Read Chang Naga 2 CHOBA SHUONG 17 Bible Online

2 CHOBA SHUONG 17 - Chang Naga bible

2 CHOBA SHUONG 17

¹Jihudabü Choba Ahaz po anthüknyi boubüa Eleaeibü shou Hosheaei Samariaa Israel thüka songdakla khangkei, hoba po gü songdakkei.

²Hobaje BUNYUBOU thedanga ai amai kho haoei kümbei, khei yingsikei hao thedangto kibü Israelbü Choba shuong tegütham aying.

³Hao khulimbo Assiriabü Choba Shalmanezer angkei, hoba Hoshea, hao khangenbou yeikei, hoba hao jungto jongsak sungbakei.

⁴Hobaje Assiriabü Chobaei Hosheaei huon amaibü takbü hapbei; aieilausi haoei Ijepbü Choba jungto ngühlang hautikei, hoba haoei po weko kümbü tegü Assiriabü Choba jungto khüm ohautisije Assiriabü Chobaei hao lapbei hoba thüngdanga khinan phokei.

⁵Kheijinei Assiriabü Choba kaonyek pendou to longkei, hoba Samaria to angkei, hoba haoei kho po sem komlepbei.

⁶Hoshea po gü boubüa Assiriabü Chobaei Samaria lekei hoba haoei Israelbü Assiria to leilangkei, hoba Halaa hoba Gozan shumang Habora hoba Medeshbü sangnyu shuonga haoen apyokei.

⁷Hobaje kho hai haüthükkei, aieilausi Israel shousi shuongei BUNYUBOU haoeneibü Mühghaü, aoei haoen Ijepbü Choba Faraoeibü ik ka leiyenkei, hao khulimbo shabü jungeikei, hoba mühghaü shuong to soumo hatkei.

⁸Hobaje BUNYUBOUei Israel shousi shuong thedang ka shian apbubü hangsilam hoba Israelbü Choba shuongei shean lenbü songadoa paikei.

⁹Hobaje Israel shousi shuongei huphanga BUNYUBOU haoeneibü Mühghaü khulimbo tükde ayingbü kümsilei kümbei. Hobaje haoeneibü sangnyu pendoua haoenei haoen shanga lapheidip ka balepan kibü sangnyu sühko shongha lemshang kümbei.

¹⁰Hobaje nyemei huonglepan kibü bulong phang wekoa hoba shongha lemshang wekoa saopobü thaonyu hoba Ashera haoen shanga phokei,

¹¹hoba haoen to shaang BUNYUBOUei langbü phangshuongei kümbü tegü haoenei khünei shongha lemshang pendoua jen juokkei. Hobaje haoenei kümbü kümsilei amaibü pendoua BUNYUBOU khau angtikei.

¹²Hobaje haoenei heangsho shuong khangenkei, laobou shanga BUNYUBOUei haoen to lenkei, “Kanei ho tegübü kümsilei akümjan.”

¹³Khei yingsikei BUNYUBOUei haoeibü thuseibü hoba tetenbü pendou danko Israel si Jihuda maangsanglabü lenko laukei, “Ngei kaneibü bousi shuong la sakkubü hoba laobou ngei kan jungto ngo khangenbü thuseibü shuong danko hautibü ngühkhüm shuong pendou tegütham, kan amaibü lamnyu ka sepeiashi, hoba ngei sakkubü hoba ngeibü lanshatbü ngühkhüm jungeiashi.”

¹⁴Khüneikei haoenei ngüha ale, hoba bousi shuong aoyouei BUNYUBOU haoeneibü Mühghaü to maialem, haoeneibü maangpon kaangbü hima haoen maangpon kaangkei.

¹⁵Hobaje haoeibü lanshatbü ngühkhüm hoba bousi shuong yoa haoei kümbü the- yolanyobü hoba haoeibü aukabü shuong laobouei haoen la aukabü kukei, khübü kho asunglet; hoba haoen amlangbü phaito sembei, hoba lejim akiko apbei, hoba haoen kaijembo kibü phangshuong phaito satkei; hoba haoen shanga BUNYUBOUei haoen phatko haoenei akümjan dogo ngühkhüm kukei.

¹⁶Hobaje haoenei BUNYUBOU haoeneibü Mühghaüei sakkubü pendou inletkei hoba haoen shanga tühnyinbü heangsho noksa kümbei, hoba masu paangshou penyi hoba Ashera che kümbei, hoba müh kabü khanshoulitshou lembei, hoba Baal khangenkei.

¹⁷Hobaje haoenei haoeneibü shousi bousu yaksa shuong lembü kula juokettikei, hoba shanyotakyo hoba seibü- yaübü kümsilei kümbei, hoba hao khau angtilabü lele BUNYUBOU thedanga laobou amaibü kikei, haoenei kho kümla haoen lolo yaakkei.

¹⁸Khei yingsije Israelbü to BUNYUBOUei aeibou khau angkei, hoba hao jungka haoen sungan apbei; Jihudabü phang to liman aokei jouan akitei.

¹⁹Tokei Jihudaeikei BUNYUBOU haoeneibü Mühghaüei sakkubü ajungei; lausikei Israelei khangenan phokubü haoeneibü pisong bousong jungeikei.

