Read Chang Naga 2 CHOBA SHUONG 14 Bible Online

2 CHOBA SHUONG 14 - Chang Naga bible

2 CHOBA SHUONG 14

¹Israel Choba Jehoahazeibü shou Jehoash po nyi boubüa Jihudabü Choba Joasheibü shou Amaziaei songdakla khangkei.

²Haoei songdakla khangjinei hao po saoto ngao kikei; hoba haoei Jerusalema po saoto gü songdakkei, hoba haoeibü nyu nyen Jehoaddin; sao Jerusalembü kikei.

³Hobaje BUNYUBOU thedanga ai janbü kho haoei kümbei, khei yingasikei haobou Dawid aphatko kikei; haobou Joashei kümbü tegü pendou kümbei.

⁴Khei yingasikei shongha lembüje sungan üpbo kikei; mütshuongei tokei haitibü lembü kukei, hoba shongh lemshanga jen juokkei.

⁵Hobaje Choba sangle kho haoeibü ika kaangkhühtham kümsilengko haobou haitibü khangenbü shuong haoei haitikei.

⁶Lausikei haitibüeibü shousi shuongje ühaiti. BUNYUBOUei sakkubü tegü Mosa ngühkhüm lea doan kibü tegütham “Shousi shanga nyusibou ühaitilabü, ayingsi nyusibou shanga shousi ühaitilabü; lausikei mütpem weko jembü shanga hailabü.”

⁷Haoei Edombü Jem Yomanga hajar an haitikei, hoba Sela lepde shian apbei, hoba tat chalou sühko kho Joktheel nyenan ki.

⁸Kheijinei Israel Choba Jehueibü shou Jehoahazeibü shou Jehoash jungto Amaziaei ngühlang hautiko laukei, “Kaiya, sen theshuok haüyokho.”

⁹Hobaje Israel Choba Jehoashei Jihuda Choba Amazia jungto ngühlang hautiko laukei, “Lebanona kibü jakham long cheei Lebanona kibü cedar bulong jungto hautiko laukei, ‘Kaibü nouyangshou kü shou la yakla lela kushi;’ hoba khünei Lebanon kabü yammei che dankei hoba jaklong kho naknyinkukei.

¹⁰Maimaitham nyi Edom thükkei, hoba kaibü maangpon yaangan apbei; kaibü soneikangbüei maanghaian chema kishi; aieilausi nyi no hoba ka yoa Jihudabü tuonglabü lele aila nyi khonsak longtila?”

¹¹Lausikei Amaziaei ngüha ale; hibü Israel Choba Jehoash angkei; hoba hao si Jihuda Choba theshuok haüyoan Jihudabüeibü Bethshemesa lason shuokkei.

¹²Hobaje Israelbü thedanga Jihudabüei athük hapbei, hoba mütpem weko lulueibü neichem to satetlangkei.

¹³Hobaje Israel Choba Jehoashei, Bethshemesa Ahaziaeibü shou Jehoasheibü shou Jihuda Choba Amazia lapbei, hoba Jerusalem to loukei; hoba Jerusalem kümthang Efraim koukhün ka chemnyek koukhün sühko iknop saongao lei leilutikei.

¹⁴Hobaje hon si chandinam pendou hoba Chobaeibü thanshang chema hapbü hoba BUNYUBOU chema hapbü hoba lang lapbü shuong yoan haoei leian sungkei hoba Samaria to ngaikei.

¹⁵Tou Jehoasheibü joubü kümsilei laobou haoei kümbei, hoba haoeibü hau hoba haoei lai Jihudabü Choba Amazia to wapyokei, khübü kho Israelbü Lüngbüdobü lea doan aki lo?

¹⁶Hobaje Jehoash bousi shuong yoa yepbei, hoba Israelbü Choba shuong yoa Samariaa khünkei, hoba haoeibü shou Rehoboamei hao jeiko songdakkei.

¹⁷Hobaje Jihudabü Choba Jehoasheibü shou Amazia Israel Choba Jehoahazeibü shou Jehoash haian phaia po anthükngao salang kikei.

¹⁸Tou Amaziaeibü lubü kümsilei Jihudabü Choba shuong Lüngbüdobü lea doan aki lo?

¹⁹Hobaje haoenei hao khulimbo Jerusalema huon takkei; hoba hao Lakhish to satlangkei, lausikei haoenei hao lambo Lakhish to hautikei hoba khünei hao haitikei.

²⁰Hobaje haoenei hao kolia künbakei, hoba Dawid sangnyua haoeibü bousi shuong yoa Jerusalema khünkei.

²¹Kheijinei Jihudabü pendouei po anthüklak jailebü Uzzia leijung louan haobou Amaziaeibü setshanga Choba yeitikei.

²²Haoei Elath sangngaikei hoba kho Jihudabü la kungaikei; kho Amazia haobousi shuong yoa yepan phaia.

²³Jihudabü Choba Joasheibü shou Amazia po anthükngao boubüa Israel Choba Jehoasheibü shou Jeroboamei Samariaa songdakla khangkei.

²⁴Hobaje BUNYUBOU junga ai amai kho haoei kümbei; Nebateibü shou Jeroboam shabü laobouei haoei Israel la shed shontikei, khübü pendou ka hao abang.

²⁵Haoei Israelbü leilang Hamath Lamnyu ka Araba yungnyu sühko BUNYUBOU Israel Mühghaü ngüh, Geth-heferbü thuseibü Amittaieibü shou Jona danko haoei laubü tegütham haoei Israelbü leilang kungaikei.

²⁶Aishanga BUNYUBOUei Israel khonsakbü yaang chühenkei; aieilausi aaomüt ayingsi dongebü aokei üpyo. Israel shanga thuibü ao aki.

²⁷Lausikei BUNYUBOUei mühnyu phang ka Israel haman üpbulabü dogo laukei; khoei haoei Joasheibü shou Jeroboam ik danko haoen püetkei.

²⁸Tou Jeroboameibü lubü kümsilei hoba haoei kümbü pendou hoba haoeibü hau hoba haoei lai wapyokei hoba haoei lai Jehudabüeibü Damaska si Hamath Israelbü la kungaikei, khübü kho Israelbü Choba shuong Lüngbüdobü lea doan aki lo?

²⁹Hobaje Jeroboam bousi shuong yoa yepbei, hoba haoeibü shou Zekhariaei hao jeiko songdakkei.