Read Chang Naga 1 CHOBA SHUONG 16 Bible Online

1 CHOBA SHUONG 16 - Chang Naga bible

1 CHOBA SHUONG 16

¹Kheijinei BUNYUBOUeibü ngüh Hananieibü shou Jehu jungto Baasha khulimbo lenko loukei.

²“Thamngu ka ngei no yaangentikei hoba kü mütli Israel thüka Choba yeitikei, lausikei no Jeroboam lama paikei hoba kü mütli Israel la shabü shontikei hoba haoeneibü shabüei ngo khauangtikei.

³Chühashi, ngei Baasha hoba haoeibü chemdang lemailela kuan aplabü, hoba ngei kaibü chemdang Nebateibü shou Jeroboam chemdang tegü yeitilabü.

⁴Hobaje ao Baasha yoa sangnyua hailaje kei shuongei shaulabü hoba ao hao yoa khongthua hailaje mühkabü au shuongei shaulabü.”

⁵Tou Baashaeibü kümsilei, hoba haoei kümenleienbü pendou, Israelbü Choba shuong Lüngbüdobü lea doan aki lo?

⁶Hobaje Baasha haoeibü bousi shuong yoa yepbei, hoba Tirzaa hao khünkei hoba hao shou Elaei hao jeiko songdakkei.

⁷Hobaje aeilaleko Hananieibü shou Jehu thuseibou danko BUNYUBOU ngüh Baasha hoba haoeibü chemdang khulimbo loukei. Aishanga Baashaei Jeroboam chemdang phatko, hao thea ai amai kho kümbüei ong BUNYUBOU ngangtikei ji, lausikei haoeibü ikei Jeroboam chemdang khümbo shemtikei.

⁸Jihudabü Choba Asaei po saoto lak boubü songdakbü poa Baashaeibü shou Elaei Tirzaa songdakla khangkei, hoba po nyi songdakkei.

⁹Hobaje haoeibü koli kailong jamde thüka leiyeibou hao khangenbou Zimriei hao khulimbei. Jih chenei Ela Choba, Tirzaa Choba chem thüka ikjaibou Arza chema ihei jaakan kikei.

¹⁰Hobaje Zimri lotan Ela Choba wapettikei, hoba hao jeiko songdakkei. Kho Jihuda Choba Asa songdak po saoto nyet boubüa kikei.

¹¹Hobaje ladang haoei songdakla khangkei, hao Choba setshanga setsilengko Baashaeibü chemdang pendou wapettiko bousu shou che ongkei üpyoko, ayingsi chempen ayingsi haoeibü thangbou che ongkei ajoutiko haoei haitikei.

¹²BUNYUBOUeibü ngühei Jehu thuseibou danko Baasha Choba khulimbo laubü tegütham Zimriei chemdang khümbo shemtikei.

¹³Aieilausi Baasha si haoshou Elaei shabü shonkei hoba Israel lakei shontikei; kho ong ayingko heangsho lembüei BUNYUBOU Mühghaü maangshat longtikei.

¹⁴Tou Elaeibü lubü kümsilei hoba haoei kümbü pendou Israelbü Choba shuong Lüngbüdobü lea doan aki lo?

¹⁵Jihudabü Choba Asa, songdak po saoto nyet boubüa Tirzaa Zimriei chalou nyet songdakkei. Tou Israelbü Filistia kabü Gibbeton khulimbo shaian kikei,

¹⁶hoba kaman kibü mütshuongei Zimriei Choba khulimbo lokei hoba hao wapettikei dogo ditkei, kheijinei Israelbü pendouei Omri lajamleibou haoen thüka Choba lela ngekletkei.

¹⁷Hobaje Omri yoa Israelbü pendou Gibbeton ka angkei, hoba haoenei Tirza shikei.

¹⁸Ladang Zimriei sangnyu kho sungan hapbei, hao Choba chem to atkei hoba haoei wanei Choba chem kho thean apbei hoba hao khünei haikei.

¹⁹Aieilausi haoei BUNYUBOU thedanga ai amai kho jungeiko Jeroboameibü lama paikei, hoba haoei ai shabü shonkei khoei haoei Israelbü la shed shontikei.

²⁰Tou Zimrieibü lubü kümsilei hoba haoei khulimbo meimeibü pendou kho Israelbü Choba shuong Lüngbüdobü Lea doan aki lo?

²¹Kheijinei Israelbü penyi la jankei, müt jamdeei Ginateibü shou Tibni Choba yeitila hao phai sembei, hoba jamde Omri phai sembei.

²²Lausikei aoyou Omri phai sembei haoenei Ginat shou Tibni phai sembü danthetko thükkei, hibü Tibni haikei hoba Omriei songdakkei.

²³Jihudabü Choba Asa po khujinto che boubü songdakjinei Omri Israel thüka songdakla khangkei, hoba po anthüknyi songdakkei. Haoei Tir- zaa po lak songdakkei.

²⁴Hobaje haoei Shemer ka Samaria shongh kho chandinam seret khujin bang atbü penyiei jekkei, hoba haoei shongha chem dangkei, hoba haoei dangbü sangnyu Samaria shongh la kao bunyueibü nyenphai Shemer nyenkukei.

²⁵Hobaje Omriei BUNYUBOU thedanga ai amai kho kümbei hoba hao to shaang kibü pendou tokei amaibou haoei kümbei.

²⁶Aieilausi hao Nebateibü shou Jeroboam lama paikei, hoba haoeibü shabüei Israel la shed shontikei, hoba jim akibü heangsho lembü kümeileiei Israel Mühghaü khau angtikei.

²⁷Tou Omrieibü kümsilei lubü haoei ai kümbei hoba haoeibü hau laobou lenkei, khübü kho Israelbü Choba shuong Lüngbüdobü lea doan aki lo?

²⁸Hibü Omri haoeibü bousi shuong yoa yepbei, hoba hao Samariaa khünkei, hoba hao shou Ahabei hao jeiko songdakkei.

²⁹Hobaje Jihudabü Choba Asa, songdak po khujinto set boubüa Omrieibü shou Ahabei Israel thüka songdakla khangkei, hoba Omrieibü shou Ahabei Samariaa Israel thüka po saoto nyi songdakkei.

³⁰Hobaje Om- rieibü shou Ahabei BUNYUBOU thedanga ai amai kho hao thedanga kibü pendou to aei amaibou kümbo shed shonkei.

³¹Hobaje Nebateibü shou Jeroboam shabü shuong thüka pailabü kho kümsilei sosobü che tegü haoei Sidonbü Choba Ethbaaleibü nouyangshou Jezebel kho hao yakla lekei, hoba hao Baal jungto hauan khangenko hao lembei.

³²Hobaje Baal chema haoei Baal shanga lemshon kümbei, laobou haoei Samariaakei dangkei.

³³Hobaje Ahabei Ashera kümbei, hoba haoei Israel Mühghaü BUNYUBOU maangto shattila shangiedbü Choba shuong tokei aei kümbei.

³⁴Hao thudena Bethelbü Hielei Jerikho kümetkei, haoei hao shou jaishoubou Abiram lemla kuko chem kho huong khangkei hoba bakhün shuong kho haoeibü napeibou Segubei lembo kümenkei, hoba kho Naneibü shou Joshua danko BUNYUBOU ngühei laubü tegü loushedkei.