Read Chang Naga 2 CHOBA SHUONG 2 Bible Online

2 CHOBA SHUONG 2 - Chang Naga bible

2 CHOBA SHUONG 2

¹Hobaje ladang BUNYUBOUei Elija Mühghaü yeishikei leian anglabü jih sühkei, kheijinei Elija Gilgal ka Elisha yoa haukei.

²Hobaje Elijaei Elisha to laukei, “Sanoudaman no hanei kiteiashi, aieilausi BUNYUBOUei ngo Bethel sühko hautikei.” Lausikei Elishaei laukei, “BUNYUBOU lang ki shongko ngei no üpyolabü.” Hibü haosi Bethel to yankei.

³Hobaje Bethela kibü thuseibü shousi shuong Elisha jungto loukei, hoba hao to laukei, “BUNYUBOUei kaibü BUNYUBOU ka jungka tat ngailanglabü dogo nyi ngekeilao?” Hobaje haoei laukei, “Haü, ngei ho ngeakei, kan küpjembo kishi.”

⁴Kheijinei Elijaei hao to laukei, “Elisha, sanoudaman no hanei kiteiashi, aieilausi BUNYUBOUei ngo Jerikho to hautikei.” Lausikei haoei jongaikei, “BUNYUBOU lang ki shongko ngei no üpyolabü.” Hibü haosi Jerikho to loukei.

⁵Hobaje Jerikhoa kibü thuseibü shousi shuong Elisha jungto loukei hoba hao to laukei, “BUNYUBOUei kaibü BUNYUBOU ka jungka tat ngailanglabü dogo nyi ngekeilao?” Hobaje haoei jongaikei, “Haü, ngei ho ngeakei, kan küpjembo kishi.”

⁶Kheijinei Elijaei laukei, “Sanoudambo no hanei kiteiashi, aieilausi BUNYUBOUei ngo Jordan to hautikei.” Lausikei Elishaei jongaikei, “BUNYUBOU lang ki shongko hoba no lang ki shongko ngei no üpyolabü.” Hibü haosi ham haukei.

⁷Hobaje thuseibü shousi shuong müt anjinsem haukei hoba haoen ae yeian heeko lokei hoba haosi Jordana lokei.

⁸Hobaje Elijaei jembü neisimei sungjung louan kho tukei hoba dei to ngümbei hoba haoen ji ji to linkei, khoei haosi ham kao ulangbüa haukei.

⁹Hobaje haosi danjung longan phaia Elijaei Elisha to laukei, “Ngo ka jungka alangjinei ngei ka shanga ai kümtimang sühda pheashi.” Hobaje Elishaei laukei, “Ngei ka to sudajada, kaibü soushou phejan penyi thüng kü to kitishima.”

¹⁰Hobaje haoei laukei, “Nyi sekbü che phea; khei yingasikei ngo ka ka langjinei nyi ngo hapalonga no kho tegü yinglabü; lausikei ühüpoulonga kho khei ayinglabü.”

¹¹Haosi kho tegü joyoko haujinei, chühashi, waneibü kailong hoba waneibü koli shuong longan haosi ham lulu bangtikei hoba Elija Mühghaü yeishikei khuthük to anlangkei.

¹²Hobaje Elishaei kho hapbei hoba haoei ngekkei, “Abou, abou!. Israelbüeibü koli kailong hoba khonei setbü shuong!” Hobaje haoei touje ühüpbo apbei. Kheijinei haoei jembü neia jungkei hoba penyi la yeiko jitnyinkei.

¹³Haoei tokei Elijaeibü neisimei hao ka atbü hejung loukei hoba ngaikei, hoba Jordan shumanga lokei.

¹⁴Hobaje Elija ka atbü neisimei haoei lekei hoba dei to ngümbei hoba laukei, “BUNYUBOU, khei Elijaeibü Mühghaü lanei ki?” Hobaje haoei dei to ngümjinei khübü kho ji ji to linkei, hoba Elisha danjung haukei.

¹⁵Hobaje ladang hao thedanga Jerikhoa kibü thuseibü shousi shuongei hao hapbei, haoenei laukei, “Elijaeibü soushou Elisha thüka kia!” Hobaje haoen hao shuokla loukei, hoba hao thedanga haoen lolo kaoa khüpetkei.

¹⁶Hobaje haoenei hao to laukei, “Tou chühashi, no khangenbü shuong yoa hau kibü müt anjinsem ki, sanoudaman haoen hautiashi hoba kaibü bunyubou lamtiashi; ai ngenyu, BUNYUBOU soushouei hao leilangan shongh ata ayingsi yomang ata attian kilabü.” Elishaei jongaikei, “Aying, haoen tohauti.”

¹⁷Lausikei hao himou abaushongko haoenei hao thungeikei, hibü haoei laukei, “Hautiashi.” Yingsije haoenei müt anjinsem hautikei hoba haoenei hao chalou semnyet lambei, lausikei ühüp.

¹⁸Hobaje hao Jerikhoa kijinei haoen hao jungto sepeijung longeikei, hoba haoei haoen to laukei, “Ngei kan to tohau dogo alen si?”

¹⁹Kheijinei sangnyu kabü mütshuongei Elisha to laukei, “Chühashi, künei ka to sudajada, ngeibü bunyubouei hapbü tegü sangnyu kho kaoen maibü, lausikei deikhün amai hoba kaoei buhek ahekkuda.”

²⁰Hobaje haoei laukei, “Kü jungto dei thamchak che sungba, hoba khonei jem jinashi.” Hobaje haoenei kho hao jungto sungbakei.

²¹Hobaje hao deikhün to haukei, hoba khonei jem jinkukei hoba laukei, “BUNYUBOUei ho tegü lauda, ‘Ngei habü dei maitia, touje ho jih ka jaüan haibü ayingsi lang ahekbü akilabü.’”

²²Hibü tat sühko Elishaei laubü tegütham dei kho maian kia.

²³Hobaje khüka hao Bethel to angkei, hoba hao lama angko kijinei nashou hanbü shuong hao shuokla loukei hoba hao la nyikukei hoba hao to laukei, “Angashi, no khüngkhebou! Angashi, no khüngkhebou!”

²⁴Hobaje haoei hao phaito chühkei hoba haoen hapbei, hoba BUNYUBOU nyena haoen to khükkeiuokkei. Hobaje bukok maangka sapnyu penyi longkei, hoba haoen nashou hanbü shuong saonyito nyi jitthetthet apbei.

²⁵Hobaje khüka hao Karmel shongh to haukei, hoba khüka hao Samaria to ngaikei.