Read Chang Naga 2 CHOBA SHUONG 15 Bible Online

2 CHOBA SHUONG 15 - Chang Naga bible

2 CHOBA SHUONG 15

¹Israelbü Choba Jeroboam po saoto nyet boubüa Jihudabü Choba Uzzia, Amaziaeibü shouei songdakla khangkei.

²Haoei songdakla khangjinei hao po anthüklak jaishou kikei, hoba haoei Jerusalema po anjinsemto nyi songdakkei, hoba haoeibü nyu nyen Jekolia Jerusalem sao kikei.

³Hobaje haobou Amaziaei kümbü pendou tegü haoei BUNYUBOU thedanga ai maibü kho kümbei.

⁴Khei yingsikei shongha lemshang sungan üpbo kikei; mütshuongei tokei haitibü lembü kukei, hoba khübü shongha jen juokkei.

⁵Hobaje BUNYUBOUei Choba to ngümbei, hibü hao hainyet sühko im baubü müt kiteikei, hoba chem lubü chenei kikei. Hobaje Chobaeibü shou Jothamei kaonyeka mütli thüka matjembo kikei.

⁶Tou Uzziaeibü joubü kümsilei, hoba haoei kümbü pendou kho Jihudabü Choba shuongeibü Lüngbüdobü lea doan aki lo?

⁷Hobaje Uzzia bousi shuong yoa yepbei, hoba haoenei hao bousi shuong yoa Dawid sangnyua khünkei hoba hao shou Jothamei hao jeiko songdakkei.

⁸Jihuda Choba Uzzia po khujinto set boubüa Jeroboameibü shou Zekhariaei Israel thüka Samariaa lit lak songdakkei.

⁹Hobaje haobouei kümbü tegü BUNYUBOU thedanga ai amai kho kümbei; Nebateibü shou Je- roboameibü shabü laobouei haoei Israelbü la shed shontikei kho ka hao abang.

¹⁰Hobaje Jabesheibü shou Shallumei hao khulimbo huon takkei hoba mütshuong thedanga hao to ngümbei hoba haitikei, hoba hao jeiko songdakkei.

¹¹Tou Zekhariaeibü joubü kümsilei Israel Choba shuongeibü Lüngbüdobü lea doan kia.

¹²Ho BUNYUBOUeibü ngüh laobouei haoei Jehu to, “Kaibü shousi shuong Israeleibü Choba setshanga meten leiboubü sühko setlabü” dogo laubü kikei kho loushedkei.

¹³Jabesheibü shou Shallumei Jihudabü Choba Uzzia po khujinto gü boubüa songdakla khangkei, hoba haoei Samariaa lit che songdakkei.

¹⁴Hobaje Gadieibü shou Menahem Tirza ka angkei, hoba Samaria to loukei, hoba hao to wapyokei, hoba Jabesheibü shou Shallum Samariaa haitikei, hoba hao jeiko songdakkei.

¹⁵Tou Shallumeibü joubü kümsilei, hoba haoei huon amaibü takbü, chühashi, khübü kho Israelbü Choba shuong Lüngbüdobü lea doan kia.

¹⁶Kheijinei Menahemei Tifsa hoba khünei kibü pendou, hoba Tirza ka leilanga kibü mautikei, aieilausi haoenei hao la aipbu; khei yingbü khoei haoei kho mautikei; hoba khünei yaksa mang akongbü pendou shimong lipyetkukei.

¹⁷Jihudabü Choba Uzzia po khujinto gü boubüa Gadieibü shou Menahemei Israel thüka songdakla khangkei, hoba Sama- riaa po an songdakkei.

¹⁸Hobaje BUNYUBOU thedanga ai amai kho haoei kümbei; Nebateibü shou Jeroboameibü shabü laobouei haoei Israelbü la shed shontikei kho ka haoei haoeibü salang sünga abang.

¹⁹Kaonyek khulimbo Assiriabü Choba Pul loukei, hoba Menahemei haoeibü ika Choba songdak kaangkhühtham yeitila haoeibü thuibü hao yoa kila shanga Pul la chandinam seret khujin bang atbü hajar saongao lei kukei.

