Read Chang Naga 1 CHOBA SHUONG 20 Bible Online

1 CHOBA SHUONG 20 - Chang Naga bible

1 CHOBA SHUONG 20

¹Tou Siriabü Choba Ben- hadadei haoeibü lakjaibü dan pendou leishaikei, hoba hao yoa Choba khujinto nyi hoba koli si koli kailong kikei, hoba haoei angan Samaria komlepbei hoba kho khulimbo wapyokei.

²Hobaje Israelbü Choba Ahab jungto ngühlang künbü hautiko hao to laukei,

³“Benhadadei hai lauda, ‘Kaibü chandinam si kaibü hon kho kü shangabü, kaibü yaksi shuong hoba kaibü shousi shuong, hoba khei maiboutham pendou kho kü shangabü.’ ”

⁴Hobaje Israel Chobaei jongaiko laukei, “Nyi laubü tegü, O Choba, ngeibü bunyubou, ngei kibü pendou ka shangabü.”

⁵Hobaje ngühlang künbü shuong kho nyibou louan laukei, “Benhadadei hai lauda, ‘Ngei tükde kaibü chandinam, kaibü hon, kaibü yaksi shuong hoba kaibü shousi pendou kü la khümbo kubü, dogo lauko hautikei;

⁶lausikei ngei ngiet ho jiha khangenbü shuong hautilabü hoba haoenei kaibü Choba chem, no khangenbü shuongeibü chem hoba haoeneibü the to loubü pendou to ik shatlabü hoba sunglanglabü.’ ”

⁷Kheijinei Israel Chobaei kaonyeka jaishou shuong pendou ngashaian laukei, “Ho müt hoei ailaibü amaibü lamda kho chühletnyu phoashi dogo ngei sudajada; aieilausi haoei ngeibü yaksi shuong hoba kü shousi shuong, chandinam hoba hon shanga hautikei hoba ngei hao la atheletko aki.”

⁸Hobaje jaishou shuong hoba müt pendouei hao to laukei, “Nyi hao to ngüha tele ayingsi kula tethelet.”

⁹Khünei haoei Benhadadeibü ngühlang künbü shuong to laukei, “Ngeibü Choba bunyubou to laushi, ‘Nyi shaangla no khangenbü shuong jungto ai shanga hautikei kho ngei kümlabü, lausikei toubü hoje ngei athüklabü.’” Hobaje ngühlang künbü shuong kho bangkei hoba hao jungto nyibou ngühlang künbakei.

¹⁰Hobaje Benhadadei hao jungto hautiko laukei, “Kü phainei sembü pendou shanga Samariabü thamnguei soualonga mühghaü shuongei kü to aeikei kümshi.”

¹¹Kheijinei Israel Chobaei jongaikei, “Hao to lenshi: ‘Lakjaibü hele leakei dogo ong, kho sungan apbula thükbou tegüthamje asungenjan.’ ”

¹²Hobaje ladang Benhadad si Choba shuong shaishanga shauko yungko kikei, ho ditan hao khangenbü shuong to laukei, “Kan lamlean lin küman loashi.” Hobaje sangnyu kho khulimbo lamlean lin küman lokei.

¹³Kho jihsiphaia thuseibü che Israel Choba Ahab jungto louan laukei, “BUNYUBOUei hai lauda: Nyi habü tan yaangbü ho haplao? Chühashi, tat ngei ho tan kaibü ik to khümbo kulabü hoba nyi ngo BUNYUBOU dogo ngelabü.”

¹⁴Hobaje Ahabei laukei, “Kho aoei kümla?” Hobaje thuseibouei laukei, “Kaonyeka Choba shousi daneibü heshou shuongei, dogo daneibü BUNYUBOUei lauda.” Kheijinei haoei laukei, “Lason kho aoei leila?”

¹⁵Hobaje haoei jongaikei, “Nyi khanglabü.” Hobaje haoei kaonyeka Chobaeibü heshou shuong liko ngashaikei hoba haoen saoanto khujinto nyi kikei; hoba haoen phaito Israel shousi pendou yoshaitikei, hoba haoen hajar nyet kikei.

¹⁶Hobaje haoen chanyu chajiha haukei, kheijinei Benhadad yoa thuiyobü Choba khujinto nyi yoan ihei jaaketkotham yungyoko kikei.

¹⁷Hobaje kaonyeka Choba shousi shuong hoba heshou shuong shaang haukei. Hobaje Benhadadei hautibü danei hao to laukei, “Samaria ka mütshuong louada.”

¹⁸Hobaje haoei laukei, “Haoen sangmai shanga loua tegükei, ayingsi wapyola loua tegükei, haoen lang ong lapshi.”

¹⁹Hibü khübü kho sangnyu ka haukei, hoba haoen phainei sepai tan sembei.

²⁰Hobaje haoen mütpem wekoei lulueibü labou thükkei, hoba Siriabü hatla satyokei, hoba Israelbüei haoen shijung haukei; lausikei Siriabü Choba Benhadad kolia setan haoeibü koli leibü shuong yoa hao satenkei.

²¹Hobaje Israelbü Chobaei hauan koli shuong hoba koli kailong pendou shemtikei, hoba Siriabü juong haitikei.

²²Hobaje Israel Choba jungto nyangko thuseibou louan hao to laukei, “Hauan no lolo hau kingaiashi, hoba nyi ai kümda kho nyi ngean phoashi; aieilausi loulabü poa Siriabü Chobaei no khulimbo loulabü.”

