Read Chang Naga 2 CHOBA SHUONG 22 Bible Online

2 CHOBA SHUONG 22 - Chang Naga bible

2 CHOBA SHUONG 22

¹Josiaei songdak khangjinei hao po set kikei, hoba haoei Jerusalema po khujinto che songdakkei. Haonyu Bozkathbü Adaiaeibü nouyangshou Jedida nyenbü kikei.

²Hobaje laobou BUNYUBOU thedanga tükde kho haoei kümbei, hoba haobou Dawideibü lamnyu pendoua paikei, hoba nanae maiae to asepei.

³Hobaje Josia Choba po anthükset boubüa Meshullameibü shou Azaliaeibü shou dobou Sha- fan BUNYUBOU chem to Chobaei hautiko laukei,

⁴“Thükkabou ungshedbou Hilkia jungto, khei nam laobou koukhün lombü shuongei mütshuong ka yoshaibü BUNYUBOUeibü chem to jungan louan ki, kho nam kho wean chühla angashi,

⁵hoba haoenei kho BUNYUBOUeibü chema ikjaiko kümbüleibü shuong ik to kutiashi, hoba kho haoenei BUNYUBOUeibü chema, chem leilubü kümetla kibü kümsilei kümbü müt la,

⁶mistri shuong, chemdangbü shuong, hoba laangeibü mistri shuong la, hoba chem kümetla shanga wa hoba jakenbü laang jekla shanga kutiashi.

⁷Khei yingsikei haoeneibü ik to jinkubü kho teweyo; aieilausi haoenei ngühmaanglanko kümbei.”

⁸Hobaje thükkabou ungshedbou Hilkiaei dobou Shafan to laukei, “Ngei BUNYUBOUeibü chema Ngühkhüm Le hapa.” Hobaje Hilkiaei le kho Shafan la kukei hoba haoei kho wekei.

⁹Hobaje dobou Shafan Choba jungto loukei, hoba nyibou Choba jungto ngüh kho jungan loukei, hoba laukei, “No khangenbü shuongei chem ka hapbü nam kho hakshaikua, hoba kho BUNYUBOUeibü chema ik jaiko kibü kümsilei kümbü ik to kua.”

¹⁰Hobaje dobou Shafanei Choba to laukei, “Ungshedbou Hilkiaei kü la le che kuakei.” Hobaje Shafanei Choba junga kho wekei.

¹¹Hobaje ladang Chobaei Ngühkhüm Le kabü ngühshuong kho ditkei, haoei haoeibü neisimei jitnyinkei.

¹²Hobaje Chobaei ungshedbou Hilkia, Shafaneibü shou Ahikam, Mekaiaeibü shou Akbor, dobou Shafan hoba Choba khangenbou Asaia la sakkuko laukei,

¹³“Hauashi, kü shanga hoba mütli shanga Jihudabü pendou shanga ho le hapan kibü shanga BUNYUBOU to pheashi; aishanga sen khulimbo BUNYUBOU khau angko kia; aieilausi seneibü pisi bousi shuongei ho lea kibü ngüh hoba sen shangabü dobü pendou tegütham kümla ngüha ale.”

¹⁴Hibü ungshedbou Hilkia, Ahikam, Akbor, Shafan hoba Asa- iaeibü neisimei phoshang lombou Harhaseibü shou Tikvaeibü shou Shallumeibü yak Hulda thuseinyu jungto haukei, (tou sao Jerusalema kishang nyiboubüa kikei) hoba haoenei sao to joyokei.

¹⁵Hobaje saoei haoen to laukei, “BUNYUBOU Israelbü Mühghaüei lauda: Kü jungto kan hautibou müt to kanei lenashi,

¹⁶‘BUNYUBOUei hai lauda: Chühashi, ngei ho kaonyek thüka, khei Jihudabü Chobaei webü lea kibü ngüh pendou thushed amaibü loutilabü.

¹⁷Aieilausi haoenei ngo inletkei hoba haoen ikküm iklei pendouei haoenei ngo khau angtila shanga lubü mühghaü shuong la ponlemhibü juokkukei; khoei ho kaonyek khulimbo ngo maangpoklabü, hoba kho maang athonlabü.’

¹⁸Lausikei Jihudabü Choba, aoei kan BUNYUBOU ka phela hautikei, kanei hao to ho tegü lenashi, ‘BUNYUBOU Israel Mühghaüei hai lauda: Nyi ditbü ngüh shanga,

¹⁹kaibü maangpon inyaitham kisije hoba no lolo BUNYUBOU thedanga eaaoa yeisije, ladang ngei ho kaonyek khulimbo khei, haoen sangliphang hoba shedsikhau che dogo nyi ditkei, kaibü neisimei jitnyinkei, hoba kü thedanga haapbei, ngeikei ka to ditkua, dogo BUNYUBOUei lauda.

²⁰Khei yingalonga, chühashi, ngei kaibü pisi bousi shuong jungto no leijung loulabü hoba no kaibü hee to haksobüa leian loulabü, ayingsi ngei ho kaodak to ladang thushed sungbalaje, kho kaibü nyekei ühüplabü.’ ” Hobaje haoenei Choba jungto nyibou ngühlang kho sungbakei.