Read Chang Naga 1 CHOBA SHUONG 17 Bible Online

1 CHOBA SHUONG 17 - Chang Naga bible

1 CHOBA SHUONG 17

¹Tou Tishbibü Elija ao Gileada kikei, haoei Ahab to laukei, “Israel Mühghaü BUNYUBOU, ao thedanga ngo loda, hao lang ki shongko ngeibü ngüh to liman, posilit shijo nindei ayingsi lang aloulabü.”

²Hobaje BUNYUBOUeibü ngüh kho hao jungto louan laukei,

³“Haka meimeijung chaang aeto hauashi hoba Jordan thedanga Kerith shumang nyangko hushi.

⁴Hobaje shushou dei kho nyi yunglabü hoba khünei no pangteila ngei aukhomakmak la ngühkhüm kua.”

⁵Hobaje BUNYUBOU ngühei sakkubü tegütham hao haukei hoba haoei kümbei; aieilausi hao hauan Jordan thedanga Kerith shushoua kikei.

⁶Hobaje aukhomakmak shuongei phe si wentek ngeyang si chasem hao la sungbakei, hoba haoei shushou dei yungkei.

⁷Hobaje longche kian shushou kho hapan apbei, aieilausi kaodaka lang alou.

⁸Hobaje BUNYUBOU ngüh hao jungto louan laukei,

⁹“Meimeiashi, hoba Sidona kibü Zarefath to no hauashi hoba khünei kishi. Chühashi, khonei kibü latnyu che la no samla ngei ngühkhüm kua.”

¹⁰Hibü hao meimeijung Zarefath to haukei; hoba ladang haoei sangnyu bakhün sühkei, chühashi, latnyu che khünei bu lakko kikei. Hobaje haoei sao to laukei, “Sanoudambo kü la yungla dei shijo sungba.”

¹¹Hobaje saoei kho sungbala hauko kijinei haoei sao ngakei hoba laukei, “Kü la nyak ikkhong che sungbakushi.”

¹²Hobaje saoei laukei, “BUNYUBOU kaibü Mühghaü lang kijinei ngei lauda, kü ika nyak aki, lausikei angthunga ang ikkhong che ong kia hoba onang thungdoua onang shijo kia; hoba chühashi, kü shou küsi kho shauan haila shanga ngei bujikshou heda.”

¹³Hobaje Elijaei sao to laukei, “Tehüt, hauashi, hoba nyi laubü tegü kümashi; lausikei shaangla kü la wentek hanbü che kümbü, hoba kho kü la sungbakushi, hoba phaila kashou kasi shanga kümshi.

¹⁴Aieilausi Israel Mühghaü BUNYUBOUei hai lauda, ‘BUNYUBOUei kaodak to lang ayanti shongko kaibü angthung si onang thungdou kong akilabü.’ ”

¹⁵Hobaje saoei hauan Elijaei laubü tegütham kümbei hoba sao si saoeibü chemdang hoba Elija haoen chalou juong shaukei yungkei.

¹⁶Elijaei BUNYUBOU ngühei laubü tegütham angthung akhüm ayingsi onang thungdou ladangkei akhin.

¹⁷Hobaje khübü chalou danan phaia yaksanyueibü shou kho shatkei, hoba hao aeibou shatko khei hau thonan apbei.

¹⁸Hobaje saoei Elija to laukei, “O Mühghaü müt, nyi kü to ai kümda? No ngeibü shabü damentila hoba kü shou haitila loukei sai?”

¹⁹Hobaje haoei sao to laukei, “Ka shou kü la labü.” Hobaje haoei hao yaksanyueibü khukhu ka bamletkei, hoba hao kishang shemjang to leian loukei, hoba haoei haoeibü shena phokei.

²⁰Hobaje haoei BUNYUBOU to ngekko laukei, “O ngeibü Mühghaü BUNYUBOU, ngo sühan kibü latnyueibü chem to nyi saoeibü shou haitila amaibü sungbakei lo?”

²¹Hobaje haoei semnei sühko nashou khüto thipyolangkei hoba BUNYUBOU to ngekko laukei, “O BUNYUBOU ngeibü Mühghaü, no nashoueibü langkei soushou hao jungto ngaitikushi dogo ngei welauda.”

²²Hobaje Elijaeibü ngüh BUNYUBOUei ditkei, hoba nashouboueibü soushou kho nyibou hao jungto sepeinyu longeikei hoba hao langngaikei.

²³Hobaje Elijaei nashou kho baman sungkei, hoba haoeibü shemjang ka haoei chem to leian yankei, hoba haoei hao nyu la kuko laukei, “Chühashi, ka shou lang kia.”

²⁴Kheijinei yaksanyuei Elija to laukei, “Tou ngei no Mühghaü müt dogo ngeda, hoba kaibü sembunga BUNYUBOU ngüh kho tükde kia!”