Read Chang Naga 2 CHOBA SHUONG 12 Bible Online

2 CHOBA SHUONG 12 - Chang Naga bible

2 CHOBA SHUONG 12

¹Israel Choba Jehuei songdakbü po nyetboua Jihuda Choba Jehoashei songdakla khangkei hoba haoei Jerusalema po saonyi songdakkei, hoba haonyu Beersheba sao nyen Zibia kikei.

²Hobaje Jehoash ungshedbou Jehoiadaei hao to lenbüa haoeibü salang sünga BUNYUBOU thedanga ai jankei kho kümbei.

³Khei yingasikei shongha lembü kaoen khoje asunglangko kikei; mütshuongei tokei haitibü lembü kukei hoba shongha juokbü lembü kukei.

⁴Hobaje Joashei ungshedbou shuong to laukei, “Saopobü lembü nyaksinam pendou laobou BUNYUBOU chem to sungbaan ki, mütpem wekoei kula kibü nam hoba BUNYUBOU jungto jungan loula lulueibü maangpon to lotbü nam pendou,

⁵ungshedbou shuong la kho letiashi; ungshedbou mütpem wekoei ngeyobü müt ka hoba haoenei lanei ong leilubü haplaje, chem leilubü shuong kho kümetlabü.”

⁶Lausikei Joash Choba hao po saoto sem onkokei ungshedbou shuongei leilubü kho akümetko kikei.

⁷Kheijinei Joash Chobaei ungshedbou Jehoiada hoba lubü ungshedbou shuong ngakei hoba haoen to laukei, “Aila kanei chem leilubü kho akümet? Tou khei yingsije kanei ngebü müt ka nam tele, lausikei kho chem leilubü kümetla kuashi.”

⁸Hibü touje ungshedbou shuongei mütshuong ka namkei alelabü hoba chem leilubü shuongkei akümetlabü dogo thekukei.

⁹Kheijinei ungshedbou Jehoiadaei Busen che sungbakei hoba khoeibü küpjina khün yettian kho lemshang nyangko BUNYUBOU chem to lotjinei mütpem wekoei jinkulabü shanga maeaenei phokukei, hoba chem lombo kibü ungshedbou shuongei BUNYUBOU chem to jungan loubü nam pendou khünei jinkukei.

¹⁰Hobaje haoenei Busena nam juong hapjinei Chobaeibü dobou si thükkabou ungshedbou angkei hoba weanchühan BUNYUBOUeibü chema hapbü nam kho phoda phokei.

¹¹Hobaje haoenei nam kho weanchühan kümbüleibü BUNYUBOU chema chühboueibü ik to kukei, hoba haoenei kho mistri hoba chemdangbü shuong aoyouei BUNYUBOUeibü chem dangkei haoen la kukei.

¹²Hobaje laangeibü mistri shuong hoba laang jakbü shuong la, hoba BUNYUBOUeibü chem leilubü kümetla wa hoba laang jakbü chekla shanga hoba chem shanga kümla kibü pendou shanga mu kukei.

¹³Khei yingsije, BUNYUBOU chem to jungan loubü nam ka BUNYUBOU chem shanga chandinam thung shuong, wankak kipjin, chak, teklaang ayingsi hon si chandinam thungsiphau akümbo kikei.

¹⁴Lausikei haoenei kho kümbüleibü la kukei, hoba khoei BUNYUBOU chem kümetla khangkei.

¹⁵Aeiche, kümbüleibü la mu kula aoyoueibü ik ka nam kho khümbo kukei haoenei khübü müt yoa nam aweyo; aieilausi haoenei ngühmaanglanko kümbei.

¹⁶Shedbü lembü shanga nam hoba saüsimaü lembü shanga nam BUNYUBOUeibü chem to asunget, kho ungshedbou shuong shangabü kikei.

¹⁷Kheijinei Siriabü Choba Hazael angkei, hoba Gat khulimbo wapyokei hoba kho lekei, hoba Hazaelei Jerusalem to haula sepeikei.

¹⁸Hobaje Jihudabü Choba Jehoashei bousi shuong, Jihudabü Choba shuong, Jehoshafat, Jehoram hoba Azariaei khümbo kuan kibü saopobü peisilei shuong, hoba BUNYUBOUeibü chema thanshanga hapbü hon pendou, hoba Chobaeibü chema kibü, pendou Siria Choba Hazael chem to hautikei, khoei hao Jerusalem ka ngaian apbei.

¹⁹Tou Joasheibü lubü kümsilei, hoba haoei kümbü pendou Jihudabü Choba shuong Lungbüdobü lea khübü kho doan aki lo?

²⁰Hobaje hao khangenbü shuong meimeikei hoba huon amaibü takkei hoba Silla aeto yanbü lama Milloeibü chema Joash haitikei.

²¹Aishanga Shimeatheibü shou Jozakar hoba Shomereibü shou Jehozabad, hao khangenbü shuongei hao haitikei, hoba Dawid sangnyua haoenei hao jembü bousi shuong yoa khünkei hoba haoeibü shou Amaziaei hao jeila songdakkei.