Read Chang Naga 1 CHOBA SHUONG 14 Bible Online

1 CHOBA SHUONG 14 - Chang Naga bible

1 CHOBA SHUONG 14

¹Kho chaloua Jeroboameibü shou Abija shatkei.

²Hobaje Jeroboamei hao yak to laukei, “Meimeiashi, hoba Jeroboameibü yak dogo angela shanga sanoudambo no lolo hele jeileiashi hoba Shilo to hauashi. Hobaje chühashi, khünei Ahija thuseibou, aoei habü pendou thüka ngo Choba lelabü dogo laukei, hao jungto hauashi.

³Hobaje wentek an yoa naodei jungan hao jungto hauashi hoba haoei ka la nashou kho aila yeila kho lenlabü.”

⁴Hobaje Jeroboameibü nyakei kho tegü kümbei hoba meimeijung Shilo to loukei, hoba Abijaeibü chem to loukei. Tou Ahijaei nyekei ühüp, aieilausi hao baushi sinan kikei.

⁵Hobaje BUNYUBOUei Ahija to laukei, “Chühashi, Jeroboameibü yak saoeibü shou shangabü phela louada, aieilausi hao shatko kia; ho tegü hai sao to lenshi, aieilausi sao loujinei sao lubü yaksa tegü loulabü.”

⁶Hobaje ladang Ahijaei sao koukhün nyangko loubü youlangh ditkei, haoei sao to laukei, “Kaiyeda, no Jeroboameibü yak, aila nyi lubü tegü hanglenda? Aieilausi ngei ka shanga ngühlang amaibü kia.

⁷Israel Mühghaü BUNYUBOUei hai lauda, dogo Jeroboam to lenashi. ‘Ngei no kaibü mütli yoa yaangentikei, hoba kaibü mütli Israelbü thüka Choba yeitikei,

⁸hoba Dawid mütli ka ngei sangle sungngaian ka la kukei; lausikei ngo khangenbou Dawid, aoei ngeibü ngühkhüm shuong jungeikei, hoba aoei jembü maangpon khümboei ngei lenbü phai sembei, hoba kü thea maibü pendou kümbei, hao tegü no aying,

⁹lausikei nyi ka thedanga kibü pendou to aeian amaibü kümbei hoba kü ka bangan lubü mühghaü shuong kümbei, hoba ngo maangto shattiko ka phainei ngo apyokei.

¹⁰Hibü chühashi, ngei Jeroboam mütli khulimbo amaibü sungbalabü, hoba Jeroboam ka bousushou pendou wapan aplabü, ao thüngan ki hoba Israel kaoa khühlepbü hoba soloa kibü pendou kho tegü chemkubü shuongei odsinot kuan apbü tegü Jeroboam chung lemailela pendou amauti shongko kuan aplabü.

¹¹Hobaje Jeroboam mütli ao sangnyua hailaje keiei shaulabü, hoba ao seka hailaje mühkabü au shuongei shaulabü, aieilausi BUNYUBOUei khei lena!’

¹²“Hibü no meimeiashi hoba kaibü chem to hauashi hoba no ladang kaibü sangnyu to you yaüjung atlaje kaibü shou hailabü.

¹³Hobaje Israelbü pendou hao shanga mang haaplabü, hoba khünlabü; aieilausi Jeroboam chung yo ka BUNYUBOU Israel Mühghaüei hao to ong maibü hansho hapbei, hoba hao ong heea khünlabü.

¹⁴Tokei BUNYUBOUei Jeroboam chung wapan aplabü hoba hao jeila Israel thüka Choba che longtilabü. Ho tat chalou ki! Ai? Haü, tou yingkei.

¹⁵Aieilausi deia thakdu topeibü tegü BUNYUBOUei Israel nyaakeitilabü hoba ho kao maibü laobou pisibousi shuong la kubü ka haoei Israel li ka pheian aplabü hoba hao Eufrates shumang thi aenei phinnyintilabü; aieilausi haoenei BUNYUBOU khau lottiko haoeneibü lemshang kümbei.

¹⁶Hobaje haoei Jeroboam shedbü shanga Israel khümbo kuan aplabü, laobou haoei shabü shonkei hoba kho shedbü Israelbü la shontikei.”

¹⁷Hobaje Jeroboameibü yak meimeijung satkei hoba Tirza to loukei, hoba sao chem nyangko loujinei nashou kho haian apbei.

¹⁸Hobaje BUNYUBOU ngühei hao khangenbou Ahija thuseibou danko laubü tegü Israelbü pendouei hao khünkei, hoba hao shanga mang haapbei.

¹⁹Jeroboameibü joubü kümsilei, laobou haoei wapyokei hoba lai songdakkei kho Israelbü Choba shuong Lüngbüdobü Lea doan kia, khüto chühshi.

²⁰Hobaje Jeroboamei songdakbü po saoto nyi kikei, hoba hao bousi shuong yoa yepbei, hoba hao shou Nadabei hao jeiko songdakkei.

²¹Solomoneibü shou Rehoboamei Jihudaa songdakkei. Rehoboam ladang songdakla khangkei, hao po saoto che kikei, hoba haoei po anthük nyet BUNYUBOUei Israel phang pendou shanga pienbü Jerusalema haoeibü nyen shanga songdakkei, hoba haonyu Ammonbü sao Naama nyenbü kikei.

²²Hobaje BUNYUBOU thedanga ai amai kho Jihudaei kümbei, hoba haoeneibü pisibousi shuongei kümbü to liman haoeibü shabüei BUNYUBOU maangto shattiko shed shonkei.

²³Haoenei haoen shanga shongh wekoa hoba sangtüngbü bulong phanga shomenbü shonghshou, saopobü thaonyu shuong, hoba Ashera kümbei.

²⁴Yongbou, kaonyua küksithang lemshanga pejapelabüa jembü phe yaakbü bousu shuong mangkei kikei. Jihudaei BUNYUBOUei Israelbü thedang ka shian sattibü phangshuongei jungeibü mangsenlabü shabü pendou kümbei.

²⁵Tou Rehoboam Choba po ngao boubüa Ijepbü Choba Shishakei Jerusalem shila longkei.

²⁶Hobaje haoei BUNYUBOUeibü chem kabü nyaksinam hoba Chobaeibü chem kabü nyaksinam, khei haoei pendou sunglangkei hoba Solomonei honei kümbü aih pendou langkukei.

²⁷Hobaje Rehoboam Chobaei khübü jeila chisaknamei aih kümbei, hoba Chobaeibü sepai koukhün lombü leiyeibü shuong ik to khümbo kukei.

²⁸Hobaje ladang ong Choba BUNYUBOUeibü chem to haukei sepai shuongei khübü kho jungkei hoba lemshanga phokei.

²⁹Rehoboameibü joubü kümsilei shanga hoba haoei kümbü pendou Jihudabü Choba shuongeibü Lüngbüdobü lea doan aki lo?

³⁰Hobaje athakko Rehoboam si Jeroboam kanglanga wapyo kikei.

³¹Hobaje Rehoboam haoeibü pisibousi shuong yoa yepbei, hoba Dawid sangnyua haoeibü bousi shuong yoa khünkei hoba haoeibü nyu Ammonbü sao nyen Naama nyenbü kikei, hoba hao jeiko hao shou Abijaei songdakkei.