Read Chang Naga 1 CHOBA SHUONG 7 Bible Online

1 CHOBA SHUONG 7 - Chang Naga bible

1 CHOBA SHUONG 7

¹Solomonei haoeibü chem dangla po anthüksem lekei, hoba kho pendou maisho kümsembei.

²Aieilausi haoei Lebanon buei chem dangkei, süng iknop saongao, khaang iknop anjinsem hoba suokla iknop khujin, kho cedar bu thaonyu lin lei thüka cedar bu phokhüm jinan dangkei.

³Hobaje phokhüm saonyito ngao thüka cedar buei küplepan dangkei, khübü kho khamthung lin chenei an thüka kikei.

⁴Hobaje lin sema phokhüm kikei, hoba koulom tangyoko thenyobü sem kikei.

⁵Hobaje koukhün koulom kou- yem pendou phokhüm thüka süng si khaang jian kikei, hoba phejan sem thenyobü ngesakbü kho ngesakbü thüka kikei.

⁶Hobaje haoei Matjem Shemjang kümbei, süng iknop anjinsem hoba khaang iknop khujin khübü thedanga chemso hoba khübü thedanga thaonyu si pangkhüm kikei.

⁷Hobaje haoei chem shan- yobüa Matjem Setshang kümbei; khei chemso kho Matjemshang, hoba shon ka kebunga onko cedar buei küplepan kümbei.

⁸Solomonei hao kilabü chem chemso jiaedanga kibü shemjang khokei kho phatko kümbei. Haoei tokei kho chemso phatko, haoei yakla ngabü Faraoeibü nouyang shou shanga chem che dangkukei.

⁹Khübü pendou nam juong mubü laang kikei, jakenbü laangkei yoan takbü tegü bulatei latbü bu thüka hoba phanga kikei. Chem den khangbü ka thon sühko tangae ka maangae sühko.

¹⁰Hobaje chemshanga namseklaang kikei; laang yaangbükei yoan, laang kho iknop an si iknop set kikei.

¹¹Hobaje thükaenei namseklaang kikei, takbü tegü jakenbü laang si cedar bu kikei.

¹²Hobaje maangkabü shemjang kho kaijembo jakenbü laang lin sem kikei, hoba cedar bueibü phokhüm lin sem kikei. BUNYUBOUeibü chem maangkabou shemjang si chem shanyobü phatko kikei.

¹³Tou Solomon Chobaei müt hautian Huram Tair ka leian loukei.

¹⁴Hao kho Naftali phang ka latnyu cheeibü shou kikei, hoba haobou chinam yaübü Tair müt che kikei. Chinam yaübü kümsilei kümla shanga hao sangbüseibü, ditenbü hoba maangli maangsang kikei. Hobaje hao Solomon Choba jungto loukei, hoba haoeibü kümsilei pendou kümbukei.

¹⁵Aieilausi haoei chinamei naanglepbü thaonyu penyi iknop anthükset bang kümbei hoba lubü thaonyu lin che iknop anthüknyi kümbei.

¹⁶Hobaje haoei thaonyu khua phola tühnyinbü chinamei thaonyu sembung noksa penyi kümbei, thaonyu sembung noksa penyi kho iknop ngao bang kümbei.

¹⁷Thaonyu shuong thüka kibü namlüheibü kümsileikei yoan kikei; thaonyu sembung noksa che shangakei nyet hoba thaonyu sembung noksa che shangakei nyet kikei.

¹⁸Kho tegü haoei thaonyu sembung thüka pheithetnyu püpyoko kümbü noksa küplepbo chilang shuong lin penyi kümbei.

¹⁹Hobaje chemsophanga kibü thaonyu shuong thükaenei kibü thaonyu sembung noksa shuong kho leilang chipen kümbü, iknop lei kikei.

²⁰Hobaje püpyobü napheinei shimung nyangko thaonyu penyi thük khünei tokei thaonyu sembung noksa kikei, hoba lubü thaonyu sembung che kho kaijembo linlina chilang pon saüan kikei.

²¹Hobaje haoei lembüchem chemsoa thaonyu kekei, hoba haoei maeae thaonyu kho kekei hoba haoei nyen kho Jakhin nyenkukei, haoei tokei nanae thaonyu kho kekei hoba haoei nyen kho Boaz nyenkukei.

²²Hobaje thaonyu thüka leilang chipen tegü hemaiko küman kikei, kho tegü thaonyu kümsilei wankei.

²³Hobaje haoei jithon ka jithon sühko kaijembo sidang iknop an kümbei, hoba suokla iknop ngao kikei, hoba kho kaijembo iknop khujin lin chenei kümbei.

²⁴Kho phanga iknop khujin onko sidang kaijembo jephot kikei; kho namei kümbü jephot lin nyi la yeiko jephot shuong kikei.

²⁵Kho masu pongsu anthüknyi thüka lokei, hoba masu pongsu shuong yungkük ae sem, chanep ae sem, yungthang ae sem, hoba chaang ae sem yeian kümbei hoba khübü thüka sidang kho kümbei, hoba haoeneibü meichung ae pendou maangaenei kikei.

