Read Chang Naga 2 CHOBA SHUONG 13 Bible Online

2 CHOBA SHUONG 13 - Chang Naga bible

2 CHOBA SHUONG 13

¹Jihuda Choba Ahaziaeibü shou Joash po saoto sem boubüa Jehueibü shou Jehoahazei Samariaa Israel thüka songdakla khangkei, hoba po anthük nyet songdakkei.

²Hobaje BUNYUBOU thedanga ai amai kho kümbei, hoba Nebateibü shou Jeroboameibü shabü laobouei haoei Israelbü la shed shontikei kho phai sembei, kho ka hao abang.

³Hobaje Israelbü khulimbo BUNYUBOU khau angkei, hoba haoei haoen Siriabü Choba Hazael ik to hoba Hazaeleibü shou Benhadad ik to athakko khümbo kukei.

⁴Kheijinei Jehoa- hazei BUNYUBOU to sukeijakei, hoba BUNYUBOUei hao to ngüha lekei; aieilausi Israelbü shieikoebü, Siria Chobaei haoen lai shieikoekei, haoei hapbei.

⁵Hobaje BUNYUBOUei Israelbü la khümenbou che kukei, hibü haoen Siriabü ik ka longan apbei, hoba Israel shousi shuong shangied tegü haoen neichema kikei.

⁶Khei yingasikei Jeroboameibü shabü laobouei haoei Israelbü la shed shontikei, haoen kho ka abang; lausikei khonei paikei, hoba Samariaa tokei Ashera kikei.

⁷Aishanga mütshuong ka koli sepai anjinsem hoba kailong an hoba kao kabü sepai hajar an to liman haoei Jehoahaz la ai üpyoku; aishanga Siria Chobaei haoen shemtikei; khei amshanga thamngu phatko haoen yeitikei.

⁸Tou Jehoahazeibü joubü kümsilei hoba haoeibü hau khübü kho Israelbü Lüngbüdobü lea doan aki lo?

⁹Hobaje Jehoahaz bousi shuong yoa yepbei, hoba haoenei hao Samariaa khünkei, hoba haoshou Joashei hao jeila songdakkei.

¹⁰Jihuda Choba Joash po khujinto nyet boubüa Jehoaha- zeibü shou Jehoashei Israel thüka Samariaa songdakla khangkei, hoba po anthük lak songdakkei.

¹¹Hobaje BUNYUBOU thedanga ai amai kho kümbei. Nebateibü shou Jeroboameibü shabü laobouei haoei Israelbü la shed shontikei, hao kho ka abang, lausikei haoei khonei paikei.

¹²Tou Joasheibü lubü kümsilei hoba haoei kümbü pendou hoba haoeibü hauei hao Jihudabü Choba Amazia to wapyobü, khübü kho Israelbü Choba shuong Lüngbüdobü lea doan aki lo?

¹³Hobaje Joash hao bousi shuong yoa yepbei, hoba Jeroboam haoeibü Choba setshanga setkei; hoba Samariaa Israelbü Choba shuong yoa Joash khünkei.

¹⁴Tou ladang Elisha hao hailabü shatei shatko kikei, Israelbü Choba Joash hao jungto louyenkei, hoba hao thüka haapbei, hoba laukei, “Abou, abou! Israelbü kailong hoba khoeibü sepai shuong!”

¹⁵Hobaje Elishaei hao to laukei, “Lau hoba laujin sungashi.”

¹⁶Hobaje haoei Israel Choba to laukei, “Kaibü laua hatashi;” hoba haoei khonei hatkei. Hobaje Elishaei haoeibü ik kho Chobaeibü ika peitian phokei.

¹⁷Hobaje haoei laukei, “Chaangbou ae koulom ipashi;” hoba haoei kho ipbei. Kheijinei Elishaei laukei, “Kipashi;” kheijinei haoei kipbei. Hobaje haoei laukei, “Thükenbou BUNYUBOUeibü laujin hoba Siriabü thüka thükenbü laujin. Aishanga nyi Siriabü Afeka haoen ashemti shongko wapyolabü.”

¹⁸Hobaje haoei laukei, “Laujin shuong kho sungba;” hoba ladang haoei khübü kho sungbakei, haoei Israel Choba to laukei, “Kao to ngümashi;” hoba haoei semnei ngümbei, hoba nangkei.

¹⁹Kheijinei Mühghaü müt kho hao to khauangkei, hoba laukei, “Nyi ngaonei ayingsi laknei ngümla kikei; tegüje nyi Siria amauti shongko wapyokhoulabü, lausikei touje nyi Siriabü semnei ong thüklabü.”

²⁰Hobaje Elisha haikei, hoba haoenei hao khünkei. Tou Moabbü lakoubü danei po weko kebüongbü chaloua ong sang shila loukei.

²¹Hobaje haoenei müt che khünko kijinei, chühashi, haoenei sangshibü tan che hapbei hoba haoenei müt kho Elishaeibü heemang to tekan jinkukei, hoba müt khoei Elishaeibü loa meitisilengko hao langngaikei, hoba haoeibü youei lokei.

²²Hobaje Siriabü Choba Hazaelei Jehoahazeibü songdak sünga Israelbü shieikoekei.

²³Lausikei haoen to BUNYUBOUei onou lenkei, hoba haoen jungto sepeikei; aieilausi Abraham, Isak hoba Jakob to theyolanyobü phokei, hoba khübü kho aleilukulabü ayingsi haoei tou sühko hao jungka tekan üpbo kia.

²⁴Hobaje Siriabü Choba Hazael haikei, hoba haoshou Benhadadei hao jeila songdakkei.

²⁵Kheijinei Jehoashei Hazaeleibü shou Benhadad ik ka haobou Jehoahaz ka wapyojinei sungbü sangnyu shuong nyibou lekei. Joashei semnei sühko hao thükkei, hoba Israelbü sangnyu shuong sungngaikei.