²⁰Hobaje BUNYUBOUei Israel phang pendou asunglet hoba haoen khonkutikei; hoba haoen hao thedang ka haoei tekan üpshongko haoen sangshibü ik to khümbo kuan apbei.

²¹Ladang Dawid chung ka haoei Israel jitan apbei, haoenei Nebateibü shou Jeroboam Choba yeitikei. Hobaje Israelbüei BUNYUBOU phai sembü ka Rehoboamei shian sattikei hoba haoen la shabü yaang shontikei.

²²Hobaje Israel shousi shuongei Jeroboamei kümbü haoeibü shedbü pendoua paikei.

²³BUNYUBOUei haoen hao jungka sungan üpshongko haoei hao khangenbü thuseibü shuong danko laubü tegü haoen khübü ka abang. Hibü Israelbü jembü kaodak ka Assiria to leilangkei, hoba tat sühko haoen khünei kia.

²⁴Hobaje Assiriabü Chobaei Babilon ka, Kutha ka, Avva ka, Hamath ka, hoba Safarvaim ka, mütshuong leian loukei, hoba Samaria sangnyu shuonga Israel shousi shuong jeila phokukei, hoba khübü sangnyu shuonga kikei.

²⁵Hobaje khünei haoen ki khangnyet ka BUNYUBOU to soumo ühüt, hibü BUNYUBOUei haoen yoto molosaonyu hautikei, laobouei haoen at taketkei.

²⁶Hibü haoenei Assiriabü Choba to lenko laukei, “Nyi leilangbü hoba Samaria sangnyu shuonga apyobü phangshuongei kaonyek kabü mühghaüeibü song angekei; khei yingbüei haoei haoen yoto molosaonyu hautikei, hoba chühashi, haoei haoen haitida; aieilausi haoenei kaonyek kabü mühghaü songlehaang ange.”

²⁷Kheijinei Assiriabü Chobaei sakkuko laukei, “Ngei leibabü ungshedbou shuong yo ka che thito ngaitiashi; hoba hao hauan khünei kitiashi, hoba haoen la kaonyek kabü mühghaü songle- haang nalena.”

²⁸Hibü haoenei Samaria ka leilangbü ungshedbou shuong yo ka che loukei, hoba Bethela kikei hoba haoenei BUNYUBOU to lai soumo hatla kho lenkei.

²⁹Khei yingsikei phang wekoei haoeneibü mühghaü shuong kümbei, hoba Samariabü shuongei kümbü shongh lemshanga phang wekoei haoen kibü sangnyu shuonga khübü kho phokei.

³⁰Hobaje Babilonbüei Sukkathbenothbü mühghaü heangsho, Kuthabüei Nergalbü heangsho, Hamathbüei Ashimabü heangsho,

³¹hoba Avvabüei Nibhaz si Tartak heangsho kümbei, hoba Sefarvaimbüei haoeneibü shousi shuong Adrammelekh si Anammelekh Safarvaim mühghaü shuong shanga wana juokkei.

³²Haoenei BUNYUBOU to soumo hatkei, hoba haoen shanga haoen yo ka shongha lemshang shanga ungshedbou shuong pienkei, hoba shongh lemshanga haoen shanga haoenei haitibü lembü kukei.

³³Hibü haoenei BUNYUBOU to soumo hatkei, lausi dogokei haoenei haoen leibabü kaonyek phangshuongeibü songsido haang tegütham lulueibü mühghaükei khangenkei.

³⁴Tat sühko haoenei shangiedbü songle tegütham kümda; haoenei BUNYUBOU to soumo ühütda, ayingsi haoeneibü lanshatbü ngühkhüm, ayingsi haoeneibü songle ngühkhüm, ayingsi laobou BUNYUBOUei Jakob, aoto Israel dogo ngakei, haoeibü shousi shuong la sakkubü phaito asem.

³⁵Aoyou to BUNYUBOUei thebülanbü lekei, hoba sakkuko haoen to laukei, “Kanei lubü mühghaü shuong to alemjan, ayingsi kan lolo haoen to tekhüpet, ayingsi haoen to meisiau haitiko telem;

³⁶lausikei BUNYUBOU aoei kan Ijep kaodak ka hau yaangbüei hoba phem shingan leiyenkei, hao to kanei kan lolo khüpetan lemjan hoba hao la kanei lembü kujan.

³⁷Hobaje kan shanga lanshatbü ngühkhüm, songle ngühkhüm shuong hoba ngühkhüm si sakkubü kanei ponpen shanga jungeijan. Kanei lubü mühghaü to ühütjan;

³⁸hoba ngei kan yoa kümbü theyolanyobü kanei amaajan, ayingsi kanei lubü mühghaü la soumo akujan;

³⁹lausikei BUNYUBOU kaneibü Mühghaü to kanei soumo hatjan, hoba kan dangboueibü ik ka haoei püetlabü.”

⁴⁰Khei yingsikei haoenei hao to ngüha ale, lausikei haoenei shangiedbü pisong bousong tegü kümbei.

⁴¹Hibü khübü phang shuongei BUNYUBOU to soumo hatkei lausi dogokei haoenei heangsho noksa shuong khangenkei; kho tegü haoeneibü shousi shuong, shisishousi shuongei haoeneibü bousi shuongei kümbü tegütham tat sühko kümda.