Read Chang Naga 2 CHOBA SHUONG 20 Bible Online

2 CHOBA SHUONG 20 - Chang Naga bible

2 CHOBA SHUONG 20

¹Kho jihaphaia Hezekia hailabü lele shatko kikei. Hobaje Amozeibü shou Isaia thuseibou hao jungto loukei, hoba laukei, “BUNYUBOUei hai lauda, ‘Kaibü chem küpjeman phoashi; aieilausi no hailabü, no shat amailabü.’ ”

²Kheijinei haoei jembü thenyek kümthang ae sepeikei, hoba BUNYUBOU to welauko laukei,

³“O BUNYUBOU, ngo lai ka thedanga ngühmaia hoba maangpon tangbüa paikei, hoba ka thedanga laobou maibü kho küma, tou damenashima.” Hobaje Hezekia aeibou haapbei.

⁴Hobaje Isaiaei khong adankhümtoua BUNYUBOU ngüh hao jungto louan laukei,

⁵“Sepeijung ngaiashi, hoba ngeibü mütli lei- yeibou Hezekia to lenashi, ‘Kaibü BUNYUBOU, kabou Dawideibü Mühghaüei hai lauda: Ngei kaibü welau dida, ngei kaibü nyeksi hapa; chühashi, ngei no shatbü maitilabü. Sembounyet no kaibü BUNYUBOU chem to anglabü.

⁶Hobaje ngei kaibü salangbü po anthükngao jinyokulabü, hoba ngei no hoba ho sangnyu Assiriabü ik ka khümenlabü, hoba ngei no hoba ho sangnyu laüa hoba ngo khangenbou Dawid laüa püetlabü.’ ”

⁷Hobaje Isaiaei laukei, “Bhuk wentek che sungashi.” Hobaje haoenei kho sungjung louan bokbü moua thiptian phokukei, hoba hao maian apbei.

⁸Hobaje Hezekiaei Isaia to laukei, “BUNYUBOUei ngo maitilabü hoba sembounyeta BUNYUBOU chem to ngo anglabü, dogo laubü shensinge ai kila?”

⁹Isaiaei jongaikei, “Ka shanga BUNYUBOU ka ho shensinge kilabü, khei BUNYUBOUei haoei theletbü kümlabü: yeme theae youyaü an hautila si phaito youyaü an suktila?”

¹⁰Hobaje Hezekiaei jongaiko laukei, “Yeme shangaje thedang ae youyaü an libü kho sobou; lausikei yeme kho phaito youyaü an suktishi.”

¹¹Hobaje Isaia thuseibouei BUNYUBOU to ngekkei, hoba haoei yeme laobou Ahaz Choba chatetbüa kouan kikei kho youyaü an sepeinyu longeitikei.

¹²Kho jihsiphaia Babilon Choba Baladaneibü shou Merodakh Baladanei Hezekia jungto le hoba jongsak künan hautikei; aieilausi Hezekia shatko kia dogo haoei ditkei.

¹³Hezekiaei haoen olinko sungletkei, hoba haoei haoen la namsek peisilei pendou, khei chandinam, hon, ponlemhibü, namsek onang, hoba haoeibü hele thanshang chem hoba haoeibü nyaksinam pendou lenkei. Hezekiaei haoen la haoeibü chema ayingsi haoeibü sangle pendoua alenbü akitei.

¹⁴Kheijinei Isaia thuseibou Hezekia Choba jungto loukei, hoba hao to laukei, “Khübü mütshuongei ai laukei? Hobaje haoen ka jungto laika loukei?” Hobaje Hezekiaei laukei, “Haoen kaodak saabü Babilon ka louakei.”

¹⁵Hobaje haoei laukei, “Haoenei kaibü Choba chema ai hapbei?” Hobaje Hezekiaei jongaikei, “Ngeibü chema kibü pendou haoenei hapa, ngei haoen la ngeibü nyaksinam alenbü ai aki.”

¹⁶Hobaje Isaiaei Hezekia to laukei, “BUNYUBOUeibü ngüh ditashi:

¹⁷Chühashi, kaibü chema kibü pendou hoba kabousi shuongei tat sühko thanshaian kibü pendou Babilon to langlabü chalou louada; aikei ajoulabü dogo BUNYUBOUei lauda.

¹⁸Hobaje ka ka longbü kaibü shousi shuong, laobou ka ka pheklaje haoenei langlabü, hoba Babilon Choba chema sungphatbü mütshuong la yeilabü.”

¹⁹Kheijinei Hezekiaei Isaia to laukei, “Nyi laubü BUNYUBOUeibü ngüh kho maibü.” Aishanga haoei dambei, “Sangmai hoba tükdebü kü jiha kia longa kho tegü aila aying la?”

²⁰Tou Hezekiaeibü joubü kümsilei hoba haoeibü hau pendou hoba haoei lai deikhün sametbü si deiso kümbei hoba sangnyu to dei senjung loukei khübü kho Jihudabü Choba shuong Lüngbüdobü lea doan aki lo?

²¹Hobaje Hezekia bousi shuong yoa yepbei hoba hao shou Manasseei hao jeiko songdakkei.