Read Chang Naga 1 CHOBA SHUONG 9 Bible Online

1 CHOBA SHUONG 9 - Chang Naga bible

1 CHOBA SHUONG 9

¹Hobaje ladang Solomoneibü chem hoba Chobaeibü chem hoba haoei kümmang sühko kibü pendou kümkhümbei,

²BUNYUBOU Solomon jungto, Gibeona longbü tegü nyibou longkei.

³Hobaje BUNYUBOUei hao to laukei, “Ngei kaibü subüjabü hoba welau dida, kü nyen ponpen kila shanga ngei nyi dangbü saüenkua. Hobaje ngeibü nyek si ngeibü maangpon ponpen thon akiko khünei kilabü.

⁴Hobaje kabou Dawid paibü tegü nyi kü thedanga saopobüa ngühmai maangponei paia longa hoba ngei ka la sakkubü tegü küma longa hoba ngeibü ngühkhüm shuong hoba matjem jungeia longa,

⁵ngei kabou Dawid to lenko thekubü tegü kaibü sangle Israel thüka ngei no ponpen songdaktilabü.

⁶Lausikei kan hoba kaneibü shisishousi kü ka banga longa hoba ngei sakkubü hoba ngeibü ngühkhüm apholonga,

⁷ngei haoen la kubü kao ka Israel wapan aplabü, hoba ho chem laobou kü nyen shanga ngei saüenkei, ngei aplabü, hoba Israel lubü phang thedanga tetlatalabü phang che kilabü.

⁸Hobaje ho chem hangletnyu aatan danbü phaibü pendouei hapan khülüh, dogo joyoko laulabü, ‘Aila BUNYUBOUei ho kao hoba ho chem to hainyu kümbei?’

⁹Hobaje haoenei jongailabü, ‘Aieilausi haoenei jembü pisibousi shuong Ijep kaodak ka leian loubou Mühghaü maan apan lubü mühghaü to mailembo lembei hoba khangenkei, hibü BUNYUBOUei haoen jungto ho shedsikhau sungbakei.’ ”

¹⁰Hobaje po saoche boubü thonlamto Solomonei chem penyi dangkei, BUNYUBOUeibü chem si Chobaeibü chem dangkei.

¹¹Tou Tairbü Choba Hiramei Solomon la cedar bu, busim hoba haoei khambü tegü hon kukei; hibü Solomonei Hiram la Galil kaoa sangnyu saoche kukei.

¹²Hobaje Hiram, Tair ka Solomonei hao la kubü sangnyu shuong kho chühla loukei, hoba khübü khoei hao maang ühaiti.

¹³Hobaje haoei laukei, “O ngeibü jaisina, nyi kü la kubü sangnyu shuong ai?” Hobaje haoei tat sühko khübü khoto Kabul kaodak dogo lauda.

¹⁴Hobaje Hiramei Choba la hon seret khujin bang atbü saosem jungan hautikei.

¹⁵Hobaje Solomon Chobaei nam hebü kho BUNYUBOUeibü chem, haoeibü chem, Millo, Jerusalem kümthang, Hazar, Megiddo hoba Gezer kümla hekei.

¹⁶(Hobaje Ijepbü Choba Farao angan Gezer lekei, hoba kho jikan apbuan kho sangnyua kibü Kananbü haitikei, hoba sangnyu kho haoeibü nouyangshou, Solomoneibü yak la jongsak la kukei.

¹⁷Hobaje Solomonei Gezer kümetkei). Hobaje haoei Beth-Horon dangngaikei,

¹⁸Baalath si Tamar khübükei dangngaikei,

¹⁹hoba kaonyua Solomoneibü peisilei thanshang sangnyu pendou, hoba haoeibü koli shuong shanga sangnyu, koli leibü mütshuong shanga sangnyu hoba Solomonei haoeibü olin-lemse shanga laobou Jerusalema dangmang sühkei khübü kho dangkei, hoba Lebanon hoba jembü sangle pendou kümbei.

²⁰Amorbü, Hitbü, Perizbü, Hivbü, hoba Jebusbü mütshuong aoyou Israelbü aying,

²¹haoeneibü shousi shuong aoyoueibü kaonyek haoen phainei aoyou Israel shousi shuongei lepde mautila athük, haoen ka tat sühko Solomonei aaothua kibü khangbü lekei.

²²Lausikei Israelbü yoaje Solomonei aokei aaothua aphoku; haoen wapyobü shuong, haoeibü sangle khangenbü shuong, haoeibü yaangenbü shu- ong, haoeibü lajamleibou shuong, hoba haoeibü koli sepai hoba kailong leibü shuong kikei.

²³Solomoneibü kümsileia kongnyu leiyeibü shuong müt saongao ngaoto anjinsem kikei, kümaleia kibü shuong thüka haoen leiyeila hau kikei.

²⁴Lausikei Faraoeibü nouyangshou Dawid sangnyu ka longan sao la Solomonei dangkubü chem khüto loukei, kheijinei haoei Millo dangkei.

²⁵Hobaje po chenei semnei sühko Solomonei juokbü lembü, sangmai lembü, BUNYUBOU shanga dangbü lemshanga kujung loukei, BUNYUBOU thedanga kibü lemshanga jen juokko lembo loukei. Hibü haoei chem kho yeikei.

²⁶Solomon Chobaei Edom kao, Saklangbü yungnyua, laobou Eloth nyangko ki, khünei Ezion-gebera longchem dangkei.

²⁷Hobaje Hiramei haoeibü longleibü shuong, aoyouei yungnyu ngean kikei, haoen Solomoneibü sambü shuong yoa hautikei.

²⁸Hobaje haoen Ofir to long- chema haukei, hoba hon seret khujin bang atbü saongao leito saoche khüka Solomon jungto sungbakei.