²⁰Hobaje Menahemei Israelbüeibü nam, khei nyaksinam kibü yaangbü müt pendou ka mütpem weko ka chandinam shekel anjinsem bang Assiria Choba la kula sungkei. Hibü Assiria Choba ngaikei hoba khonei kaonyeka asetngai.

²¹Tou Menahemeibü joubü kümsilei, hoba haoei kümbü pendou khübü kho Israelbü Choba shuong Lüngbüdobü lea doan aki lo?

²²Hobaje Menahem bousi shuong yoa yepbei, hoba haoeibü shou Pekahiaei hao jeiko songdakkei.

²³Jihudabü Choba Uzzia po anjinsem boubüa Menahemeibü shou Pekahia Israelbü thüka Samariaa songdakla khangkei, hoba po nyi songdakkei.

²⁴Hobaje haoei BUNYUBOU thedanga ai amai kho kümbei; Nebateibü shou Jeroboameibü shabü laobouei haoei Israelbü la shed shontikei kho ka abang.

²⁵Hobaje Remaliaeibü shou Peka, haoeibü lajamleibouei Gileadbü müt anjinsem leian Pekalia khulimbo huon takkei, hoba Samariaa Chobaeibü laangchema hao haitikei, hoba hao jeiko songdakkei.

²⁶Tou Pekahiaeibü joubü kümsilei hoba haoei kümbü pendou, chühashi, khübü kho Israelbü choba Lüngbüdobü lea doan kia.

²⁷Jihudabü Choba Uzzia po anjinsemto nyi boubüa, Remaliaeibü shou Pekaei Israelbü thüka Samariaa songdakla khangkei hoba po saoche songdakkei.

²⁸Hobaje haoei BUNYUBOU thedanga ai amai kho kümbei; Nebateibü shou Jeroboameibü shabü laobouei haoei Israelbü la shed shontikei kho ka abang.

²⁹Israel Choba Peka haanga Assiriabü Choba Tiglath Pileser loukei hoba Janoa, Kedesh, Hazor, Gilead, Galil hoba Naftali kaodak pendou sungkei, hoba haoei haoen Assiria to langsenkei.

³⁰Hobaje tou Jihuda Choba Uzziaeibü shou Jotham po saoche boubüa, Eleaeibü shou Hosheaei Remaliaeibü shou Peka khulimbo huon takkei, hoba hao haitikei, hoba hao jeiko songdakkei.

³¹Tou Pekaeibü joubü kümsilei hoba haoei kümbü pendou, chühashi, khübü kho Israelbü Choba shuong Lüngbüdobü lea doan kia.

³²Israel Choba Remaliaeibü shou Peka po anthüknyi boubüa Jihudabü Choba Uzziaeibü shou Jothamei songdakla khangkei.

³³Haoei songdakla khangjinei hao po saotongao kikei, hoba haoei Jerusalema po anthüklak songdakkei; hoba haoeibü nyu nyen Jerusha, Zadokeibü shou kikei.

³⁴Hobaje haoei, haobou Uzziaei kümbü tegütham, BUNYUBOU thedanga ai maikei kho kümbei.

³⁵Khei yingasikei shongh lemshang sungan üpbo kikei; mütshuongei tokei haitibü lembü kukei hoba khübü shongh lemshanga jen juokkei. BUNYUBOUeibü chem thükkabou bakou haoei kümbei.

³⁶Tou Jothameibü joubü kümsilei hoba haoei kümbü pendou kho Jihudabü Choba shuong Lüngbüdobü lea doan aki lo?

³⁷Khübü chaloua BUNYUBOUei Jihudabü khulimbo Siriabü Choba Resin hoba Remaliaeibü shou Peka hautila khangkei.

³⁸Hobaje Jotham bousi shuong yoa yepbei hoba Dawid sangnyua bousi shuong yoa khünkei, hoba haoeibü shou Ahazei hao jeiko songdakkei.