Read Chang Naga 1 CHOBA SHUONG 8 Bible Online

1 CHOBA SHUONG 8 - Chang Naga bible

1 CHOBA SHUONG 8

¹Kheijinei BUNYUBOU yoa theyolanyobü Saopobü Busen Dawid sangnyu Zion ka sungbala shanga Solomonei Israelbü jaishou shuong si phang leiyeibü pendou hoba Israel shousi yoa kongnyu shuong pendou Jerusalema Solomon chema yoshaitikei.

²Hobaje Israelbü pendou Ethanium lit, kho nyetboubü lita Solomon Chobaeibü chema lem to yoshaitikei.

³Hobaje ungshedbou shuongei ngühkhüm busen kho jungkei, hoba Israelbü leiyeibü jaishou pendou loukei.

⁴Hobaje haoenei BUNYUBOUeibü Saopobü Busen kho sungbakei, hoba Kambü Neichem hoba khünei kibü saopobü thung pendou kho ungshedbou shuong si Levibü shuongei sungbakei.

⁵Masu pongsu si sanlon wesi aweenko lemla kuko, Solomon Choba hoba Israelbü pendou kho theyolanyobü Saopobü Busen nyangko kamsheikei.

⁶Hobaje ungshedbou shuongei BUNYUBOU to theyolanyobü Saopobü Busen kho Saoposhang to khei kaakyembü kherabim kaakphang to sungbakei.

⁷Aieilausi kaakyembü kherabim kaakphanga Saopobü Busen hoba khünei kibü bu pendou ngühlepan kikei.

⁸Hobaje bu kho loubünyu yingsije Saopobü Shemjang ka saoposhang kho hapbo kikei, lausikei napheikaje bu kho ühüp, hoba tat sühko khübü kho khünei kia.

⁹Israelbü Ijep kaodak ka longjinei BUNYUBOUei Israel shousi shuong yoa ai thebülanbü kümbei, kheijinei Mosaei khünei Horeba laangei kümbü laangdak penyi saopobü busena jinkubü to liman khünei lubü ai akitei.

¹⁰Hobaje ungshedbou shuong sangmei kibüei khangenla shanga lola athükko ungshedbou shuong saopobü kaoen ka loujinei BUNYUBOUeibü chem kho sangmeiei shenkei;

¹¹aieilausi BUNYUBOU soneikangbüei BUNYUBOUeibü chem shenkei.

¹²Kheijinei Solomonei laukei: “No BUNYUBOUei chanyu kho mühnyua phokei, lankei, no sangmei shangtüngbü khünei kilabü dogo laukei!

¹³Ngei ka la no ponpen kitila shanga shanenbü chem che dangkua.”

¹⁴Hobaje Chobaei haoeibü thenyek sepeian kaman kibü Israelbü pendou haükukei, hoba Israelbü kaman kibü pendou lokei.

¹⁵Hobaje haoei laukei, “Israel Mühghaü BUNYUBOU haübou, haoei jembü sembungei kübou Dawid to joyokei hoba haoei jembü ikei kho loushedtikei, hoba laukei,

¹⁶‘Ngeibü mütli Israelbü Ijep kaodak ka leiyenbü chalou ka ngei kü nyen kila shanga sangnyu che ongkei apien, lausikei ka mütli Israel thüka songdakla shanga ngei Dawid pienkei.’

¹⁷“Tou kübou Dawideibü maangpona Israel Mühghaü BUNYUBOU nyen shanga chem che dangla daman kikei.

¹⁸Lausikei BUNYUBOUei kübou Dawid to laukei, ‘Kaibü maangpona kü nyen shanga chem che dangla dambü kho maiakei,

¹⁹lausikei nyi chem kho adanglabü; khei yingasikei ka shou ka la bukkubüei kü nyen shanga haoei chem kho danglabü.’

²⁰“Hobaje BUNYUBOUei laubü tegü haoei jembü ngüh kaangkhühtham phokei, aieilausi kübou Dawid ka ngo longkei, hoba BUNYUBOUei theletbü tegü Israel sanglea ngo setkei, hoba Israel Mühghaü BUNYUBOU nyen shanga chem kho dangkei.

²¹Hobaje ngei khonei Saopobü Busen shanga shemjang che kümbei, hoba seneibü bousi shuong yoa haoen Ijep kaodak ka leian loujinei the- yolanyobü kho khonei phoakei.”

²²Hobaje Israelbü tan kamshaian kibü thedanga Solomon BUNYUBOUeibü lemshang thedanga lokei hoba jembü ik mühae shingan angtian laukei,

²³“O BUNYUBOU, Israel Mühghaü, müh thükaenei ayingsi kao maanga no phatbü lubü mühghaü aki, jembü sensimaang pendouei ka thea paibü shuong to nyi sanou theyolanyo lenda.

²⁴Nyi no khangenbou kübou Dawid to thekubü phojung loukei, tat chalou tegü nyi kaibü sembungei joyokei, hoba kaibü ikei haüthüktikei.

