Read Chang Naga 2 CHOBA SHUONG 1 Bible Online

2 CHOBA SHUONG 1 - Chang Naga bible

2 CHOBA SHUONG 1

¹Tou Ahab haian phaia, Moabei Israel khulimbo meimeikei.

²Hobaje Ahazia, Samariaa hao chemlip thükkabou chemso ka atetkei hoba leiluan shatko kikei; hoba haoei ngühlang künbü shuong hautiko haoen to laukei, “Hauashi, Ekron kabü mühghaü Baalzebub to ngo ho shat ka mailasi amaila pheshi.”

³Lausikei BUNYUBOU khuthük hangangbüei Tishbebü Elija to laukei, “Meimeiashi, Samariabü Chobaeibü ngühlang künbou to haüyola angashi, hoba haoen to lenshi, ‘Khünei Israela Mühghaü aki sai? Aila kanei Ekron mühghaü Baalzebub to pheda?’ ”

⁴Tou khei yingsije BUNYUBOUei lauda, “No shen laobou to angan ki kho ka alotlabü, lausikei maimaitham hailabü!” Hobaje Elija kukkei.

⁵Hobaje ngühlang künbü shuong hao jungto longeikei, hoba haoei haoen to laukei, “Kan aila longeikei?”

⁶Hobaje haoenei hao to laukei, “Müt che kün to haüyola longkei, hoba haoei kün to laukei, ‘Hauashi, kan hautibou Choba jungto nyibou ngaiashi, hoba hao to lenshi, BUNYUBOUei hai lauda, Ho Israela Mühghaü akisai, aila kanei Ekron mühghaü Baalzebub to pheda? Hibü no shen laobou to nguian ki kho ka alotlabü, lausikei tükde hailabü!’ ”

⁷Hobaje haoei haoen to laukei, “Kan to haüyola longbou kho ai tegübü müt?”

⁸Hobaje haoenei hao to jongaikei, “Hao winei lebü müt hoba shenjanga phekhonei kaiakei.” Hobaje haoei laukei, “Kho Tishbibü Elija!”

⁹Kheijinei Choba müt anjinsem thüka leiyeibou che hao phainei müt anjinsem thonan hautikei. Hobaje hao shonghkhua setan kibou Elija jungto haukei, hoba hao to laukei, “O Mühghaü müt, Chobaei no, ‘Kaiyena’ dogo lauda.”

¹⁰Hobaje Elijaei anjinsem thüka leiyeibou to laukei, “Ngo Mühghaü müt che yinga longa, müh ka wan lotan no hoba kaibü müt anjinsem kho nashemti!” Hobaje müh ka wan lotkei hoba hao yoa müt anjinsem kho juoketkei.

¹¹Hobaje nyibou haoei anjinsem thüka leiyeibou lubü müt anjinsem thonan hautikei. Hobaje hao angkei hoba hao to laukei, “O Mühghaü müt, Chobaei ngühkhüm kuko lauda, ‘Tongde kaiyena!’ ”

¹²Lausikei Elijaei haoen to jongaikei, “Ngo Mühghaü müt che yinga longa, müh ka wan lotashi, hoba no hoba kaibü müt anjinsem kho nashemti!” Hobaje müh ka Mühghaü wan lotkei hoba müt anjinsem kho juoketkei.

¹³Tokei anjinsem thüka lei- yeibou semboubü müt anjinsem thonan hautikei. Hobaje anjinsem thüka leiyeibou semboubü kho angkei, hoba Elija thedanga youkükei khüpetan hao to sukojako laukei, “O Mühghaü müt, ngei ka to sudajada, ngeibü langkei hoba no khangenbü habü müt anjinsem langkei ka thedanga namsek yingshima!

¹⁴Chühashi, müh ka wan lotkei hoba müt anjinsem thükto shaangbü lajamleibü müt nyi yoa anjinsem bang khokei yoan shema; lausikei touje ngeibü langkei ka thedanga phokeikaima!”

¹⁵Hobaje BUNYUBOU khuthük hangangbüei Elija to laukei, “Hao yoa yanashi, hao to tehüt.” Hibü hao meimeikei, hoba hao yoa Choba jungto yankei.

¹⁶Hobaje haoei hao to laukei, “BUNYUBOUei hai lauda, ‘Ailaibü nyi Ekron mühghaü Baalzebub to phela ngühlang künbü shuong hautikei? Kho haoeibü ngüh phela Israela Mühghaü akibü shanga sai? Khei yingbü khoei, kaibü shen laobou to no nguian ki, khoka alotlabü, lausikei maimaitham hailabü!’ ”

¹⁷Hibü Elijaei laubü BUNYUBOUeibü ngüh tegütham hao haikei. Hobaje Jihudabü Choba Jehoshafat shou Jehorameibü songdak po nyiboua Ahaziaeibü na Joramei hao jeiko songdakla khangkei; aieilausi haoei bousu shou akitei.

¹⁸Tou Ahaziaeibü joubü kümsilei laobou haoei kümbei, Israel Choba shuong Lüngbüdobü lea habü ho doan aki lo?