Read Chang Naga 1 CHOBA SHUONG 2 Bible Online

1 CHOBA SHUONG 2 - Chang Naga bible

1 CHOBA SHUONG 2

¹Ladang Dawid hailabü jih sühjung loukei, haoei hao shou Solomon to laukei,

²“Ngo kaodakbü pendou haangphaito hauda; hibü no hau kiashi, hoba müt che dogo no lolo lenenashi;

³hoba BUNYUBOU kaibü Mühghaü ka yoa phoshi: Haoeibü lamnyua paiashi, hoba haoeibü ngühkhümdeikhüm, hao ngühkhüm, hoba haoeibü takletbü sakkubü, hoba haoeibü aukabü, Mosa ngühkhüma dobü tegütham; nyi ai ong kümlaje hoba no laiaeto ong haulaje, khünei püngla juongla nyi jungeiashi.

⁴Kü shangabü laubü BUNYUBOUei haoeibü ngüh haüthüktilabü. ‘Ka shousi shuongei jembü sensimaang pendouei hoba jembü soushou pendouei ngühmaia kü thedanga paia longa, haoeneibü kümaleia maangkua longa, Israel Choba setshanga müt che settila no athükamin alottilabü,’ dogo BUNYUBOUei lauda.

⁵“Zeruiaeibü shou Joabei kü to ai kümbei khokei nyi aei ngekei; Israelbü lakjaibou leiyeibou tan penyi to haoei ai kümbei khokei, hoba Nereibü shou Abner, hoba Jethereibü shou Amasa, aoyou haoei haitikei, hoba sangmai jihsiphaia phoklambü sii apbei, hoba haoeibü shenjanga kaian kibü shembea hoba haoeibü youa lonan kibü ngoka kho ashedbü sii kakkei.

⁶Hibü kaibü songsihonei jembü tegü kümashi, lausikei haoeibü khuthubü kho hee to sangmaia tütti.

⁷“Lausikei Gileadbü Barzillai shousi shuong to sanou lenshi, hoba ka yoa denshanga shaubü- yungbü shuong haoen yingtishi; aieilausi ngo kajai Absalom ka sateijinei haoen kü jungto loukei.

⁸“Hobaje chühashi, Geraeibü shou Shimei, Bahurim ka Benjaminbü, aoei ngo Mahanaim jungto haubü chaloua kü to khükkeiuokkei, hao ka yoa kia, lausikei kü to haüyola Jordan to louyenkei, hoba ngei BUNYUBOUa theyolanyoko laukei, ‘Ngei no inei ühaitilabü.’

⁹Tou hibü, hao shedbü aki dogoje teweei, aieilausi no songsihon kibü müt; hoba nyi hao to ai kümla kho ngelabü; hoba nyi haoeibü khuthubü kho sii yoa hee to künlabü.”

¹⁰Hobaje jembü bousi shuong yoa Dawid yepbei hoba Dawid sangnyua khünkei.

¹¹Hobaje Dawidei jembü mütli Israel thüka po saonyi songdakkei kho haoei Hebrona po nyet hoba Jerusalema po khujinto sem songdakkei.

¹²Hobaje haobou Dawid setshanga Solomon setkei hoba haoeibü sangle aeibou yaangko yaükei.

¹³Kheijinei Haggit shou Adonija, Solomoneibü nyu Bathsheba jungto loukei. Hobaje saoei laukei, “No sangmaia louda sai?” Hobaje haoei laukei, “Sangmaia louda.”

¹⁴Tokei haoei laukei, “Ngei ka to lenlabü denche kia.” Hobaje saoei laukei, “Lenashi.”

¹⁵Hobaje haoei laukei, “Sangle kho ngeibü dogo nyi ngekei hoba kü la songdaktila Israel shousi pendouei kü to chühda, lausikei sangle kho sepeia hoba künaeibü la yeia; aieilausi kho BUNYUBOU ka hao shangabü kikei.

¹⁶Hobaje tou ngei ka to denche sudajada. Kü to üh dogo telau.” Hobaje saoei hao to laukei, “Lenashi.”

¹⁷Hobaje haoei laukei, “Shunam sao Abishag kü yakla lela kushi dogo nyi Solomon to lenla ngei sudajada.”

¹⁸Hobaje Bathshebaei laukei, “He, ngei ka shanga Choba to joyolabü.”

¹⁹Hibü Bathsheba Adonija shanga Solomon to joyola haukei. Hobaje Chobaei meimeian sao to joyola lokei hoba hao lolo sao thedanga khüpetkei hoba haoeibü Choba setshanga setkei; hoba haoeibü nyu setla Choba setshang che kukei, hoba sao haoeibü maeaenei setkei.

²⁰Kheijinei saoei laukei, “Ngei ka to hanbüshou den che sumang jamang sühda, kü to üh dogo telau.” Hobaje Chobaei sao to laukei, “Anyu, pheashi, ngei ka to üh dogo alaulabü.”

²¹Hobaje saoei laukei, “Shunam sao Abishag kho kaibü jai Adonijaeibü yak la lela kuashi.”

²²Hobaje Solomon Chobaei haonyu to jongaiko laukei, “Adonija shanga Shunam sao Abishag nyi aila pheda? Hao shanga sanglekei pheashi; aieilausi hao küjai; hao shangakei hoba ungshedbou Abiathar shanga hoba Zeruia shou Joab shangakei pheashi!”

²³Kheijinei Solomon Chobaei BUNYUBOU nyena thekolanko laukei, “Mühghaüei kütokei khei kümashi, tokei aeilaleko Adonijaei jembü langkei khulimbo habü ngüh lauan kia longa!

