngao bounyet lemsilang che, Jihudaa kümbü phatko Bethela khangkei, hoba lemshon to angan haoei kümbü masu paangshou shuong la lemla kukei; hoba haoei Bethela ungshedbou shuong phokei.

³³Hobaje lit set boubü chalou anthükngao boubüa haoei Bethela lemshang laobou kümbei khüto angkei, kho haoei jembü maangpona dambo kibü lit kikei, hoba haoei Israel shousi shuong shanga lem che likei, hoba jen jikla hao lemshang to angkei.