Read Chang Naga 1 CHOBA SHUONG 15 Bible Online

1 CHOBA SHUONG 15 - Chang Naga bible

1 CHOBA SHUONG 15

¹Tou Nebat shou Jeroboam po anthükset boubüa Abijaei Jihuda thüka songdakla khangkei.

²Haoei Jerusalema po sem songdakkei, hoba haoeibü nyu Abishalomeibü nouyangshou Maaka nyenbü kikei.

³Hobaje haobouei shangied kümbü shabüa paikei, hoba haobou Dawid tegü ayingko BUNYUBOU haoeibü Mühghaü junga haoeibü maangpon amuko kikei.

⁴Lausikei Dawid nyen shanga BUNYUBOU haoeibü Mühghaüei hao phainei haoeibü shou lola shangabü hao la Jerusalema wanthung che Jerusalem khümetangetla kukei.

⁵Aishanga Dawidei BUNYUBOU thedanga ai janbü kho kümbei, hoba hao la haoeibü langkeia ai ong kümla sakkukei, khei Hitbü Uria to kümbü to liman, pendou haoei kümbei.

⁶Tou Rehoboam si Je- roboam ham kanglanga khangbü wapyo Abijaeibü salang sünga kikei.

⁷Hobaje Abijaeibü kümsilei pendou hoba haoei kümbü Jihudabü Choba shuong Lüngbüdobü lea doan aki lo? Hobaje Abija si Jeroboam ham kanglanga wapyo kikei.

⁸Hobaje Abija bousi shuong yoa yepbei hoba Dawid sangnyua haoenei hao khünkei, hoba hao shou Asaei hao jeiko songdakkei.

⁹Israelbü Jeroboam Choba po saoche boubüa Jihuda thüka Asaei songdakla khangkei.

¹⁰Hobaje Jerusalema haoei po saonyito che songdakkei hoba haoeibü nyu nyen Maaka, Abishalomeibü nouyangshou kikei.

¹¹Hobaje haobou Dawidei kümbü tegü BUNYUBOU thedanga ai janbü ki kho haoei kümbei.

¹²Hobaje haoei bousu si bousu jajasasabü kümsilei apbukei hoba pisibousi shuongei kümbü heangsho pendou haoei apbukei.

¹³Hobaje tokei haoeibü nyu Maaka Chobasao leko kibü ka haoei thaktikei; aieilausi saoei Ashera shanga mangsenlabü heangsho che kümbei hoba Asaei kho heangsho kho wapthetthet apbukei hoba Kidron shumanga kho jikkei.

¹⁴Lausikei shongh kabü lemshang kho haoenei sungan üp; kho khei yingasikei Asaeibü sensimaang haoeibü langkei khümboa BUNYUBOU yoa ngühmaanglanko kikei.

¹⁵Hobaje haoei BUNYUBOU chem to haobouei saüenan phobü peisilei pendou sungbakei hoba haoei saüenbü peisilei chisaknam si honeibü thung shuong BUNYUBOU jungto sungbakei.

¹⁶Hobaje Asa si Israelbü Choba Baasha kanglanga haosieibü langkei sünga wapyo kikei.

¹⁷Hobaje Israelbü Choba Baashaei JIhuda khulimbo angkei hoba Jihudabü Choba Asa jungto aokei apaitila shanga haoei Ramaa kaangbüsekbü laangba yaükei.

¹⁸Hobaje Asaei BUNYUBOU chema peisilei phoshanga kibü hon si chandinam pendou sungkei, hoba Choba chema kibü namsek peisilei sungan khübü kho sambü shuong la kukei; hoba Asa Chobaei Damaskaa kibü Siria Choba, Hezron shou Tabrimmoneibü shou Benhadad jungto hautiko laukei,

¹⁹“Kabou si kübou kanglanga kibü tegü seti kanglanga thangjam kikho; chühashi, ngei ka la hon si chandinam jongsak kutida, hauashi, Israel Choba Baasha kü ka kuklabü lele hao to thangjam leiluashi.”

²⁰Hobaje Benhadadei Asa Choba to ngüha lekei, hoba Israel sangnyu shuong khulimbo haoeibü sepai tan leiyeibü shuong hautiko Ijon, Dan, Abel Beth Maaka hoba Galil Sidang si Naftali kao pendou yoan leilukukei.

²¹Hobaje ladang Baashaei kho ditkei, haoei Ramaa kümbüleibü nangkei, hoba Tirza to ngaikei.

²²Kheijinei Asa Chobaei Jihuda kaodak pendoua ngühlang phinthonkei; aokei ajouti, hoba haoenei Ramaa kibü laang hoba wa laobou Baashaei dangkei pendou sunglangkei, hoba Asa Chobaei Benjamina Geha si Mizpa kümbei.

²³Tou Asaei kümbü kümsilei pendou hoba haoeibü hau pendou hoba haoei kümbü sangnyu pendou Jihudabü Choba shuong Lüngbüdobü lea doan aki lo? Lausikei hao baushilama youa mou longkei.

²⁴Hobaje Asa haoeibü bousi shuong yoa yepbei hoba haoeibü bousi shuong yoa haobou Dawid sangnyua khünkei, hoba hao jeiko hao shou Jehoshafatei songdakkei.

²⁵Jihudabü Choba Asa, songdak po nyi boubüa Jeroboameibü shou Nadabei Israel; thüka songdakla khangkei hoba haoei Israel thüka po nyi songdakkei.

²⁶Hobaje haoei BUNYUBOU thedanga ai amai kho kümbei, hoba haobou paibü tegü haoeibü shedbüei Israelbü la shabü shontikei.

²⁷Hobaje Ahijaeibü shou Baasha Issakhar chungei hao khulimbo kümbei, hoba Baashaei Filistia kabü Gibbetona hao haitikei, aieilausi Nadab si Israelbü pendouei Gibbeton komlepbo kikei.

²⁸Jihudabü Asaei po sem boubü songdakko kijinei Baashaei Nadab haitikei hoba hao jeiko songdakkei.

²⁹Hobaje hao Choba yeisilengko Jeroboameibü mütli pendou haoei haitikei. Jeroboam shanga haoei langkei kibü aokei üpyo; hoba BUNYUBOUei hao khangenbou Shilobü Ahija danko laubü tegü haoei haoen shemtikei.

³⁰Aishanga Jeroboameibü shabü shuong laobou haoei shabü shonkei hoba laobou haoei Israelbü la shed shontikei, kho danko haoei BUNYUBOU, Israel Mühghaü khau angtikei.

³¹Hobaje Nadabei kümbü kümsilei hoba haoei ai ong kümbei khübü kho Israelbü Choba shuong Lüngbüdobü Lea doan aki lo?

³²Hobaje Asa si Baasha haosi kanglanga salang sünga wapyo kikei.

³³Jihudabü Choba Asa, songdak po sem boubüa Ahijaeibü shou Baashaei Tirzaa Israel pendou thüka songdakla khangkei, hoba po anthüklei songdakkei.

³⁴Hobaje haoei BUNYUBOU thedanga shabü ai kho kümbei, hoba Jeroboam hangalama paikei hoba haoeibü shabüei Israel la shabü shontikei.