Read Chang Naga 2 CHOBA SHUONG 11 Bible Online

2 CHOBA SHUONG 11 - Chang Naga bible

2 CHOBA SHUONG 11

¹Ladang Ahaziaeibü nyu Athaliaei saoeibü shou haia dogo ngejung loukei sao meimeikei hoba Chobaeibü chem- pen pendou haitikei.

²Lausikei Joram Chobaeibü nouyangshou, Ahaziaeibü nousina Jehoshebaei Ahaziaeibü shou Joash sungkei, hoba Chobaeibü shousi shuong shemtibü yo ka huphangshoua leilangkei; hoba hao thounounyu yepchem shemjanga phokei. Kho tegü saoei hao Athalia ka huan phokei, hibü hao ühaiti.

³Hobaje hao sao yoa BUNYUBOU chema po lak kikei; hoba Athaliaei kaonyeka songdakkei.

⁴Hobaje po nyet boubüa Jehoiadaei Kariabü lajamleibou hoba lombü shuong ngala hautikei, hoba haoen BUNYUBOUeibü lemshang to leian loukei; hoba haoei haoen to thebülanbü che kümbei hoba BUNYUBOU chema haoen la theyolanyotikei, hoba haoen la Chobaeibü shou lenkei.

⁵Hobaje haoei haoen la sakkuko laukei, “Kanei ho kümashi, kan phejan semboubü aoyou Nounyet Chobaeibü chem lomla hauda, Chobaeibü chemlombou yeilabü.

⁶Hobaje phejan semboubü Sur bakhüna kilabü, kho tegü kanei chem kho lomlabü, hoba thangetlabü che yinglabü.

⁷Hobaje kan tan nyi, khei Nounyet haubü shuong Choba kaijembo BUNYUBOU chem lombo kilabü.

⁸Hobaje mütpem weko lulueibü ika insiaubu jungan kanei Choba komleplabü, hoba aoei leikhüm limbo atlaje hao haitiashi, hoba ladang Choba longlaje, hoba hao ladang lotlaje kan hao yoa kishi.”

⁹Hobaje Jehoiada ungshedbouei sakkubü tegütham lajamleibou shuongei kümbei, hoba chemdang wekoei mütshuong aoyou Nounyet lotlabü lele kikei hoba aoyou Nounyet anglabü kikei haoen leishaikei, hoba Jehoiada ungshedbou jungto loukei.

¹⁰Hobaje ungshedbouei saongao thüka lajamleibou la Dawideibü aubu si aih laobou BUNYUBOU chema kikei khübü kho kukei.

¹¹Hobaje lombü shuong kho mütpem weko in si aubu jungan chemeibü maephei aeka nanaephei sühko, lemshang hoba chem ae nyangko, Choba kaijembo lokei.

¹²Kheijinei haoei Chobaeibü shou leian longkei, hoba hao la Chobaeibü khun hankukei, hoba ngühkhüm le che hao la kukei, hoba haoenei hao Choba dogo ngekletkei, hoba hao la onang naangkukei, hoba haoenei haoeneibü ik ipbei hoba laukei, “Choba hangkhu onko kishi!”

¹³Hobaje ladang Athaliaei lombü si mütshuongeibü ngüh ditkei, sao mütshuong jungto BUNYUBOU chem to loukei;

¹⁴hoba saoei chühkei, hoba chühashi, song tegütham Choba kho shona lokei hoba lajamleibü shuong si teklaang metbü shuong Choba nyangko kikei; hoba kaonyek kabü müt pendouei olinyokei, hoba teklaang metkei. Kheijinei Athaliaei jembü neisimei jitnyinkei, hoba ngekkei, “Khüpettibü! Khüpettibü!”

¹⁵Kheijinei ungshedbou Jeho- iadaei sepai tan thüka pienan kibü saongao thüka leiyeibou la ngühkhüm kukei hoba haoen to laukei, “Lin khüman kibü kanglang to sao leiba hoba aoyouei sao phai semlaje inei haitiashi.” Aishanga ungshedbouei laua, “Sao BUNYUBOUeibü chema tühaiti.”

¹⁶Hibü haoenei sao to ik atkei, hoba Chobaeibü chem to koli atbü lam to sao haukei hoba sao khünei haitikei.

¹⁷Kheijinei Jehoiadaei BUNYUBOU hoba Choba kanglanga khei haoen BUNYUBOUeibü mütli yeilabü dogo thebülanbü che kümbei.

¹⁸Hobaje kaonyek kabü müt pendou Baal chem to haukei, hoba kho leilutikei; haoeibü lemshang hoba haoeibü heangsho haoenei lemailela leilutikei, hoba Baal ungshedbou Mattan lemshang thedanga haitikei. Hobaje ungshedbouei BUNYUBOU chem lombü shuong pienkei.

¹⁹Hobaje saongao thüka lajamleibou, hoba Kariabü shuong si lombü shuong hoba kaonyek kabü mütshuong pendou haoei leikei; hoba haoenei BUNYUBOUeibü chem ka Choba leian yankei, hoba lomboueibü koukhün lam to Choba chem to loukei. Hobaje hao Choba setshanga setkei.

²⁰Hibü kaonyeka mütshuong pendou olinyokei hoba sangnyu senyühshembo kikei; hoba Choba chema haoenei Athalia haitikei.

²¹Jehoashei songdakla khangjinei hao po nyet kikei.