Read Chang Naga 1 CHOBA SHUONG 13 Bible Online

1 CHOBA SHUONG 13 - Chang Naga bible

1 CHOBA SHUONG 13

¹Tou chühashi, Jeroboam lemshon nyangko loan jen juoklabü jihsiphaia BUNYUBOUeibü ngühei Mühghaü müt che Jihuda ka Bethel to loukei.

²Hobaje BUNYUBOU ngühei lemshon khulimbo haoei ngekko laukei, “O Lemshon, lemshon! BUNYUBOUei hai lauda: ‘Chühashi, Josia nyenan Dawid chung ka nashou che buklabü, hoba haoei shongh lemshang kabü ungshedbou shuong, aoyouei ka to jen juokda, haoen ka thüka lemlabü hoba müteibü losilak ka thüka juoklabü.’”

³Hobaje haoei khünyet chaloutham tetsida che kuko laukei, “BUNYUBOUei joyobü ho chühashi: Lemshon kho lusaklabü hoba kho thük kabü tap phinlabü.”

⁴Hobaje ladang Bethela lemshon khulimbo Mühghaü mütei joyobü Chobaei ditkei, Jeroboamei ik shingan lemshon ka laukei, “Hao lapashi!” Hobaje haoeibü ik laobou haoei hao khulimbo shingkei kho pheian apbei, hoba haoeibü ik kho nyibou haoei sungngaila athükko apbei.

⁵Hobaje BUNYUBOU ngühei Mühghaü mütei joyobü tegü lemshonkei leilukei hoba lemshang ka tap longkei.

⁶Hobaje Chobaei Mühghaü müt to laukei, “Ngeibü ik maila shanga kaibü Mühghaü to nyi kü shanga sukujakushi.” Hobaje Mühghaü mütei BUNYUBOU to sukujakukei, hoba Chobaeibü ik nyishou tegü nyibou maian apbei.

⁷Kheijinei Chobaei Mühghaü müt to laukei, “Kü yoa chem to louan denche shauashi, hoba ngei ka la jongsak che kulabü.”

⁸Lausikei Mühghaü mütei Choba to jongaiko laukei, “Nyi kaibü nyaksinam jamde kuasikei ngo ka yoa ohaulabü, ayingsi ngei hanei ashau ayungkulabü;

⁹aieilausi BUNYUBOU ngühei kü to hai laukei, ‘Nyi wentek ashaulabü ayingsi deikei ayunglabü, ayingsi no loubü lam to angailabü.’”

¹⁰Hibü hao Bethel to loujinei paibü haang ka ayingko lubü lamnyu aeka ngaikei.

¹¹Tou Bethela thuseibü jaishou che kikei, hoba haoeibü shousi louan Bethela kho chaloua Mühghaü mütei ai kümbei pendou lenkei; haoei Choba la ai ong lenkei, haoenei boulakei khübü pendou lenkei.

¹²Hobaje haoeneibü bouei haoen to laukei, “Hao laeto haukei?” Tou haoeibü shousi shuongei Jihuda ka loubü Mühghaü müt laeto haukei kho hapan kikei.

¹³Hobaje haoei haoeibü shousi shuong to laukei, “Kü la gadu lamlekubü.” Hobaje haoenei hao la gadu lamlekukei; hoba hao khünei setkei.

¹⁴Hobaje hao Mühghaü müt phaito haukei, hoba haoei hao yembulong che phanga setan hapbei; hoba haoei hao to “No Jihuda ka loubü Mühghaü müt kho yinglao?” dogo phekei. Haoei “Ngo yingkei” dogo jongaikei.

¹⁵Kheijinei haoei hao to laukei, “Chem to louan kü yoa shauayungashi.”