²³Kheijinei Siria Choba Ben- hadadeibü khangenbü shuongei hao to laukei, “Haoeneibü mühghaü shuong kho shongh shuong mühghaü ki, hibü haoen sen toje hau kibou; lausikei senei haoen khulimbo pholi khünei wapyokho, hoba tükde haoen toje sen hau kibou yinglabü.

²⁴Hobaje ho kümashi; Choba khujinto nyi kho lulu loshang ka kuktiashi, hoba haoen jeila lajamleibou shuong phokushi.

²⁵Hobaje nyi danbüa maubü sepai jeila sepai, koli shanga koli, koli kailong shanga koli kailong dogo lamlean phoshi hoba haoen khulimbo senei pholi khünei wapyolabü hoba tükde haoen toje sen hau kibou yinglabü.” Hobaje haoei haoenei laubü ditkei hoba kho tegü kümbei.

²⁶Hobaje po nyiboua Benhadadei Siriabü pendou leishaikei hoba Israelbü khulimbo wapyola Afek to angkei.

²⁷Israel shousi shuong liko kamshaian lamlekei hoba hao khulimbo haukei hoba Siriabü shaibü to tangküngyoko shaikei; hoba Israel shousi shuong lonshou tan hanbü tegü shaikei, lausikei Siriabüei kaonyek yeplepbei.

²⁸Kheijinei Mühghaü müt che nyangko louan Israel Choba to joyoko laukei, “BUNYUBOUei hai lauda, Siriabüei BUNYUBOU kho shongh kabü mühghaü ki, hoba hao pholi kabü mühghaü aying, dogo damda, hibü ngei ho tan yaangbü ho kaibü ik to khümbo kulabü, hoba kanei ngo BUNYUBOU dogo ngelabü.”

²⁹Hobaje chalou nyet sühko haoen cheei che khulimbo shaikei. Hobaje nyetbounyet lason shuokkei; hoba Israel shousi shuongei chalou chenei ong youeibü sepai hajar saongao haitikei.

³⁰Lausikei joubü shuong kho Afek sangnyu to linjung satkei, hoba joubü hajar saoto nyet thükto kümthang kho nopthetjung koukei. Hobaje Benhadad satenkei hoba sangnyu to louan maangkabou shemjanga hukei.

³¹Hobaje haoeibü khangenbü shuong hao jungto louan laukei, “Tou chühashi, Israelbü Choba shuong üeisanou kakbü Choba shuong dogo künei ditkei, hibü kün senounei neian hoba khua nei shenan Israel Choba Ahab jungto hauan sukojako dogo ka to sudajada; aingenyu haoei kaibü langkei püetlabü.”

³²Hibü haoen senounei neian hoba khua lüh shenan Israel Choba jungto hauan laukei, “No khangenbou Benhadadei lauda, ‘Ngo lang kitishi dogo sudajada.’ ” Hobaje haoei laukei, “Hao ngeibü jaisina, tokei hao lang kia lo?” dogo haoei phekei.

³³Tou mütshuongei kaangko chühkei hoba haoei maangangbü yinglaoje panteiko phekei hoba haoenei “Kaibü jaisina Benhadad” dogo laukei. Kheijinei Chobaei “Kan hauan hao leiba” dogo laukei. Kheijinei Benhadad hao jungto loukei, hoba Ahabei hao haoeibü koli kailong to leiyetkei.

³⁴Hobaje Benhadadei hao to laukei, “Sangnyu shuong laobou kübouei kabou ka sungkei kho ngei kungailabü; hoba kübouei Samariaa kümbü tegü nyi Damaskaa namseishang kümla thükkei.” Ahabei jongaikei, “Ngei ka to ho theyolanyobü lean no litilabü.” Hibü haoei hao to theyolanyobü che kümbei hoba hao ngaitikei.

³⁵Hobaje thuseibü shousi yoa cheei BUNYUBOUeibü ngühei hao maangjambou to laukei, “Kü to ngümbei dogo ngei ka to sudajada.” Lausikei müt khoei hao to ngümla maang üang.

³⁶Kheijinei haoei hao to laukei, “BUNYUBOUeibü ngüh to nyi ngüha ale yingsije, chühashi, no kü ka bangsilengko molosaonyu cheei no taketlabü.” Hobaje müt kho hao ka bangsilengko molosaonyu cheei hao taketkei.

³⁷Kheijinei haoei lubü che hapan hao to laukei, “Kü to ngümbei dogo ngei ka to sudajada.” Hobaje müt khoei hao to ngüman hao la aktikei.

³⁸Hibü thuseibou kho bangjung haukei hoba hao lolo müla ashentiko lama Choba haiyeiko kikei.

³⁹Hobaje Choba danjinei, haoei Choba to ngekko laukei, “No khangenbou wapyo yaak to atkei hoba chühashi, müt cheei kü jungto müt che lang senbaan laukei, ‘Müt ho lomshi, laiche küman haoeibü langkei mausi haoeibü langkei jeila ka langkei lelabü, ayingsi chandinam hajar sem nyi atjan.

⁴⁰Hobaje khangenbou hihinei akongko kibüei hao satan apbei.’” Hobaje Israel Chobaei hao to laukei, “Nyi lauenbü tegütham kaibü matjem kilabü.”

⁴¹Hobaje haoei panteiko haoeibü thenyek yuklepbü kho sungan apbei hoba Chobaei hao thuseibü shuong yoa che dogo chühenkei.

⁴²Hobaje haoei hao to laukei, “Nyi laobou langkei haitila ngei kaibü ikto kukei, hao sattisije haoeibü langkei jeiko kaibü langkei hoba hao mütli jeiko ka mütli langkei lelabü dogo BUNYUBOUei lauda.”

⁴³Hobaje Israel Choba maangto shatko hao chem lambo Samaria to ngaikei.