Read Chang Naga 1 CHOBA SHUONG 6 Bible Online

1 CHOBA SHUONG 6 - Chang Naga bible

1 CHOBA SHUONG 6

¹Hobaje tou Israel shousi shuong Ijep kaodak ka longan phaia po saongao leito saolei boubüa Solomonei Israel thüka songdakbü po leiboubü lit nyi boubü Ziv lita BUNYUBOUeibü chem dangla khangkei.

²Hobaje BUNYUBOUeibü chem laobou Solomonei dangkei, tousüng iknop saosem hoba khaang iknop khujin kikei.

³Hobaje saopobü lembü- chem thedanga chemshou che thenan dangbü kho lembüchem chemkhaang to takan süng iknop saoche hoba khaang iknop an kikei.

⁴Hobaje haoei koulom kho maangaenei hanbou dogo kümbei.

⁵Hobaje haoei chemnyu kaijembo tangaenei kümthang to jaktian shemjang kümbei, hoba chemnyu kümthang to jaktian kaijembo saopobü hoba pendou to Saopobou chem nyi kho kaiko tangaenei shemjang shankei.

⁶Shemjang phangkaboutham kho khaang iknop ngao kikei, hoba jenyu kabü shemjang kho khaang iknop lak kikei; hoba semboubü shemjang kho iknop nyet kikei, hoba chemeibü kümthang kaijembo tangae shanga haoei laang kaangbüei phokhüm thüka chemeibü kümthang aüetlabü lele kümbei.

⁷Hobaje chem dangjinei laang jakenshanga yeian kibü laangei kümbei, hoba chem dangjinei nam jangbou ayingsi, wou, ayingsi nameibü peisilei langh ai aditko ong dangkei.

⁸Lembüchem shemjang phangkabou to atshang kho yungthang aenei kikei; hoba jenyu kabou shemjang to haoen younak khüman angkei, hoba jenyu kabou ka semboubü to angkei.

⁹Hibü haoei chem kho dangkei hoba yeikei, hoba chem khonei khamdak wa shuong pendou cedar buei khümbei.

¹⁰Hobaje haoei chem pendou to jaktian shemjang iknop ngao bang louan kümbei, hoba haoei chem kho cedar bu latbüei hau kiko thungyoan kümbei.

¹¹Tou BUNYUBOUeibü ngüh Solomon jungto louan laukei,

¹²“Nyi laobou chem dangan ki, kho nyi ngeibü takletbü ngühkhüma paiko laua longa, hoba ngeibü ngühkhüm jungan kikho laua longa ngei kabou Dawid to lenbü ngeibü ngüh ngei pholabü.

¹³Hobaje ngo Israel shousi yoa kilabü, hoba ngeibü mütli Israel anangletlabü.”

¹⁴Hibü Solomonei chem kho dangkei hoba kho yeikei.

¹⁵Hobaje haoei chemmaang kümthang kho cedar bu waei kümbei, shon ka kebung sühko maangae haoei buei kümsembei hoba haoei shon kho busim waei yuklepbei.

¹⁶Shon ka kümthang sühko haoei iknop saoche chem naphei kho cedar waei huongkei; haoei khübü kho maang aenei Sao- poboutham shanga kümbei.

¹⁷Hobaje chem kho, Saopoboutham thedanga kibü lemshang kho süng iknop saonyi kikei.

¹⁸Hobaje chem kho maangaenei chipen si noksa jinan cedar waei kümbei.

¹⁹Hobaje BUNYUBOU yoa theyolanyobü Saopobü Busen phola shanga, haoei chemmaang jenyua Saopobü Shemjang che kümbei.

²⁰Hobaje Saopobü Shemjang kho süng iknop saoche, hoba khaang iknop saoche hoba suokla iknop saoche hoba khonei haoei hon lanbü jinan kümbei, hoba haoei lemshang kho cedar waei kümbei.

²¹Hibü Solomonei chem kho maangaenei hon jinan kümbei hoba Saopoboutham Shemjang kho danko haoei honei janglüh tegü küman nyengtian phokei, hoba khoneikei hondei ong lakkei.

²²Hobaje chem pendou kho ayeishongko haoei chem khonei hon jinan ong kümbei hoba Saopobü Shemjanga kibü lemshang khümbo kho honei kümbei.

²³Hobaje Saopobü Shemjang khonei haoei oliv buei kaakyembü kherabim noksa penyi kümbei, suokla iknop an bang kikei.

²⁴Hobaje kaakyembü kherabim cheeibü kaak iknop ngao kikei; jikaak thonbü ka jikaak thonbü sühko iknop an.

²⁵Hobaje lubü kaakyembü kherabim kho iknop an kikei, kaakyembü kherabim penyi ham takbü jetei hoba chühlakei jetei ong kikei.

²⁶Kaakyembü kherab che suokbü kho iknop an kikei, hoba lubü khokei kho tegü ong kikei.

²⁷Hobaje haoei kaakyembü kherab noksa kho chemmaanga jinkei, hoba kaakyembü kherab kaak shuong kho sengan kaak cheei kümthanga meiyouko hoba kaak cheeikei kümthanga meiyouko dogo jinkei hoba chem jenyua haoeneibü kaak kho meiyouyoko dogo jinkei.

²⁸Hobaje haoei kaakyembü kherab noksa kho honei naanglepbei.

²⁹Tokei haoei chem khonei kümthang pendou kho kaijembo kaakyembü kherab pünglong si chipen noksaei tangae maangae pendou shenko kümbei.

³⁰Hobaje chemshon kho tangae maangae honei kümbei.

³¹Hobaje Saopoboutham Shemjang to atla shanga haoei oliv buei koukhün den nyi kümbei.

³²Hibü haoei oliv buei koukap penyi kümbei, hoba haoei kho thüka kaakyembü kherab noksa, pünglong, hoba chipen noksa hon jinan kümbei.

³³Hibü lembüchem to atla shanga oliv buei koukhün kümbei, kümthang phejan leia che.

³⁴Hobaje busimei koukap penyi, koukap che penyila noplabü lele, hoba koukap chekei penyi la noplabü lele kümbei.

³⁵Hobaje kho thüka haoei kaakyembü kherabim, pünglong si chipen noksa jinan kümbei, hoba haoei khübü kümaleia hon jinan kümbei.

³⁶Hobaje jakenbü laang lin sem jinan hoba cedar phokhüm lin che, dogo jinan maangaenei shemjang kho kümbei.

³⁷Hobaje BUNYUBOUeibü chem chemshang kho po lei boubü Ziv lita yeikei.

³⁸Hobaje po anthükche boubüa Bul lit, laobou lita chemeibü phejan pendou hoba noksa mangsühbü pendou wantikei. Kho dangjinei haoei po nyet lekei.