Read Chang Naga 1 CHOBA SHUONG 5 Bible Online

1 CHOBA SHUONG 5 - Chang Naga bible

1 CHOBA SHUONG 5

¹Hobaje Tairbü Choba Hiramei Solomon jungto jembü sambü shuong hautikei, aieilausi haoei Solomon jembü bou chema Chobala lela naangenko pienkei dogo ditkei; aieilausi Hiramei ponpen Dawid to sanouko kikei.

²Hobaje Solomonei Hiram to hai lauko hautikei:

³“Haoeibü dangbou shuong BUNYUBOUei haoeibü you phanga aphoku shongko wapyo juong hao kaijembo kibü haangjung kübou Dawidei haoeibü Mühghaü BUNYUBOU nyen shanga chem che adangen, kho nyi ngekei.

⁴Lausikei ngeibü Mühghaü BUNYUBOUei kü la pendou aenei hakso kukei, khonei dangboukei aki ayingsi amaibükei ühaüthükda.

⁵Hobaje chühashi, ngeibü Mühghaü BUNYUBOU nyen shanga ngei chem che dangla nyekchüh phoda; aieilausi kübou Dawid to BUNYUBOUei laukei, ‘Kaibü shou ao, kaibü chema kaibü Choba setshanga ngei settida, ngeibü nyen shanga haoei chem danglabü.’

⁶Hibü tou Lebanon ka cedar bu haoenei kü la wapbula nyi sakkushi hoba ngeibü khangenbü shuong kaibü sambü shuong yoa kilabü, hoba nyi tetkubü tegü kaibü khangenbü shuong shanga ngei munam souko kulabü; aieilausi Sidonbü tegü bu latla kün yoa minbü maibü aki dogo nyi ngekei.”

⁷Hobaje ladang Hiramei ngüh kho ditkei, hao aeibou olinkei hoba laukei, “Tat BUNYUBOU nyen sangashi, haoei ho phang yaangbü thüka Dawid la songei- honei keibü shou che kukei.”

⁸Hobaje Hiramei Solomon jungto hautiko laukei, “Nyi kü jungto hautibü ngühlang ngei dida. cedar si busim wa shanga nyi laubü tegü ngei pendou kümlabü.

⁹Ngeibü khangenbü shuongei khübü kho Lebanon ka yungnyu to sungyanbakulabü. Hobaje ngei khübü thepbü nyi tükde haplabü lele yungnyu to yantikulabü hoba nyi khübü kho sunglangla shanga ngei sengtilabü, hoba ngeibü chemdang shanga shausiyung kula ngei mangsühbü tegü nyi lamlelabü.”

¹⁰Hibü Hiramei Solomon la haoei mangsühbü pendou tegü cedar si busim wa kukei.

¹¹Solomoneikei Hiram la whet youshou taksi hajar saoche haoeibü chemdang shausiyung shanga hoba lanbü onang taksi saoche kukei; kho tegü po weko Solomonei Hiram la kukei.

¹²Hobaje BUNYUBOUei Solomon la haoei thekubü tegü songsihon kukei, hoba Hiram si Solomon kanglanga sangmai kikei, hoba haosi liko thangjaman kümbei.

¹³Hobaje Solomon Chobaei Israel pendou ka khangbü kümsilei kümbü tan leishaikei, hoba khangbü tan kho müt hajar khujin kikei.

¹⁴Hobaje haoei haoen lit che che shanga Lebanon to hajar an bang hautikei, hoba haoen Lebanona lit che kikei, hoba lit nyi chema kikei, hoba Adoniram khangbü kümsilei kümbü tan thüka kikei.

¹⁵Hobaje Solomonei onkünbü hajar anjinlei phokei, hoba shongha bulatbü hajar saolei kikei.

¹⁶Solomoneibü kongnyu ikjaibü shuong kümaleia kibü to limbo kümbüleibü thüka ngühkhüm kubü hajar semto saongao sem kikei.

¹⁷Hobaje Chobaei ngühkhüm kukei, hoba haoenei laang yaangbü hoba namseklaang jakenbüei chem lotila shanga laang thüngkei.

¹⁸Hobaje Solomon si Hiram hameibü chemdangbü shuong hoba Gebalbü chemdangbü shuongei khübü kümbei, hoba wa si laang haoenei chemdangla shanga lamlekei.