Read Chang Naga 1 CHOBA SHUONG 21 Bible Online

1 CHOBA SHUONG 21 - Chang Naga bible

1 CHOBA SHUONG 21

¹Tou Samariabü Choba Ahabeibü chem nyangko Jezreela Naboteibü semlühlaak che kikei.

²Hobaje Ahabei Nabot to pheko laukei, “Bamang che lean kesiong jinla kaibü semlühlaak kho kü la kubü: aieilausi ho ngeibü chem nyangakei hoba hoto maibou semlühlaak che ngei ka la kulabü, ayingsi nyi mangsüha longa ngei nama muko kulabü.”

³Hobaje Nabotei Ahab to laukei, “Küboueibü phet ngei ka la kula BUNYUBOUei shiletda!”

⁴Hobaje Ahab haoeibü chem to maang aeibou angesakko ngaikei; aieilausi Jezreelbü Nabotei, “Ngeibü phetphan ngei ka la akulabü” dogo hao to laukei. Hobaje hao haoeibü shena kümthang ae yeian nongan thekhüman lengkei hoba ai ashau.

⁵Lausikei hao yak Jezebel louan hao to laukei, “Aiei kaibü soushou maangto shattida, hoba nyi aila ashau ayungda?”

⁶Hobaje haoei sao to laukei, “Jezreelbü Nabot to, ‘Kaibü semlühlaak namei jekkho, ayingsi nyi maanganga longa lubü semlühlaak che kukho’ dogo ngei phekei, lausikei haoei ‘Ngei ka la semlühlaak akulabü’ dogo laukei!”

⁷Hobaje hao yak Jezebelei hao to laukei, “Nyi tou Israel sangle thüka songdakda aying lo? Meimeiashi, shauayungashi, hoba no olinko kishi. Jezreelbü Naboteibü semlühlaak kho ngei ka la kulabü.”

⁸Hibü saoei Ahab nyena Nabot kibü sangnyua kibü jaishou shuong hoba yaangenbü shuong jungto le doan maisho khinlepan hautikei.

⁹Hobaje saoei lea hai lauko dokei, “Pendou huishaiashi, hoba shuong thüka Nabot shongha settiashi.

¹⁰Hobaje müt nyi la hao khulimbo haoei Mühghaü si Choba to khükauoka dogo lautiashi, hoba hao leiyenan laangei sonan haitiashi.”

¹¹Hobaje sangnyua kibü shuongei, jaishou shuongei hoba yaangenbü shuongei Jezebelei lea doan haoen to lenbü tegü haoenei kümbei.

¹²Hobaje haoenei pendou huishaikei hoba müt pendou thüka hao shongha settikei.

¹³Hobaje sousiwat hao nyangko louan setkei hoba sousiwat müt nyi khoei Nabot khulimbo mütshuongei ditko aukabü kuko loan laukei, “Nabotei Mühghaü si Choba khulimbo khükdauokda.” Kheijinei haoenei hao sangnyu ka senjung longan hao to laangei sonko hao haitikei.

¹⁴Kheijinei haoenei Jezebel jungto ngühlang hautiko laukei, “Nabot laangei tetetnyu haitia.”

¹⁵Hobaje ladang Jezebelei Nabot laangei sonettia dogo ditkei, Jezebelei Ahab to laukei, “Meimeiashi, hoba Jezreelbü Naboteibü semlühlaak laobou haoei nam lu akulabü dogo laukei, kho sungashi aieilausi Nabot lang aki, hao haia.”

¹⁶Hobaje ladang Ahabei haia dogo ditkei, Jez- reelbü Naboteibü semlühlaak to hao haukei hoba kho haoei lekei.

¹⁷Kheijinei BUNYUBOU ngüh Tishbibü Elija jungto louan laukei,

¹⁸“Samariaa kibü Israelbü Choba Ahab to haüyola no meimeijung hauashi, chühashi, Naboteibü semlühlaak to kouan haoei kho lela hauakei.

¹⁹Hobaje BUNYUBOUei hai lauda: ‘Nyi haitian müeibü nyaksinam sungda lo?’ Hobaje nyi hao to lenlabü, BUNYUBOUei hai lauda: ‘Laobou kaoena kei shuongei Naboteibü sii sekei, khonei kaibü sikei keiei selabü.’ ”

²⁰Ahabei Elija to laukei, “O ngeibü dangbou, nyi ngo hapa lo?” Hobaje haoei jongaikei, “Ngei no hapa, aieilausi BUNYUBOU thedanga ai amaibü ki, kho jungeiko nyi no lolo no yaakkei.

²¹Chühashi, ngei ka jungto amaibü sungbalabü hoba ngei no lemailela kuan aplabü, hoba Ahab ka bousu shou pendou wapan aplabü, khühbü si solobü Israela jouan kibü pendou shemtilabü.

²²Hobaje Nebateibü shou Jeroboam chung si Ahijaeibü shou Baasha chemdang tegü kaibü chemdang yeilabü; aieilausi nyi ngo maangto shattikei hoba Israelbü la shabü shontikei.

²³Hobaje Jezebel shangakei BUNYUBOUei joyoko laukei, ‘Jezreel kümthang phanga kei shuongei Jezebel shaulabü.’

²⁴Ahab chemdang kabü aoyou sangnyua hailaje keiei shaulabü hoba ao seka hailaje mühkabü au shuongei shaulabü.”

²⁵(BUNYUBOU thedanga ai amaibü ki kho kümla hao yak Jezebelei thungeijangeisije hao lolo yaakan shaubü Ahab tegü lubü aokei aki.

²⁶Hobaje haoei BUNYUBOUei Israelbü thedang ka shian apbü Amorbüei jungeibü mangsenlabü heangsho lembü kümsilei kümbei.)

²⁷Hobaje ladang Ahabei kho ditkei, haoei haoeibü neisimei jitnyinkei hoba haoeibü manga senounei neiko hoba mühei nyengko aeibou khonsak yaang lekei.

²⁸Hobaje Tishbibü Elija jungto BUNYUBOU ngüh louan laukei, “Ahabei ailai hao lolo kü thea hanbüla yeikei nyi hapdalao?

²⁹Hao eaaoa yeibü shanga ngei haoeibü jihsiphaia amaibü ai akulabü lausikei hao shou jihaphaia hao chemdang to khonsak hautikulabü.”