Read Chang Naga 1 CHOBA SHUONG 19 Bible Online

1 CHOBA SHUONG 19 - Chang Naga bible

1 CHOBA SHUONG 19

¹Tou Elijaei kümbü pendou hoba haoei thuseibü shuong lai küman inei haitikei pendou kho Ahabei Jezebel to lenkei.

²Kheijinei Jezebelei Elija jungto ngühlang künbü che hautiko laukei, “Ngei kaibü langkei kho ho tegübü chaloua haoen yoa che tegütham akümlonga, mühghaü shuongei kü to aei kümshi.”

³Elijaei kho ditan hatkei hoba meimeijung jembü langkei shanga satkei, hoba Jihuda kaodak Beersheba to louan haoeibü sambü khünei apyokei.

⁴Lausikei hao mütpem chalou che lam sangliphang to haukei hoba juniper bulong che phanga setkei hoba hao hao lolo haila shanga sukojako laukei, “Hoei soua, O BUNYUBOU, ngeibü langkei sunglangashi; aieilausi ngo ngeibü pisibousi to maibouje aying!”

⁵Hobaje juniper bulong phang khünei yepbei hoba chühashi, khuthük hangangbü cheei hao to meitikei hoba laukei, “Meimeiashi hoba shauashi.”

⁶Hobaje haoei chühsi haoeibü khukhüma wankak yasebüa kaangbü wentek si dei thungdou che kikei; hoba haoei kho shauan yungan nyibou yepbei.

⁷Hobaje BUNYUBOU khuthük hangangbü nyibou louan hao to meitiko laukei, “Meimeiashi, hoba shauashi; aieilausi ka shanga wakou aeibou saakei.”

⁸Hobaje hao pikei hoba shaukei yungkei hoba kho shaubü yungbü hauei chalou saonyi hoba langyang saonyi Mühghaü Shongh Horeb to angkei.

⁹Hobaje hao laangbob che to louan khünei kikei, hoba chühashi, BUNYUBOU eibü ngüh hao jungto louan laukei, “Elija, no hanei ai kümda?”

¹⁰Hobaje haoei laukei, “BUNYUBOU Mühghaü, Thükenbü shuong shanga ngo aeibou maang dühda. Aieilausi Israel shousi pendouei theyolanyobü wailetda hoba kaibü lemshon leilukukei hoba kaibü thuseibü shuong inei haitikei, hoba khei ngo kü mütpem joukei hoba haoenei ngeibü langkei lela lamda.”

¹¹Hibü haoei laukei, “Hauashi hoba BUNYUBOU thedanga shongh khünei loashi.” Hobaje chühashi, BUNYUBOU danjung haukei, hoba yeithu yeinak louan shongh shuong kho jitnyinkukei hoba BUNYUBOU thedanga laang shuong phetnyinkei, lausikei BUNYUBOU yei khünei akitei: yei phaia selo nyikei, lausikei selo nyibü khünei BUNYUBOU akitei.

¹²Hobaje selo nyian phaia wan loukei, lausikei wan khünei BUNYUBOU akitei; hoba wan phainei ngühlang hanbü che loukei.

¹³Hobaje ladang Elijaei kho ditkei haoeibü neiei jembü thenyek yuklepan haukei, hoba laangbob nyangko lokei, hoba chühashi, hao jungto ngüh che louan laukei, “Elija, no hanei ai kümda?”

¹⁴Kheijinei haoei jongaikei, “BUNYUBOU Mühghaü Thükenbü shuong shanga ngo aeibou maang dühda, aieilausi Israel shousi pendouei ka to theyolanyobü waileda, kaibü lemshang leilukukei hoba kaibü thuseibü shuong inei haitikei, hoba khei ngo kü müt- pem joukei, hoba haoenei ngeibü langkei lela lamda.”

¹⁵Hobaje BUNYUBOUei hao to laukei, “Kaibü lamnyu to sepeian Damaska yamlamang kaoen to hauashi hoba no ladang sühlanglaje, Siria thüka Choba lela nyi Hazael naangenko pienashi.

¹⁶Hobaje Israel thüka Choba lela nyi Nimshieibü shou Jehu naangenko pienashi, hoba Abel Mehola ka Shafat shou Elisha, ka jeila thuseibü lela nyi naangenko pienashi.

¹⁷Hobaje Hazaeleibü in ka satenbü müt kho Jehuei haitilabü, hoba Jehueibü in ka satenbü müt kho Elishaei haitilabü.

¹⁸Tokei ngei Israela Baal mühghaü thedanga akhüpetbü shuong hoba heangsho to sembung ashepbü shuong hajar nyet kü shanga phoyolabü.”

¹⁹Hibü hao khüka bangkei hoba Shafat shou Elisha hapbei. Hao masu pongsu dang anthüknyi yoa hoba khübü anthüknyi boubü tang yoa hao sek shapbo kikei. Elija hao nyangko haukei hoba haoeibü nei neikukei.

²⁰Hobaje haoei masu pongsu shuong kho apyoan Elija jungto laangjung hauan laukei, “Ngei kübou si künyu to sembung shepla ka to sudajada, kho phaia ong ka phaito semlabü.” Hobaje Elijaei hao to laukei, “Ngaiashi, ngei no ashiletda!”

²¹Hobaje haoei hao phai asembo ngaikei; sek shapbü masu pongsu shuong kho leijung louan haitikei hoba sek shapbü peisilei jikan phe kho thungkei hoba mütshuong la okkei hoba mütshuongei kho shaukei. Kheijinei hao meimeijung Elija phaito haukei hoba hao khangenkei.