²⁵Hibü tou, O BUNYUBOU, Israel Mühghaü, kübou no khangenbou Dawid la thekubü nyi phoan laukei, ‘Kaibü shousi shuongei ong jembü kümaleia maangsangko laua longa hoba no paibü tegü haoenei kü thedanga paialonga Israel sanglea kü thedanga setla ngei aokei athükamin alottilabü.’

²⁶Hibü tou, O Israel Mühghaü, nyi no khangenbou kübou Dawid thedanga lenyobü haüthükla shanga kaibü ngüh shangashatbü kishi dogo ngei welauda.

²⁷“Lausikei maimaitham Mühghaü kaodaka kilepsai? Chühashi, müh hoba mühnyu thüka kibü peisilei shuongei no apham, khotoje yongko hanbou ngei ho chem dangkei!

²⁸Khei yingasikei no khangenboueibü welau hoba haoei subüjabüa nyi souhat lenkei. O BUNYUBOU, ngeibü Mühghaü, ka thedanga tat chaloua kaibü sambüei ngekbü hoba welaubü nyi ditshi.

²⁹Kaibü nyek ho chem aeto change nangnak, khei nyi, ‘Kü nyen khünei kilabü’, dogo laubü aeto no khangenbouei welaubü chühletko kishi.

³⁰Hobaje ladang ho chem aeto yeian no khangenbou hoba ka mütli Israelbüei welaulaje, nyi ditkushi; haü, no kishang khuthük ka nyi ditbü, hoba ladang nyi ditlaje kheijinei amai apbushi.

³¹“Müt cheei jembü lepbou khulimbo shed shona longa hoba theyolanyotila khüksiuok ngüh apyokua longa hoba haoei louan kaibü saopobü lemshona theyolanyoa longa,

³²kheijinei nyi khuthük ka ditashi hoba kümashi. Hobaje no khangenbü shuong amaibü jembü kümsilei kho jembü khua künngailabü lele saopobü shuong matmaitiko jembü saopobü thüng kula mat jemashi.

³³“Haoenei ka khu limbo shed shonbü haangjung, ladang ka mütli Israelbü dangbou thedanga athük haplaje, hoba haoen ka jungto louan ka nyena thekulaje, ho chema ka nyena welaua longa;

³⁴kheijinei nyi khuthük ka ditbü, hoba ka mütli Israel la shedbü apbushi; hoba haoeneibü pisibousi la nyi thekubü kaodak to haoen nyibou leingaishi.

³⁵“Ladang haoenei ka khu limbo shed shonbü haangjung khuthük kou kapngailangan lang aloulaje, haoenei thi aeto sepeian welaua longa hoba nyi haoen khonkutijinei haoen shabü ka sepeian ka nyena thekua longa,

³⁶kheijinei khuthük ka nyi ditkushi hoba no khangenbü shuong hoba ka mütli Israel la shedbü apbushi; aieilausi haoen paila lamnyu maibü haoen la lenda, hoba nyi phetphanlabü lele kubü kao khüto haoen jungto lang yantikushi.

³⁷“Kaonyeka mühsinou kialonga, khonsak khonku kia longa, khambüei nin hansho aada longa, koksüng si meisiau püha longa, ai limsilang hoba shatsinyat kilaje,

³⁸ai welauei aoyouei ong ladang phelaje, ayingsi ka mütli Israelbü pendouei lulueibü maangpon khonkubü ngean jembü ik tuokan ho chem aeto yeian welaulaje,

³⁹kheijinei no kishang khuthük ka nyi ditbü, hoba shedbü apbushi, hoba nyi mütpem weko la yingtishi.

⁴⁰Hibü küneibü pisibou la kubü kaodaka haoen kijinei, haoenei jih pendoua ka to hatlabü.

⁴¹“Tokei ka mütli Israelbü ayingko, küksithang ao ka nyena kaonyek saabü ka loulaje,

⁴²aishanga haoenei ka ka nyen yaangbü hoba kaibü hau kibü ik shingan haiteibü ditla haoei ho chem aeto welauko loujinei no kishang khuthük ka nyi ditkushi.

⁴³Hobaje kaodak phang pendouei no ngela shanga ka mütli Israelei ka to hatbü tegü hatlabü lele hoba ho chem laobou ngei dangkei, ho ka nyena ngada dogo ngela shanga kükeithangei ngabü tegü kümshi.

⁴⁴“Ladang kaibü mütliei jembü dangbou khulimbo wapyola haula laobou lamnyu to haoen hautila nyi pienbü chem ae yeian haoenei ka to welaulaje, hoba ka nyen shanga ngei laobou chem dangkei, khito yeian haoenei welaulaje,

⁴⁵kheijinei haoenei welaubü hoba subüjabü nyi khuthük ka ditkushi, hoba haoeneibü janbü kho phokushi.

