Read Chang Naga 2 CHOBA SHUONG 18 Bible Online

2 CHOBA SHUONG 18 - Chang Naga bible

2 CHOBA SHUONG 18

¹Tou Israel Choba Elaeibü shou Hoshea po sem boubüa, Jihuda Choba Ahazeibü shou Hezekiaei songdakla khangkei.

²Hao songdakla khangjinei po saoto ngao kikei; hoba haoei Jerusalema po saoto gü songdakkei, hoba hao nyu Abi nyenbü Zekhariaeibü nouyangshou kikei.

³Hobaje haobou Dawidei kümbü pendou tegütham BUNYUBOU thedanga ai tükde kho haoei kümbei.

⁴Haoei shongh lemshang kho sungan apbei, hoba saopobü thaonyu shuong leilutikukei, hoba Ashera wapan koutikei, hoba Mosaei kümbü pinyu kho netla yeiko leilutikukei, aishanga khübü chalou sühko Israelbü shousi shuongei kho la jen juokkukei, hoba khüto haoenei Nehushtan dogo laukei.

⁵Haoei BUNYUBOU Israel Mühghaü to maanglembei, khoei hao phaiaje Jihudabü Choba pendou yoa ayingsi hao to shaang kibü yoa hao phatko ao akitei.

⁶Aieilausi haoei BUNYUBOU to ikphen lambei, hoba haophai sembü ka hao abang; lausikei BUNYUBOUei Mosa la sakkubü, haoei sengkubü shuong haoei jungeikei.

⁷Hobaje BUNYUBOU hao yoa kikei, hao laeto ong haulaje hao thusinaang maiko, hoba haoei Assiriabü Choba khulimbo lokei hoba hao akhangen.

⁸Filistiabü Gaza hoba khoeibü leilang laphei thoshang baei lelepan kibü sangnyu sühko haoei shian apbei.

⁹Hobaje Hezekia Choba po lei boubüa, kho Israelbü Choba Elaeibü shou Hoshea po nyet boubü kikei, Assiriabü Choba Shalmenezer Samaria khulimbo angkei, hoba hao komlepbei.

¹⁰Hobaje sembou po thonlama haoei kho sungkei, khei Hezekia po lak boubüa kho Israelbü Hoshea, po gü boubüa Samaria lekei.

¹¹Hobaje Assiriabü Chobaei Israelbü Assiria to langsenkei hoba Halaa Gozan shumanga Habor si Mede sangnyu shuonga haoen phokei.

¹²Aieilausi haoenei BUNYUBOU haoeneibü Mühghaü ngüha ale; lausikei haoeibü theyolanyobü ngühkhüm leilukei, khei BUNYUBOU khangenbou Mosaei sakkubü pendou kho to ngüha ale, ayingsi kho aküm.

¹³Tou Hezekia Choba po anthüklei boubüa Assiriabü Choba Sennakherib, ba lean kibü Jihudabü sangnyu shuong khulimbo angkei, hoba khübü kho sungkei.

¹⁴Hobaje Jihudabü Choba Hezekiaei Assiriabü Choba jungto Lakhish to hautiko laukei, “Ngei shedtia, khei nyi kü la ai küntilaje ngei künlabü, kü jungka ong ngaiashi.” Hibü Assiriabü Chobaei Jihudabü Choba Hezekia la chandinam seret khujin bang atbü saongao sem hoba hon seret khujin bang atbü khujin attikei.

¹⁵Hobaje Hezekia Chobaei BUNYUBOUeibü chema hapbü chandinam pendou hoba Chobaeibü thanshang chema kibü hao la kukei.

¹⁶Kho chaloua Hezekia Chobaei BUNYUBOUeibü lembüchem koukap ka hoba Jihudabü Choba Hezekiaei khangan phobü kouyem thaonyu ka hon sungenkei hoba Assiriabü Choba la kukei.

¹⁷Hobaje Assiriabü Chobaei Tartan Rab-saris hoba lajamleibou Lakhish ka Hezekia Choba jungto sepai tan yaangbü che yoa Jerusalem to hautikei. Hobaje ladang haoen angkei, neisakbü shuong khongthu lamkhonga kibü thükkabou deikhün deiso nyangko to haoen loukei hoba lokei.

¹⁸Hobaje ladang haoenei Choba to ngako kikei, haoen jungto Hilkiaeibü shou Eliakim Chobaeibü chema ikjaibou, hoba Shebna dobou hoba Lüngbüdobü dobou Asafeibü shou Joa haoen jungto longkei.

¹⁹Hobaje lajamleibouei haoen to laukei, “Tou kanei Hezekia to lenashi: Hai Choba yaangbou Assiriabü Chobaei lauda, ‘No ainei nongan maanglembo mailem kida?