²⁶Hobaje kho ikmaang tetche shangbü kikei; hoba sidang ko kho leilang chipen noksa pinan yaübü thung phatko kümbei. Sidang khonei dei liter hajar nyi atkei.

²⁷Kheijinei haoei chinamei khamthung an kümbei; khamthung che süng iknop lei hoba khaang iknop lei kikei, hoba suokla iknop sem kikei.

²⁸Hobaje khamthung kümsilei kho hai kikei, khamthung thon kho laang kanglanga maisho nitlepan küman kikei.

²⁹Hobaje khamthung thona molosaonyu, masu pongsu hoba khuthük hangangbü noksa küman kikei, hoba laang thona khamthung che kikei, hoba molosaonyu si masu pongsu noksa khonei lubü jinyoan küman kikei.

³⁰Hobaje khamthung weko chinamei kailong you leibang, hoba chinam kailong tongyoshang kikei, hoba chemnyek lei aenei deiphau che bang phoshang you kikei. Khübü you kho chipen- yakei yaülepan kikei.

³¹Hobaje thaonyu sembung aenei hoba thükaenei iknop che kikei, hoba khoeibü thon aenei thaonyu denshang tegü tongtongbü iknop che tho, tokei khoeibü sembung aenei inei shipetan kümbü noksa kikei; hoba khübü kaijembü kho chemnyek lei longan kikei, tongtongbü aying.

³²Hobaje kaibou phanga kailong you lei kikei; kailong you tongeishang khonei denshang kikei, hoba kailong you suokbü kho iknop che tho.

³³Hobaje kailong you kho kolieibü kailong you tegütham kikei, khübü kailong you lükshang khübü napheinei khübü namlüh, hoba khübü phenyoshang pendou tühnyinbü nam kikei.

³⁴Denshang weko chemnyek lei aenei khamthung lei kikei, khamthung kho denshang to jetei kikei.

³⁵Hobaje denshang thükae thoche tongtongtham kailepan kikei, hoba denshang thükaenei khübü phenyobü hoba kaibou khoto chela yeian kikei.

³⁶Hobaje kho phenyobü hoba kaibou napheinei haoei kaakyembü kherabim, molosaonyu si pünglong, kaoaenei sakkubü sühko chipenyak yaüan jinkuko haoei yeitikei.

³⁷Kho tegü haoei denshang an kümbei, pendou kho che tegü jeteitei jonkei, kho takbü jeteitei hoba chühlakei jetei.

³⁸Hobaje haoei chisaknam deiphau an kümbei, deiphau weko liter saongao set atbü deiphau weko iknop lei bang hoba denshang an weko deiphau che che kikei.

³⁹Hobaje denshang shuong kho chemeibü yungkük aenei ngao, hoba chemeibü yungthang aenei ngao dogo phokei; hoba sidang kho haoei yungthang napheinei chemnyeka phokukei.

⁴⁰Huramei chaksiam, suokjin hoba phauyaang kümbei. Haoei BUNYUBOUeibü Lembüchem shanga Solomon Chobaeibü kümsilei pendou kümsembukei. Haoei kümbü kho habü ho: Thaonyu penyi Thaonyu sembung thüka phauyaang penyi Thaonyu sembung küpjin yuklepla noksa jinko wouyobü Chakden an Deiphau an Sidang Sidang thungetbü masu pongsu anthüknyi Chaksiam, suokjin hoba phauyaang Habü peisilei khümbo BUNYUBOUeibü lembüchem shanga Solomon Choba shanga Huramei shaüshaü ponpon chisak namei kümbukei.

⁴¹

⁴²

⁴³

⁴⁴

⁴⁵

⁴⁶Jordan shumanga Chobaei khübü kho Sukot si Zarethan kanglanga shungkung kaoa jonan kümbei.

⁴⁷Hobaje Solomonei peisilei pendou seret ohauko apyokei, aieilausi khübü kho yongko juongsapbei; chisaknam takbü kho alamen.

⁴⁸Hibü Solomonei BUNYUBOUeibü chema kibü peisilei pendou kümbei, hon lemshang, lembü chema phobou wentek shanga honeibü khümsok.

⁴⁹Hon lanbüei kümbü wanthung denshang shuong lembüchem maangkaboua maeaenei ngao, hoba nanaenei ngao, chipen shuong, wanthung shuong hoba wankip hon lanbüei kümbei.

⁵⁰Thung shuong, wanui jinbü shuong, phauyaang shuong, jenjuok phau shuong, hoba jephot hon lanbüei, hoba Saopoboutham Shemjang to atbü maangkabou koukap shuong shanga hanleplabü hon hoba Lembüchem koukap shuong honei kümbei.

⁵¹Kho tegü BUNYUBOUeibü chem shanga kümsilei pendou Solomon Chobaei kümbü wankei. Hobaje Solomonei haobou Dawidei saüenan phobü peisilei pendou jungan lotkei, chandinam, hon hoba chaksiam, hoba BUNYUBOUeibü chema thanshanga thanan phokei.