Read Chang Naga 1 CHOBA SHUONG 3 Bible Online

1 CHOBA SHUONG 3 - Chang Naga bible

1 CHOBA SHUONG 3

¹Kheijinei Solomonei Ijepbü Choba Farao to yen lambei hoba Faraoeibü shou yakla ngakei hoba haoei haoeibü chem hoba BUNYUBOUeibü chem hoba Jerusalem kümthang kaijembo ayei shongko Dawid sangnyu to sao leiban kikei.

²Hobaje khübü chalou asühshongko BUNYUBOU nyena chem dangan akiteisije mütshuongei shongha ong lembei.

³Hobaje haobou Dawidei khonsakko kümbuan kibü ngühkhüma paiko Solomonei BUNYUBOU sanoukei, lausikei haoei shongh shuonga lembüsabü hoba juokbü lembü kukei.

⁴Hobaje Chobaei Gibeon to juokbü lembü kula haukei; aieilausi kho shongh suokbü kikei, hoba kho lemshanga Solomonei juokbü lembü hajar penkoei lembei.

⁵Gibeona nangnak mangh chenei Solomon jungto BUNYUBOU longkei hoba haoei laukei, “Ngei ka la ai kutimang sühda, hiashi.”

⁶Hobaje Solomonei laukei, “Nyi kaibü sambü ka thedanga ngühmaia, hoba sensimaang saopobüei paibü thüng, nyi no khangenbou kübou Dawid to sanou yaang lena, hoba tat chalou tegü nyi hao la bousushou che haoeibü Choba setshanga setla kukei.

⁷Hobaje BUNYUBOU, ngeibü Mühghaü, kübou Dawid jeiko nyi no khangenbou Choba yeitikei; ngo nashou che ong yingsije lai hau longei dogo lela ngei angekei.

⁸Hobaje nyi pienbü phang yaang laobou, mütshang juongbü ka wela athük, haoen yoa no khangenbou kia.

⁹Hibü kaibü mütli tan yaangbü matjemla maibü amaibü shenenla shanga ditenbü sensimaang no khangenbou la labü; aieilausi kaibü mütli tan yaangbü ho aoei matjemla thükla?”

¹⁰Hobaje Solomonei kho phebüa BUNYUBOU maang haikei.

¹¹Hobaje Mühghaüei hao to laukei, “Aieilausi nyi kho ong phekei hoba nyi kaibü langkei salang loubü shanga ayingsi no keila shanga ayingsi kaibü dangbou langkei shanga aphe, lausikei nyi ngühmai matjem shenenla shanga ong phekei;

¹²chühashi, kaibü ngüh tegü ngei kümlabü; khei ka thedanga no phatko lubü aokei akitei ayingsi ka phainei no tegü aokei alonglabü; chühashi, ngei ka la songsihon hoba ditenlabü sensi maang kulabü.

¹³Hobaje nyi laobou aphe khokei ka la kulabü: khei Choba yoa kaibü jihsiphaia no phatko aokei akila shanga ngei nyaksinam hoba nyensang nyenhang ka la kulabü.

¹⁴Hobaje no kabou Dawid paibü tegü, ngei janletkubü ngühkhüm si ngei sakkubü jungeiko paia longa, kheijinei ngei kaibü langkei salang loutikulabü.”

¹⁵Hobaje Solomon pikei, hoba chühashi, kho mangh che kiteikei, hoba hao Jerusalem to louan BUNYUBOUeibü Saopobü Busen thedanga lokei, hoba juokbü lembü hoba sangmai lembü kuko haoeibü khangenbü yaangbü shuong shanga lem yaangbü likukei.

¹⁶Kheijinei asangalanbü yaksa müt nyi louan Choba thedanga lokei.

¹⁷Hobaje yaksa cheei laukei, “O ngeibü BUNYUBOU, ho yaksanyu hoba ngo chem chenei kida, hoba kheijinei saoei hapbo ngei bousushou che bukkei.

¹⁸Hobaje ho longkei, ngei na kho bukan chalou sem kian kho yaksanyueikei bousushou che bukkei, hoba kün liko kikei, hoba kho chema küsi to liman lubü ao akitei.

¹⁹Hobaje kho yaksanyuei bukbü nashou kho saoei yepetkei.

²⁰Hobaje sao metuphanga pikei, hoba ngo nyeket shietnyu yepan kijinei kü ka ngeibü shou sunglangkei hoba nashou kho saoeibü khukua phoan saoeibü shou haibü kho ngeibü khukua phokukei.

²¹Hobaje ngo ladang kü shou la sen inla pikei, chüh- ashi, nashou kho haian kikei; lausikei ladang ngei ngeyang shangshenko chühkei, kü yoa kiteibü kho kü shou aying.”

²²Hobaje lubü yaksanyu khoei laukei, “Aying! lang kibou kho kü shou, hoba haibü kho kashou.” Hobaje saoeikei laukei, “Aying! haibü kho kaibü shou, hoba lang kibou kho kü shou!” Kho tegü Choba thedanga haosi soyokei.

²³Kheijinei Chobaei laukei, “Cheei lauda, ‘Lang kibou kho kü shou, hoba haibü kho kaibü shou,’ tokei cheei lauda, ‘Aying! haibü kho kaibü shou hoba lang kibou kho kü shou.’ ”

²⁴Hobaje Chobaei laukei, “Kü la in che labü.” Hobaje haoenei Choba jungto in che sungbakei.

²⁵Hobaje Chobaei laukei, “Lang kibü nashou kho penyi la wapthetan thoche che la hoba thoche kho chela kuashi.”

²⁶Kheijinei yaksanyu ao lang kibü nashoueibü nyu kikei, saoei Choba to laukei, “O ngeibü bunyubou, lang kibü nashou kho sao la kuashi! Hao tühaiti!” Aieilausi nyu khoei jembü shou khüto sanouko dambei. Lausikei lubü yaksa khoei laukei, “Ho nashou ho ka shangabükei ayinglabü, ayingsi kü shangabükei ayinglabü, wapthettia.”

²⁷Kheijinei Chobaei jongaiko laukei, “Lang kibou nashou kho shaangbü nyu khola kuashi. Kho ai aoakei tühaiti! Sao kho tükdebü nyu yingkei.”

²⁸Hobaje Israelbü pendouei Chobaei matjembü kho ditkei, hoba haoenei Choba to hatkei; aieilausi ngühmai matjemla Mühghaü songsihon hao to kia dogo haoenei chühenkei.