⁴⁶“Haoenei ka khu limbo shed shona longa, aieilausi shed ashonbü müt ao aki, hoba no haoen to maangpoka longa, hoba dangboueibü kaodak saabü ayingsi nyangbü to lang senlabü lele haoen jembü dangbou ik to khümbo kuan kia longa,

⁴⁷lausi haoen dangbou kaodaka kijinei haoen lolo damanchühko ka ae sepeia longa, hoba haoen thüngshang kaoa kian ka to, ‘Künei shed shonkei hoba mashikan kümbei, künei amaiko jungeikei’, dogo suajaa longa,

⁴⁸hoba haoeneibü dangbou kaodaka hoba haoen langsenbüa kian haoenei jembü sensimaang pendouei hoba haoeneibü soushou pendouei ka jungto sepeia longa, hoba ka to haoenei jembü kaodak aeto, laobou nyi haoeneibü pisibousi shuong la kukei, hoba laobou nyi pienkei, hoba laobou ngei ka nyena dangkei khüto chühko welaua longa,

⁴⁹kheijinei haoenei welaubü hoba subüjabü nyi khuthük ka ditkushi hoba haoeneibü janbü kho kümbushi.

⁵⁰Hobaje kaibü mütli aoyouei shed shonkei haoen la shedbü apbushi, hoba ka khu limbo haoenei ai shed shonkei kho apbushi hoba haoen aoyouei langsenkei haoen thedanga onou haptishi.

⁵¹Aieilausi haoen ka mütli hoba kaibü phetphanbü shuong, haoen nyi Ijep kaodak khonkukhonsak ka leijung loukei.

⁵²“Kaibü sambüei subujabü ka hoba kaibü mütli Israelei subüjabü ka haoenei ladang ka to ngeklaje, hoba sulajalaje kaibü nyek longshi, hoba haoen to ditkushi.

⁵³Aishanga kaibü phet phanla shanga nyi haoen kaodak phangshuong ka bangtikei, hoba no khangenbou Mosaeibü ik danko nyi joyokei, hoba O BUNYUBOU Mühghaü, nyi küneibü pisibousi shuong Ijep kaodak ka leibakei.”

⁵⁴Hobaje ladang Solomonei BUNYUBOU to welaubü hoba subüjabü thonko loukei, youkükei thungetan welaubü hoba müh ae ik tuokan welaubü ka hao meimeijung loukei.

⁵⁵Hobaje ngüh kaang longko Israelbü tan pendou haoei loan haükukei.

⁵⁶Hobaje laukei, “BUNYUBOU, aoei jembü khangenbou Mosa to thekukei, haoei thekubü chenei ongkei haoei athük alot, hoba haoei thekubü tegü jembü mütli Israelbü la haoei hakso kusi hao haübou.

⁵⁷BUNYUBOU Mühghaü seneibü pisibousi shuong yoa kibü tegü sen yoa kishi, haoei sen tüpyo ayingsi sen teinlet.

⁵⁸Seneibü sensimaang hao aeto sepeila hoba haoeibü lamnyua paila, haoei seneibü pisibousi shuong la sakkubü phola hoba jaletkubü ngühkhüm shuong jungeila shanga haoei thuishi.

⁵⁹Hobaje khübü ngeibü ngüh, laobou ngei BUNYUBOU junga sukeijakei, khübü chalou angboua seneibü Mühghaü BUNYUBOU nyangko naki, hoba chaangboua khambü tegü hao khangenbou hoba mütli küpjembo phoashi.

⁶⁰BUNYUBOU kho Mühghaü hoba hao phatbü aokei aki, dogo kaodak phang pendouei ngeashi.

⁶¹Lausikei tat tegütham, haoei sakkubü hoba jaletkubü ngühkhüma pailabü lele, seneibü BUNYUBOU Mühghaü thedanga kaneibü maangpon khümbomeiko kujan.”

⁶²Kheijinei Choba si Israelbü lajuche hao yoa kikei, pendouei BUNYUBOU la lembü kukei.

⁶³Hobaje Solomonei sangmai lembü BUNYUBOU la kukei, masu pongsu hajar saoto nyi hoba sanlon hajar saongaoto saoche lembei. Hibü kho tegü Choba si Israel shousi shuongei BUNYUBOUeibü chem saüenkei.

⁶⁴Khünyet chaloua ong Chobaei BUNYUBOUeibü chem thea kibü khongmaang khokei saüenkei. Aieilausi khünei juokbü lembü, shausiyung lembü, hoba haabü lembü kukei, aishanga BUNYUBOU thedanga chisaknam lemshon kho aeibou hanan kikei.

⁶⁵Hibü Solomonei kho chalou khünei lem likei, hoba hao yoa tan yaang Israelbü pendou Hamath ka Ijep shumang sühko hoba Mühghaü BUNYUBOU thedanga chalou nyet lem likei.

⁶⁶Hobaje setbounyet haoei shuong kho lintikei, hoba BUNYUBOUei hao khangenbou Dawid si Israelbü to maibü kümbü shanga olinangko haoeneibü chem to ngaikei.