²⁴Hibü, tou BUNYUBOU, aoei ngo kümsemkukei, hoba kübou Dawid setshanga ngo settikei hoba aoei kü la sangle che kukei, hao lang ki shongko, haoei thekubü tegü maimaitham tat chaloua Adonija haitilabü!”

²⁵Hobaje Solomon Chobaei Jehoiada shou Benaia hautiko hao thükto tomanshattiko hao haitikei.

²⁶Hobaje ungshedbou Abiathar to Chobaei laukei, “Kaibü seksichem Anathot to satashi, aieilausi no haila mua; lausikei ngei no touje ühaitilabü, aieilausi kübou Dawid thedanga BUNYUBOU Mühghaü Saopobü Busen nyi pekei hoba kübou khonsak pendoua nyikei khonsak janyokei.”

²⁷Hibü Shiloa Eli chemdang shanga haoei ai laukei, BUNYUBOUeibü ngüh loushedla shanga BUNYUBOUeibü ungshedbou kümsilei ka Solomonei hao shian sattikei.

²⁸Hobaje ngühlang kho Joab jungto loukei; aieilausi Joabei Absalom aei asepeisikei, haoei Adonija aeto sepeikei, hoba Joab BUNYUBOUeibü neichem to satetlangkei, hoba lemshon laang thona ikphen lambei.

²⁹Hobaje Joab BUNYUBOUeibü neichem to satetlanga hoba lemshang shona kia dogo Solomon Choba to lenkei. Kheijinei Solomonei Jehoiada shou Benaia hautiko laukei, “Hau- ashi, hoba hao to bauyolangashi!”

³⁰Hobaje Benaia BUNYUBOU chem to louan hao to laukei, “Chobaei hai lauda, ‘Kaiyanga!’ ” Hobaje haoei laukei, “Aying, ngo hanei hailabü.” Hobaje Benaia nyibou Choba jungto ngühlang künan louan, “Joabei khei jongaida,” dogo lenkei.

³¹Hobaje Chobaei hao to laukei, “Haoei laubü tegü kümshi. Hobaje kübou chem ka, hoba kü ka ai aukabü akiko Joabei müeibü sii angtibü shedbü künlangla shanga hao haitiashi hoba hao khünashi.

³²Hobaje BUNYUBOUei haoeibü sii kho haoeibü khua phokulabü; aieilausi haoei hao to maibou hoba saopobou müt nyi to ik shatkei hoba haoeibü inei haosi haitikei. Aishanga kübou Dawideikei angeko Nereibü shou Abner, Israelbü lakjaibou lajamleibou si Jethereibü shou Amasa, Jihudabü lajamleibou, haokei aphokeiko haitikei.

³³Hibü haoeneibü sii Joabeibü khua kilabü, hoba haoeibü shisishousieibü khua pon- pendou kilabü. Lausikei Dawid si haoeibü shisishousi, haoeibü thensilen hoba haoeibü Choba setshanga BUNYUBOU ka ponpen thon akiko sangmai kilabü.”

³⁴Hibü Jehoiada shou Benaia angkei hoba hao ngüman tuongtian haitikei hoba yam aenei haoeibü chema khünkei.

³⁵Hobaje Chobaei Jehoiada shou Benaia lakjaibou Joab jeila lajamleibou yeitikei. Hobaje Chobaei ungshedbou Abiathar jeiko ungshedbou Zadok haoeibü setshanga settikei.

³⁶Hobaje Chobaei Shimei ngala hautiko hao to laukei, “Nyi Jerusalema ka shanga chem che dangashi hoba no khüka tesat.

³⁷Aieilausi laobou chaloua no Kidron shumang danjung haulaje, nyi ho maisho ngeashi, no tükde hailabü; hoba kaibü sii kaibü khua kilabü.”

³⁸Hobaje Shimeiei Choba to laukei, “Nyi laubü kho maiakei, ngeibü bunyubou Chobaei laubü tegü no khangenbouei jungeilabü.” Hobaje chalou juong Shimei Jerusalema kikei.

³⁹Hobaje po sem thonko loujinei, Gatbü Choba Maakaeibü shou Akhish jungto Shimeieibü sambü müt nyi satkei. Hobaje haoenei Shimei to laukei, “Chühashi, no khangenbü shuong Gata kia.”

⁴⁰Hobaje Shimei meimeijung haoeibü gadu lamlean Akhish jungto haoeibü khangenbü lamla Gat to haukei, hoba haoeibü khangenbü shuong Gat ka leian loukei.

⁴¹Ladang Shimei Jerusalem ka Gat to hauan nyibou longeia dogo Solomon to lenkei,

⁴²Chobaei youkobü hautiko Shimei ngajung louan hao to laukei, “BUNYUBOU nyena ngei ka la thetilantiko no shiletko, ‘No laonyet Jerusalem ka meimeilaje no tükde hailabü,’ dogo alau lo? Hobaje nyi kü to laukei, ‘Nyi laubü kho maiakei, ngei ngüha lelabü.’

⁴³Khülonga aila nyi BUNYUBOU nyena thebülanbü hoba ka la sakkubü ngüh tükde ajungei?”

⁴⁴Chobaei tokei Shimei to laukei, “Nyi kübou Dawid thedanga kümbü kaibü maang- pona huan phobü amaibü pendou nyi ngekei, hibü BUNYUBOUei kaibü amaibou kho kaibü khua jinkulabü.

⁴⁵Lausikei Solomon Choba haükulabü, hoba Dawid Choba setshang BUNYUBOU thedanga ponpen thon akiko hau kilabü.”

⁴⁶Hibü Chobaei Jehoiada shou Benaia la ngühkhüm kukei hoba hao tomatlangan ik shatkei hoba hao haikei. Hobaje Solomoneibü ika sangle kho hau kiko yaükei.