²⁰Ngühkong kho wapyola shanga shujembü kümthen hoba hau dogo nyi damda sai? Tou kanei kü khu limbo longdabuba kanei aoto maanglemda?

²¹Tou chühashi, nyi ho nyinbü thakdu ju, khei Ijep to maanglemda, laobou ladang müt cheei julaje khoei haoeibü ik to jetlabü hoba kho pailabü. Hao to maanglembü pendou shanga Ijep Choba Farao kho khei ki.’

²²Lausikei kanei kü to, ‘Künei küneibü BUNYUBOU Mühghaü to maanglemda’ dogo laualonga, kho hao, aoeibü shongh lemshang hoba lemshon Hezekiaei sungan apbei hoba Jihuda si Jerusalem to kanei ho lemshang thedanga Jerusalema lemjan dogo lena, kho hao aying lo?

²³Tou khei yingsije ngei ka to sudajada, ngeibü BUNYUBOU Assiria Choba la thebülanbü kuashi, hoba nyi ong kolia setbü shuong hao to settikho laua longa ngei ka la koli hajar penyi kukho.

²⁴Khülongaje lai küman ngeibü bunyubou hanboutham khangenbou yoa lajamleibou che sepeinyu ngaitienla? Khei yingsikei nyi Ijepbü kailong shuong hoba koli sepai shuong to maanglemda.

²⁵Tou ngei BUNYUBOU ayoko ho kaonyek khulimbo mautila angkei sai? BUNYUBOUei kü to laukei, ‘Ho kaonyek khulimbo angashi, hoba kho mautishi.’ ”

²⁶Kheijinei Hilkiaeibü shou Eliakim, Sheba, hoba Joaei lajamleibou to laukei, “Sanoudambo no khangenbou shuong to nyi Aramaik ngühyemei joyoashi, aieilausi künei kho ditenda, hoba ba maanga kibü shuongei ditlabü lele kün to Jihudabü ngühyema kün to tejoyoma.”

²⁷Lausikei Rakshakeei haoen to laukei, “Habü ngüh laula ngeibü bunyubouei kaibü bunyubou hoba ka jungto hautikei sai? Baa setan kibü shemlabü mütshuong, aoyouei ka yoa jembüei apbü phet shaula hoba jet yungla ki, haoen jungto ngo ohauti lo?”

²⁸Kheijinei lajamleibou lokei, hoba Jihuda ngühyemei ngüh yaangbüei ngekkei, hoba lenko laukei, “Kanei Choba yaangbü Assiria Choba ngüha leashi!

²⁹Chobaei hai lauda: ‘Hezekiaei kan tehuonetti, hoba haoei kan haoeibü ikei akhümenlabü.

³⁰Ayingsi, BUNYUBOUei maimaitham sen khümenlabü hoba ho sangnyu Assiriabü ik to akulabü’ dogo lauko Hezekiaei kan la BUNYUBOU to maitelemti.

³¹Hezekia to ngüha tele, aieilausi Assiriabü Chobaei hai lauda, ‘Kü to sangmai kümshi, hoba kü jungto kaiyang; kan mütpem weko ai lulueibü semlüh, hoba mütpem wekoei lulueibü bhuklong ka shauko kiashi, hoba lulueibü deikhün ka dei yungko kiashi.

³²Kaneibü kaodak phatbü kaodak che to youshou si semlüh kibü kaodak, nyak si semlühdei sek kibü kaodak, oliv onang hoba naodei kibü kaodak, khei kan ühaiko lang kilabü lele BUNYUBOUei sen leiyenlabü dogo amlangbü ngüh lauko loujinei kanei Hezekiaeibü ngüh teditku.

³³Assiriabü ik ka phangshuongeibü mühghaü shuong cheei ongkei jembü kaodak püetlep sai?

³⁴Hamath si Arpad mühghaü shuong lanei ki? Safarvaim, Hena, hoba Ivva mühghaü shuong lanei ki? Kü ik ka haoenei Samaria khümenkei sai?

³⁵Kü ka BUNYUBOUei Jerusalem khümenlabü lele khübü kaonyek kabü mühghaü yoa aoei khübü kaonyek ngeibü ik ka khümenkei?’ ”

³⁶Lausikei mütshuong ngüh üangko kikei, hoba hao to ngüh che ongkei ajongai; aieilausi Chobaei haoen to “Hao to tejongai” dogo ngühkhüm kukei.

³⁷Kheijinei Hilkiaeibü shou Eliakim, Chobaeibü chema ikjaibou Shebna dobou hoba Lüngbüdobü dobou Asafeibü shou Joa, haoeneibü neisimei jitnyinan louan Hezekia to lajamleiboueibü ngühshuong kho lenkei.