¹⁶Hobaje haoei laukei, “Ngo ka yoa alongeilabü, ayingsi ohaulabü, ayingsi ngei ho kaoena ashau ayunglabü;

¹⁷aieilausi BUNYUBOU ngühei kü la hai lenakei: ‘Nyi ashau ayunglabü ayingsi khünei deikei ayunglabü ayingsi no laeka loukei khito angailabü’ ”

¹⁸Hobaje jaishou thuseibouei hao to laukei, “Ngokei no tegübü thuseibü che yingkei. Hobaje khuthük hangangbü cheei BUNYUBOU ngühei: ‘Hao ka chem to shaula yungla leian kangai,’ dogo kü to laukei.” (Lausikei thuseibou jaishou khoei hao thedanga yepeikei.)

¹⁹Hibü Mühghaü müt kho hao phai semjung hauan haoeibü chem- a shaukei yungkei.

²⁰Hobaje haoen shaubü yungbü denshanga setjinei hao leian ngaibou thuseibou jungto Mühghaü ngüh loukei.

²¹Hobaje Jihuda ka loubü Mühghaü müt to hai laukei, “BUNYUBOUei hai lauda: ‘Nyi BUNYUBOU sembung ka laubü ngüha ale, hoba ngei ka la sakkubü BUNYUBOU ka Mühghaü ngühkhüm ajungei.

²²No longeikei hoba BUNYUBOUei ka to teshau hoba teyung dogo laubü aditko nyi shaukei hoba dei yungkei. Hibü no hailabü hoba kaibü mang kabousi shuongeibü heea akhünlabü.’ ”

²³Ladang Mühghaü mütei shaukei yungkei, jaishoubou thuseibouei haoei leian longeibou thuseibou kho settila gadu lamlekukei.

²⁴Hobaje ladang hao haukei, lama molosaonyu che haüyoan hao taketkei hoba haoeibü mang lama tekan apbei hoba gadu hao nyangko loan kikei, hoba molosaonyu haibü mang nyangko loan kikei.

²⁵Hobaje chühashi, mütshuong danjung haukei hoba haibü mang lama tekan apan hapbei hoba molosaonyu khünei loan kikei hoba haoenei louan thuseibou jaishoubou to kho lenkei.

²⁶Hobaje ladang thuseibouei kho ditkei, haoei laukei, “BUNYUBOU sembungei lenbüa ngüha alebü Mühghaü müt kho hao; khei yingbüei BUNYUBOUei hao molosaonyu la khümbo kukei, hoba BUNYUBOU ngühei hao la lenbü tegü molosaonyuei hao haitian phenthetkei.”

²⁷Hobaje haoei hao shousi shuong to laukei, “Kü shanga gadu lamlekushi,” hoba haoenei kho lamlekukei.

²⁸Hobaje hao haukei hoba lama haibü mang kho apan hapbei, hoba gadu si molosaonyu ham haibü mang nyangko loan kikei. Molosaonyuei haibü mang kho ashau ayingsi gadukei aleiluti.

²⁹Hobaje thuseibouei Mühghaü müt haibü mang kho sungjung louan gadu la küntian sangnyu to sungbaan mang haapbo hao khünkei.

³⁰Hobaje haoei haibü mang kho haoeibü heea phokei hoba haoenei hao shanga mang haapbo laukei, “Ügütü, küna!”

³¹Hobaje hao khünan phaia haoei haoeibü shousi shuong to laukei, “Ladang ngo hailaje Mühghaü müt khünshang heea ngokei khünshi, haoeibü lo nyangko ngeibü lo phoshi.

³²Aieilausi Bethela lemshon khulimbo, hoba Samaria sangnyu shuonga lemshang pendou khulimbo laobou haoei BUNYUBOU ngühei ngekkei, kho maimaitham loushedlabü.”

³³Kho phaiakei Jeroboamei haoeibü shabü lam ka asepei, lausikei nyibou tokei mütshuong ka ungshedbou shuong pienkei hoba aoyouei maangangkei haoei hao saüenkuko ungshedbou pienkei.

³⁴Hobaje Jeroboam shanga ho shabü yeikei, khei chung wapan apla hoba kaonyudak ka lemailela mautilabü lele yeikei.