Read Chang Naga 2 CHOBA SHUONG 21 Bible Online

2 CHOBA SHUONG 21 - Chang Naga bible

2 CHOBA SHUONG 21

¹Manasse songdakla khangjinei hao po anthüknyi kikei, hoba haoei Jerusalema po anjinsemto ngao songdakkei; haoeibü nyu nyen Hefziba kikei.

²Hobaje BUNYUBOU thedanga ai amaibü kikei, phangshuong laobou BUNYUBOUei Israelbü thedang ka inletan apbei, haoeneibü mangsenlabü kümsilei shuong maimai haoei kümbei.

³Aieilausi haobou Hezekiaei leilutibü haoei shongh lemshang kümbei, hoba haoei Baal shanga lemshang kümbei, hoba Israelbü Choba Ahab phatko Ashera che kümbei, hoba müha khanshoulitshou pendou to lembei, hoba khübü kho khangenkei.

⁴Hobaje haoei BUNYUBOU chema lemshang kümbei, laobou shangabü, “Jerusalema kü nyen pholabü” dogo BUNYUBOUei lauan ki.

⁵Hobaje BUNYUBOUeibü chem thedang aenei jijihama mühkabü khanshoulitshou pendou to lemla shanga haoei lemshang kümbei.

⁶Hobaje haoei haoshou wana juokettikei, hoba shensingeei tetbütabü, hoba seibüyaübü kümsilei, yemshanla haubü hoba thuseihuonsei tegübü jungeikei; hoba haoei BUNYUBOU thedanga hao khau angtilabü lele amaibü juong jungeikei.

⁷Hobaje lembüchem laobou shangabü BUNYUBOUei Dawid hoba haoshou Solomon to “Ho chema hoba Jerusalema laobou ngei Israel phang pendou ka pienan ki, ngei ponpen shanga kü nyen pholabü,

⁸ayingsi ngei haoen la sakkubü tegü pendou haoenei ong jungeiko laua longa, hoba ngo khangenbou Mosaei haoen la sakkubü tegü pendou kümbho laua longa, ngei haoeneibü bousi shuong la kubü kaonyek ka Israelbü you lubü to ayaülangtilabü,” dogo laukei, khonei haoei Ashera heangsho küman phokei.

⁹Lausikei haoenei ngüha ale hoba phangshuong aoyou Israelbü shousi shuong thedang ka BUNYUBOUei mautikei, haoen to liman amaibou kümla Manasseei haoen suletkei.

¹⁰Hobaje BUNYUBOUei hao khangenbü thuseibü shuong danko joyoko laukei.

¹¹“Jihudabü Choba Manasseei khübü mangsenlabü shuong kümsije hoba haoen thedanga kibü Amorbü limlangko amaibü kümbei hoba heangshoei Jihudabü shed shontisije;

¹²BUNYUBOU Israel Mühghaüei hai lauda: Chühashi, Jerusalem hoba Jihuda thükto ngei amaibü thushed che loutilabü, khei aoyouei ho shangabü ditlaje jiji nou hama jolabü.

¹³Ngei Jerusalem thükto Samaria khulimbo takbü janglüh jenlabü, hoba Ahab chemdang takbü janglüh jenlabü hoba mütei phau sakan haman apan küpjeman phobü tegü ngei Jerusalem haman aplabü.

¹⁴Hobaje ngeibü phetphanbü jouletbü tekan aplabü hoba haoen dangbou ik to khümbo kulabü, hoba haoen kho dangbou pendou thüka haoen haitilabü hoba soshau soyungbü yeilabü;

¹⁵aieilausi kü thea ai amai kho haoenei kümbei, hoba haoeneibü bousi shuong Ijep kaodak ka longan, tat sühko haoenei ngo khau angtikei.”

¹⁶Aeilaleko tokei haoeibü shabü laobou BUNYUBOU thedanga amaibü kikei kho kümbei, haoei Jihuda la shabü jungeitikei, kho to limbo Manasseei Jerusalem jithonbü ka jithonbü sühko ashenti shongko shedbü akibü sii phinkei.

¹⁷Tou Manasseeibü joubü kümsilei hoba haoei jungeibü shabü shuong, kho Jihudabü Choba shuong Lüngbüdobü lea doan aki lo?

¹⁸Hobaje Manasse bousi shuong yoa yepbei, hoba haoeibü chem bamanga Uzzaeibü bamanga khünkei; hoba haoshou Amonei hao jeiko songdakkei.

¹⁹Hobaje Amon, hao songdakla khangjinei hao po saoto nyi kikei, hoba haoei Jerusalema po nyi songdakkei, hoba tou hao nyueibü nyen Meshullemet, Jotbabü Haruzeibü shou kikei.

²⁰Hobaje haobou Manasseei kümbü tegü BUNYUBOU thedanga ai amai kho kümbei.

²¹Hobaje haobou paibü lamnyu pendoua hao paikei, hoba haobouei khangenbü heangsho shuong khangenkei, hoba khübü kho lembei;

²²hoba haoei bousi shuongeibü Mühghaü BUNYUBOU inletkei, hoba BUNYUBOUeibü lama apai.

²³Hobaje Amoneibü khangenbü shuongei hao khulimbo amaibü huon takkei hoba Choba kho haoeibü jembü chema haitikei.

²⁴Lausikei Amon Choba khulimbo huon takbü shuong pendou, kho kaonyek kabü mütshuongei haitikei, hoba kaonyek kabü mütshuongei hao jeiko hao shou Josia Choba yeitikei.

²⁵Tou Amoneibü joubü kümsilei laobou haoei kümbei khübü kho Jihudabü Choba shuong Lüngbüdobü lea doan aki lo?

²⁶Hobaje hao jembü heea Uzza bamanga khünkei, hoba haoeibü shou Josiaei hao jeiko songdakkei.